༄༅། །གདན་ས་བཀྲ་ཤིས་ལྷུན་པོའི་མཁན་པོ་གཟིག་རྒྱབ་རིན་པོ་ཆེ་མཆོག་དང་། བེལ་ཇམ་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས། ཕྱི་དྲིལ་བོད་དོན་ཞུ་གཏུག་འགན་འཛིན་འབྲུག་བསྟན་སྐྱིད་ལགས་བཅས་ལས་གྲུབ་པའི་སྐུ་ཚབ་ཚོགས་ཆུང་གིས་བེལ་ཇམ་ཁུལ་དུ་༸ཀུན་གཟིགས་པཎ་ཆེན་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་གི་གནད་དོན་ཞུ་གཏུག་ལས་འགུལ་གྱི་ཉིན་མཐའ་མར་བེལ་ཇམ་གྱི་མངའ་སྡེའི་གྲོས་ཚོགས་འཐུས་མི་དང་གཞུང་གི་གནད་ཡོད་མི་སྣ་སོགས་དང་མཇལ་འཕྲད་གནང་ཡོད། 

སྐབས་དེར་ལཱ་ལེབ་རི་ (La Libre) ཞེས་པའི་གསར་ཤོག་གི་གསར་འགོད་པ་དང་བོད་མཐོ་སྒང་གི་གཏམ་རྒྱུད་ (Tibet – Stories from the Roof of the World) ཅེས་པ་རྩོམ་འབྲི་གནང་མཁན་ལྕམ་སཱ་བི་ནེ་ཝར་ཧེ་སི་ (Sabine Verhest) ལགས་ཀྱིས་གཟིག་རྒྱབ་རིན་པོ་ཆེར་བོད་ནང་ཆོས་དད་རང་དབང་ལ་རྡོག་རོལ་དང་། པཎ་ཆེན་རིན་པོ་ཆེ་གར་སོང་ཆ་མེད་དུ་གྱུར་བའི་གནད་དོན་སོགས་ཀྱི་སྐོར་བཅར་འདྲི་ཞུས་ཤིང་། རིན་པོ་ཆེ་མཆོག་གིས་བོད་ནང་གཞི་རྩའི་འགྲོ་བ་མིའི་ཐོབ་ཐང་གིས་གཙོས་ཆོས་དད་རང་དབང་གནས་བབ་ཇེ་སྡུག་ཏུ་འགྲོ་བ་བཞིན་པ་ནན་བརྗོད་དང་འབྲེལ། བོད་ནང་༧གོང་ས་མཆོག་གི་སྐུའི་འཁྲུངས་སྐར་སྲུང་བརྩིའང་ཞུ་ཆོག་གི་མེད་པའི་སྐོར་དང་། བོད་དེ་འཛམ་གླིང་ནང་ནས་རང་དབང་གིས་གནས་བབ་ཆེས་ཞན་པའི་ས་གནས་སུ་ངོས་འཛིན་ཞུས་སྐོར་སོགས་ཀྱི་ཐད་འགྲེལ་བརྗོད་གནང་ཡོད། 

དེ་བཞིན་སྐུ་ཚབ་ཆུང་གིས་བེལ་ཇམ་ཕྱི་སྲིད་ལས་ཁུངས་ཀྱི་འགྲོ་བ་མིའི་ཐོབ་ཐང་འགན་འཛིན་ལྕམ་ཧེ་ལི་ན་བྷེར་གྷི་ (Helena Bergé) ལགས་དང་། རྒྱ་ནག་ལས་དོན་འགན་འཛིན་ལྕམ་ཅར་ལི་ནི་བྷི་ནཊ་ (Charline Binard) ལགས་དང་མཇལ་འཕྲད་ཀྱིས་རྒྱ་ནག་གཞུང་གིས་པཎ་ཆེན་ཆུང་སྲིད་རིན་པོ་ཆེ་མཆོག་གར་སོང་ཆ་མེད་དུ་བཏང་བའི་སྐོར་དང་། དོན་ཚན་ལྔ་འཁོད་པའི་ཞུ་ཡིག་ཅིག་བེལ་ཇམ་གཞུང་ལ་ཕུལ་ཡོད་པ་མ་ཟད། བྱེ་བྲག་ཏུ་ཕྱི་སྲིད་ལྷན་ཁང་ནས་པཎ་ཆེན་རིན་པོ་ཆེ་མཆོག་གང་མགྱོགས་གློད་བཀྲོལ་ཡོང་ཐབས་དང་། དབུ་མའི་ལམ་གྱི་ཐོག་ནས་བོད་རྒྱ་འབྲེལ་མོལ་ཡོང་ཐབས་ལ་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཞུས་ཡོད་པ་རེད། 

