༄༅། །ཕྱི་ལོ་ ༢༠༢༢ ཟླ་བ་ ༠༧ ཚེས་ ༠༨ ཉིན་ཉི་ཧོང་གི་སྲིད་བློན་ཟུར་པ་སྐུ་ཞབས་ཤིན་ཛོ་ཨ་བེ་མཆོག་ལྐོག་གསོད་བཏང་བའི་ཡིད་སྐྱོའི་གནས་ཚུལ་ཐོན་པར་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་འདས་པོའི་ནང་མི་ཉེ་འབྲེལ་ཡོངས་ལ་ཐུགས་གསོའི་འཕྲིན་ཡིག་ཅིག་བསྐུར་གནང་འདུག

དེ་ཡང་ཐུགས་གསོའི་འཕྲིན་ཡིག་ནང་དུ་བཀའ་བློན་མཆོག་གིས། སྐུ་ཉིད་ཀྱི་བཟའ་ཟླ་དང་ང་ཚོའི་སྙིང་ཉེ་བའི་གྲོགས་པོ་ཤིན་ཛོ་ཨ་བེ་མཆོག་གློ་བུར་དུ་འདས་གྲོངས་སུ་གྱུར་བར་ངོས་རང་བློ་ཕམ་ཆེན་པོ་བྱུང་། ད་ལྟ་འཛམ་གླིང་སྤྱི་ཡོངས་ནས་ཁོང་ལ་མྱ་ངན་གུས་འདུད་ཞུ་བཞིན་པ་ལྟར་ང་ཚོའི་ངོས་ནས་ཀྱང་སྐུ་ཉིད་ཀྱི་ནང་མི་ལྟོས་བཅས་ཡོངས་ལ་མྱ་ངན་དང་བཅས་ཐུགས་གསོ་ཞུ་རྒྱུ་ཡིན། ཞེས་དང་།

ད་དུང་བཀའ་བློན་མཆོག་གིས་སྲིད་བློན་ཟུར་པ་ཁོང་གིས་ཉི་ཧོང་དུ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་གསར་འཛུགས་སླད་ཤུགས་རྐྱེན་ཆེན་པོ་སྤྲད་ཡོད་པར་ངོས་འཛིན་གནང་འདུག་ལ། ཉི་ཧོང་གྲོས་ཚོགས་ལ་མཚོན་ན་འཛམ་གླིང་ཡོངས་ནས་གྲོས་ཚོགས་འཐུས་མིའི་བོད་དོན་རྒྱབ་སྐྱོར་བ་མང་ཤོས་ཡོད་པའི་རྒྱལ་ཁབ་ཅིག་ཡིན། 

གཞན་ཡང་ཁོང་མོས། སྐུ་ཞབས་ཨ་བེ་མཆོག་ནི་སྤྱི་ནོར༸གོང་ས་༸སྐྱབས་མགོན་ཆེན་པོ་མཆོག་ལ་བརྩི་བཀུར་ཆེན་པོ་ཞུ་མཁན་ཞིག་ཡིན་པ་མ་ཟད། མགོན་པོ་གང་ཉིད་མཆོག་དང་མཇལ་འཕྲད་ལན་མང་ཞུས་གནང་ཡོད། དེ་བཞིན་ཁོང་གིས་བོད་མིའི་སྒྲིག་འཛུགས་ཀྱི་སྲིད་སྐྱོང་ཟུར་པ་བློ་བཟང་སེངྒེ་ལགས་ཀྱང་མཇལ་འཕྲད་གནང་ཡོད་པ་རེད།