༄༅། །༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་ ༼ དགེ་འདུན་ཆོས་ཀྱི་ཉི་མ། ༽ མཆོག་གིས་དབུས་བོད་ནང་གི་བོད་མི་ཆབ་སྲིད་བཙོན་པ་རྣམས་ཀྱི་གནད་དོན་ཞུ་གཏུག་སླད་གདན་ས་བཀྲ་ཤིས་ལྷུན་པོའི་མཁན་རིན་པོ་གཟིག་རྒྱབ་རིན་པོ་ཆེ་མཆོག་དང་། ཕྱི་དྲིལ་བོད་དོན་ཞུ་གཏུག་ཚན་པའི་འགན་འཛིན་འབྲུག་བསྟན་སྐྱིད་ལགས་བེལ་ཇམ་དུ་ཕེབས་འབྱོར་མཚམས་བེལ་ཇམ་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་དང་། དྲུང་ཆེ་འཕྲིན་ལས་དབང་འདུས་ལགས་རྣམ་གཉིས་ཀྱིས་ཕེབས་བསུའི་སྣེ་ལེན་ཞུས་ཡོད། 

བེལ་ཇམ་གྱི་རྒྱལ་ས་སྦར་སིལ་དུ་ཟླ་འདིའི་ཕྱི་ཚེས་ ༡༢ ནས་ ༡༧ བར་ཉིན་གྲངས་དྲུག་རིང་རིན་པོ་ཆེ་མཆོག་གིས་གནད་ཡོད་མི་སྣ་རྣམས་ལ་༸པཎ་ཆེན་རིན་པོ་ཆེའི་གནད་དོན་ཞུ་གཏུག་གནང་གི་ཡོད་པ་ལྟར། ཉིན་དང་པོར་གཟིག་རྒྱབ་རིན་པོ་ཆེ་མཆོག་གིས་ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་མེ་ཀུ་ལ་སི་པེག་ས་ (Mikulas Peksa) མཆོག་དང་མཇལ་འཕྲད་གནང་ཡོད། མཇལ་འཕྲད་སྐབས་རིན་པོ་ཆེ་མཆོག་གིས་རྒྱལ་བ་ཡབ་སྲས་གཉིས་དམིགས་བསལ་གྱི་ཆོས་ཕྱོགས་འབྲེལ་བ་དང་། ༸པཎ་ཆེན་ཆུང་སྲིད་རིན་པོ་ཆེ་མཆོག་གི་སྐུ་གཟུགས་འཕྲོད་བཞེས་གནས་སྟངས། ད་ལྟ་གང་དུ་ཡོད་མེད་ཐད་ཐུགས་འཚབ་བསྟན་འདུག འདི་ལོར་༸པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་རྒྱ་གཞུང་གིས་གར་སོང་ཆ་མེད་དུ་བཏང་ནས་ལོ་ངོ་ ༢༧ འཁོར་ཡོད་པ་དང། རྒྱལ་སྤྱིའི་མི་མང་གིས་རྒྱ་གཞུང་ལ་གནོན་ཤུགས་ཇི་ཙམ་སྤྲད་ཀྱང་རྒྱ་ནག་གཞུང་ནས་མུ་མཐུད་ཁོང་བདེ་ཐང་ཡིན་པ་མ་ཟད། ཁོང་རང་ཐུགས་སུན་པོ་གནང་འདོད་མི་འདུག་ཅེས་ཤོད་ཀྱི་ཡོད་པ་རེད། གཞན་ཡང་རིན་པོ་ཆེ་མཆོག་གིས་རྒྱ་ནག་ཏུ་ཡོད་པའི་ཡུ་རོབ་གྲོས་ཚོགས་ཀྱི་སྐུ་ཚབ་ནས་༸པཎ་ཆེན་རིན་པོ་མཇལ་འཕྲད་ཞུ་རྒྱུ་དང་། ཁོང་གི་སྐུ་གཟུགས་འཕྲོད་བཞེས་གནས་སྟངས་སོགས་གསལ་སྟོན་ཆེད་ཡུ་རོབ་གྲོས་ཚོགས་སུ་ཁྲིམས་འཆར་གཏན་འབེབས་གནང་སྐྱོང་ཡོང་བའི་འབོད་སྐུལ་ཞུས་འདུག་ཅིང། མཇལ་འཕྲད་གྲུབ་མཚམས་བོད་མིའི་སྐུ་ཚབ་རྣམ་པ་ཡུ་རོབ་གྲོས་ཚོགས་སུ་གཟིགས་སྐོར་ལ་འཁྲིད་གནང་འདུག 

ཕྱི་དྲོ་རིན་པོ་ཆེ་མཆོག་ལ་བཀའ་བརྒྱུད་བསམ་ཡས་རྫོང་དུ་ནང་པའི་ཆོས་ཚོགས་ཀྱི་ངེས་སྟོན་པ་སྐུ་ཞབས་ཀར་ལོ་ (Carlo Luyckx) ལགས་དང་། བྷལ་གེན་ནང་པའི་མཐུན་ཚོགས་ཀྱི་ཚོགས་གཙོ། ཡུ་རོབ་ནང་པའི་ལྷན་ཚོགས་ཀྱི་ཚོགས་གཙོ་སྐུ་ཞབས་རོན་ཨི་ཀོན་ (Ron Eichorn) ལགས་ཀྱིས་ཕེབས་བསུ་ཞུས་འདུག་པ་དང་། སྐབས་དེར་༸པཎ་ཆེན་རིན་པོ་ཆེ་མཆོག་གི་གནད་དོན་སྐོར་བགྲོ་གླེང་ལྷུག་པོ་གནང་སྟེ་ལག་ལེན་དོན་འཁྱོལ་ཐུབ་པའི་འཆར་གཞི་འཆར་འགོད་གནང་འདུག 

ཕྱི་ཚེས་ ༡༤ ཉིན་གཟིག་རྒྱབ་རིན་པོ་ཆེ་མཆོག་ལ་བེལ་ཇམ་སྐུ་ཚབ་དོན་ཁང་ནས་ཕེབས་བསུའི་མཛད་སྒོ་ཞིག་གོ་སྒྲིག་ཞུ་གི་ཡོད་དང་། དེ་རྗེས་མུ་མཐུད་རིན་པོ་ཆེས་ཞུ་གཏུག་མཛད་འཆར་ཁག་བསྐྱང་རྒྱུ་ཡིན་འདུག ཚོགས་འདུ་ཡོངས་རྫོགས་སུ་བོད་མིའི་སྐུ་ཚབ་ལྷན་དུ་བེལ་ཇམ་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་ཀྱང་ལྷན་བཅར་ཞུ་གི་ཡོད་པ་བཅས།།