ཕྱོགས་མཚུངས་གཟིག་རྒྱབ་རིན་པོ་ཆེ་མཆོག་གིས་བེལ་ཇམ་མངའ་སྡེའི་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གི་ཚོགས་གཞོན་ཝེན་ཧོབ་ (Van Hoof) ལགས་དང་མཇལ་འཕྲད་གནང་སྟེ། པཎ་ཆེན་རིན་པོ་ཆེའི་གནད་དོན་དང་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་སྐོར་གླེང་སློང་གནང་ཡོད། དེའི་ཁར་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་དང་འབྲུག་བསྟན་སྐྱིད་ལགས་གཉིས་ནས་བོད་ནང་རྒྱ་ནག་གཞུང་གིས་བོད་ཀྱི་སྐད་ཡིག་རིག་གཞུང་མི་ཉམས་རྒྱུན་འཛིན་བྱ་རྒྱུར་དམ་བསྒྲགས་ཀྱི་སྲིད་བྱུས་གཏན་འབེབས་བྱས་ཏེ། མི་སེར་སྤེལ་ཡུལ་གྱི་གཏན་འཇགས་སློབ་གྲྭ་བཙུགས་ཡོད་པ་སོགས་ཀྱི་ཐད་ཞུ་གཏུག་གནང་ཡོད།

གྲོས་ཚོགས་འཐུས་མི་ཧོབ་ལགས་ཀྱིས་ཞུ་གཏུག་དོན་ཚན་ཁག་ལ་གསན་བཞེས་གནང་རྗེས་རྒྱལ་ཁབ་ཁག་གི་བོད་དོན་ཁྲིམས་འཆར་གཏན་འབེབས་དང་། གྲོས་ཚོགས་སུ་ཉན་ཞིབ་ཇི་གནང་སྐོར་རྒྱུས་ལོན་གནང་། ཁོང་མོ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་བཞེད་ལས་བྱུང་བའི་ཆོས་ལུགས་ལ་མ་བརྟེན་པའི་བཟང་སྤྱོད་བསླབ་གཞིར་ཡིད་སྨོན་ཞུ་མཁན་ཞིག་ཡིན་འདུག་པ་དང་། ཁོང་མོས་དེ་ཉིད་ལག་བསྟར་གནང་ན་བེལ་ཇམ་གྱི་ན་གཞོན་རྣམས་ཀྱི་སེམས་ཀྱི་ཞི་བདེར་ཕན་ཐོགས་ཆེན་པོ་བྱུང་ངེས་པ་འགྲེལ་བརྗོད་གནང་ཡོད། 

གཟིག་རྒྱབ་རིན་པོ་ཆེས་དབུ་ཁྲིད་པའི་སྐུ་ཚབ་ཚོགས་ཆུང་ནས་ཡུ་རོབ་མཐུན་ཚོགས་ཀྱི་གནད་ཡོད་མི་སྣ་རྣམ་པའང་མཇལ་འཕྲད་གནང་ཡོད་པ་རེད། རེས་གཟའ་ཉི་མར་སྐུ་ཚབ་རྣམ་པ་ཨིན་ཡུལ་ལོན་ཊོན་དུ་ཕེབས་ཐོན་གྱིས་ཨིན་ཡུལ་དུ་ཞུ་གཏུག་དབུ་འཛུགས་གནང་རྒྱུ་ཡིན་པ་བཅས།།