༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༧ ལ་ཕེབས་པའི་སྐུའི་འཁྲུངས་སྐར་དུས་ཆེན་དང་བསྟུན་ཕྱི་དྲིལ་བོད་ཀྱི་འགྲེམས་སྟོན་ཁང་གིས་ཟླ་འདིའི་ཕྱི་ཚེས་ ༠༤ དང་ ༠༥ བཅས་ཉིན་གྲངས་གཉིས་རིང་རྡ་སྟེང་བོད་ཁྱིམ་དང་རྡ་ཤོད་བོད་ཁྱིམ་གཉིས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཕྲིན་དང་འབྲེལ་བའི་སྐུ་པར་འགྲེམས་སྟོན་གནང་ཡོད་པ་རེད། དེ་ཡང་འགྲེམས་སྟོན་སྐབས་ཐོར་མར་ཕྱི་དྲིལ་བོད་ཀྱི་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས་ཀྱིས་ལས་གཞིའི་དགོས་དམིགས་ངོ་སྤྲོད་སྙིང་བསྡུས་དང་བཅས་སློབ་གྲྭའི་སློབ་ཕྲུག་རྣམས་ལ་༸གོང་ས་མཆོག་གི་མཛད་པ་འཕྲིན་ལས་དང་འབྲེལ་བའི་སྐུ་པར་འགྲེམས་སྟོན་དང་། དེ་བཞིན་ནོར་བུ་འཚོལ་བ། (In search of the Jewel) ཞེས་པའི་འགུལ་རིས་གློག་བརྙན་བསྟན་ཡོད། ཐེངས་འདིའི་༸གོང་ས་མཆོག་གི་མཛད་འཕྲིན་དང་འབྲེལ་བའི་སྐུ་པར་འགྲེམས་སྟོན་ལ་སློབ་ཕྲུག་རྣམས་ནས་དགའ་མོས་དང་ཤེས་འདོད་ཆེན་པོ་བསྟན་འདུག་ཅིང་། སློབ་གྲྭའི་འཛིན་སྐྱོང་དང་དགེ་ལས་རྣམས་ནས་ཀྱང་ལས་གཞི་དེར་བསྔགས་བརྗོད་དང་སླད་མར་མུ་མཐུད་ལས་གཞི་དེ་རིགས་སྤེལ་དགོས་པའི་འབོད་སྐུལ་ཡང་གནང་འདུག་པ་བཅས།།