༄༅། །བེལ་ཇམ་སྐུ་ཚབ་དོན་ཁང་གིས་ཡུ་རོབ་གྲོས་ཚོགས་འཚོག་བཞིན་པ་དང་སྟབས་བསྟུན། ཕྱི་ལོ་ ༢༠༢༢ ཟླ་བ་ ༠༧ ཚེས་ ༡༣ ཉིན་ཡུ་རོབ་གྲོས་ཚོགས་ཉེ་འགྲམ་དུ་ཆགས་པའི་སོལ་ཝ་ནི་དཔེ་མཛོད་ཁང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༧ ཕེབས་པའི་༸སྐུའི་འཁྲུངས་སྐར་ཕྱི་བསྣུར་གྱིས་གོ་སྒྲིག་ཞུས་ཡོད། 

དེ་ཡང་མཛད་སྒོའི་ཐོག་ཕྱི་འབྲེལ་མི་སྣ་དང་། ཡུ་རོབ་མཐུན་ཚོགས་ཀྱི་ཚོགས་མི། བྷེལ་གེན་གཞུང་གི་ལས་སྣེ་རྣམ་པ། ཡུ་རོབ་གྲོས་ཚོགས་དང་བྷལ་གེན་གྲོས་ཚོགས་ཀྱི་འཐུས་མི་རྣམ་པ། རྒྱལ་སྤྱིའི་གཞུང་ཁོངས་མིན་པའི་ཚོགས་པའི་སྐུ་ཚབ། བེལ་ཡམ་བོད་རིགས་ཚོགས་པའི་སྐུ་ཚབ་སོགས་གདན་ཞུས་ཚོགས་བཅར་བ་བརྒྱ་ལྷག་མཉམ་ཞུགས་གནང་ཡོད། མཛད་སྒོའི་ཐོག་མར་གཟིག་རྒྱབ་རིན་པོ་ཆེ་མཆོག་དང་། མེ་ཏོག་རིན་པོ་ཆེ་མཆོག སྟོབས་ལགས་བཅས་ནས་ཤིས་བརྗོད་གསུང་འདོན་གནང་གྲུབ་མཚམས་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་ཀྱིས་ཚོགས་བཅར་བ་རྣམས་ལ་འཚམས་འདྲི་དང་སྦྲགས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མི་རྣམས་ལ་རྒྱབ་སྐྱོར་ཕན་གྲོགས་མུ་མཐུད་གནང་བར་ཐུགས་རྗེ་ཆེ་ཞུས་པ་ཆབས་ཅིག སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ཞི་བདེ་དང་། ཆོས་ལུགས་མཐུན་འབྲེལ། ཁོར་ཡུག་དང་འགྲོ་བ་མིའི་ཐོབ་ཐང་སོགས་ཀྱི་དཀའ་ངལ་སེལ་ཐབས་སུ་སྐུ་ངལ་སྐྱོན་གྱི་ཡོད་པ་ནན་བརྗོད་གནང་། གཞན་ཡང་ཁོང་མོས་བོད་མིའི་རང་དབང་འཐབ་རྩོད་དེ་བཞིན་འཚེ་མེད་ཞི་བའི་ལམ་ལ་བསྐྱོད་བཞིན་པ་དེ་ཡང་མགོན་པོ་གང་ཉིད་མཆོག་གིས་འཚེ་མེད་ཞི་བའི་ལམ་སྟོན་གནང་བའི་བཀའ་དྲིན་ཉག་ཅིག་ལ་བརྟེན་ནས་བྱུང་བ་འགྲེལ་བརྗོད་གནང་། དེ་རྗེས་གདན་ས་བཀྲ་ཤིས་ལྷུན་པོའི་མཁན་པོ་གཟིག་རྒྱབ་རིན་པོ་ཆེ་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་ཐུགས་བསྐྱེད་དམ་བཅའ་བཞིའི་སྐོར་ངོ་སྤྲོད་གནང་བ་དང་སྦྲགས་ཁོང་ཉིད་བེལ་ཇམ་དུ་ཕེབས་པའི་དགོས་དམིགས་ངོ་སྤྲོད་གནང་ཡོད། 

གསུང་བཤད་ལས་རིམ་མཇུག་སྒྲིལ་མཚམས་སུ་ཚོགས་བཅར་བ་རྣམས་ལ་བེལ་ཇམ་གནས་སྡོད་བོད་མི་སྒྱུ་རྩལ་བ་གསུམ་ནས་ནང་མ་བསྟོད་གཞས་གཟིགས་འབུལ་ཞུས་པ་དང་། དེ་རྗེས་སྒྱུ་རྩལ་བ་དང་ཚོགས་བཅར་བ་རྣམས་མཉམ་ཞུགས་ཀྱིས་སྒོར་གཞས་ལ་རོལ་ཡོད་པ་བཅས།།