༄༅། །འདི་གའི་ཆེད་གཉེར་གསར་འགོད་པ་སྐལ་བཟང་རྒྱ་མཚོ་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༧ ཚེས་ ༩ ཉིན་གྱི་སྔ་དྲོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་སྦིར་ནང་ཆེན་ཅོན་ཏ་ར་ས་གནས་འགོ་འཛིན་ལས་ཁུངས་དང་། ས་གནས་རང་བདེན་ཚོགས་ཆུང་། ཅོན་ཏ་ར་ས་གནས་འཐུས་ཚོགས། ཅོན་ཏ་ར་བུ་བཅོལ་ཁང་། ས་གནས་འཕྲོད་བསྟེན་སྨན་ཁང་བཅས་ལ་འཚམས་གཟིགས་སུ་ཕེབས་འབྱོར་སྐབས་ཕྱོགས་བཞུགས་སྤྱི་འཐུས་རྡོ་རྗེ་ཚེ་བརྟན་ལགས་དང་བསྟན་འཛིན་འཇིགས་བྲལ་ལགས། ཅོན་ཏ་ར་ནང་ཆེན་ས་གནས་འགོ་འཛིན་མེ་རི་སྐྱབས་ལགས། དེ་བཞིན་གཞུང་དང་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་རྣམ་པ་དང་། སྦིར་ཅོན་ཏ་ར་ནང་ཆེན་གཞིས་ཆགས་ཀྱི་མི་མང་བཅས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།
དེ་རྗེས་དཔལ་ལྡན་སྲིད་སྐྱོང་མཆོག་ཅོན་ཏ་ར་སཾ་བྷོ་ཊ་སློབ་གྲྭ་དང་། ཅོན་ཏ་ར་ས་གནས་འགོ་འཛིན་གྱི་ཁྱབ་ཁོངས་དོན་ལྡན་རྒས་གསོ་ཁང་བཅས་ལ་གཟིགས་སྐོར་ཕེབས་གྲུབ་རྗེས་ཅོན་ཏ་ར་བོད་ཁྱིམ་སློབ་གྲྭར་འཚམས་གཟིགས་སུ་ཕེབས་ཡོད་པ་དང་། སྐབས་དེར་བོད་ཁྱིམ་སློབ་གྲྭའི་འགན་འཛིན་ལྷན་ཚོགས་དང་དགེ་ལས་སློབ་ཕྲུག་སོགས་ནས་དགའ་བསུའི་སྣེ་ལེན་གཟབ་རྒྱས་ཞུས། དཔལ་ལྡན་སྲིད་སྐྱོང་མཆོག་གིས་ཅོན་ཏ་ར་བོད་ཁྱིམ་སློབ་གྲྭའི་དམིགས་བསལ་སློབ་གྲྭ་དང་ཤེས་ཡོན་གྱི་སྡེ་ཚན་ཁག་སོགས་ལ་གཟིགས་ཞིབ་གནང་ཡོད།
དེ་ནས་དཔལ་ལྡན་སྲིད་སྐྱོང་མཆོག་ཅོན་ཏ་ར་བོད་ཁྱིམ་སློབ་གྲྭའི་བློ་གཏེར་ཚོགས་ཁང་དུ་མཛད་སྒོར་ཕེབས་ཡོད་པ་དང་། མཛད་སྒོའི་ཐོག་མར་ཅོན་ཏ་ར་ནང་ཆེན་ས་གནས་འགོ་འཛིན་མེ་རི་སྐྱབས་ལགས་དང་ཅོན་ཏ་ར་བོད་ཁྱིམ་སློབ་གྲྭའི་སློབ་སྤྱི་བཅས་ནས་རིམ་བཞིན་ཁུངས་སོ་སོའི་ལས་བསྡོམས་སྙན་སྒྲོན་ཞུས་རྗེས། རྟེན་འབྲེལ་མཚོན་ཆེད་སློབ་ཕྲུག་ཁག་གཅིག་གིས་བོད་ཀྱི་ཐུན་མོང་མིན་པའི་རིག་གཞུང་དང་འབྲེལ་བའི་རྐང་བྲོ་གླུ་གཞས་གཟིགས་འབུལ་ཞུས་ཡོད།
དེ་ནས་དཔལ་ལྡན་སྲིད་སྐྱོང་མཆོག་གིས་ཅོན་ཏ་ར་བོད་ཁྱིམ་སློབ་གྲྭའི་དགེ་ལས་སློབ་ཕྲུག་ཡོངས་དང་། ཅོན་ཏ་ར་སཾ་བྷོ་ཊ་སློབ་གྲྭའི་དགེ་ལས་སློབ་ཕྲུག ཅོན་ཏ་ར་ནང་ཆེན་གཞིས་ཆགས་ཀྱི་མི་མང་སོགས་ལ་གསུང་བཤད་གནང་དོན། ང་ཚོ་བོད་པ་དང་ལྷག་པར་བཙན་བྱོལ་བ་ཡིན་པའི་ཆ་ནས་ང་ཚོ་ཚང་མས་བོད་པའི་དངོས་ཡོད་གནས་ཚུལ་གང་ཡིན་པ་ཤེས་རྟོགས་བྱེད་རྒྱུ་གལ་ཆེན་པོ་རེད། སློབ་ཕྲུག་ཚོས་སློབ་གྲྭའི་ནང་བཞུགས་པའི་སྐབས་ལས་འགན་གཙོ་བོ་སློབ་སྦྱོང་ཡག་པོ་བྱེད་རྒྱུ་དེ་ཡིན། མི་ཞིག་ལ་ཤེས་ཡོན་ཡོད་ཀྱང་ཡ་རབས་བཟང་སྤྱོད་མེད་ན་མི་དེས་སྤྱི་ཚོགས་ལ་ཕན་ཐོགས་ཐུབ་པའི་ལས་ཀ་བྱེད་མི་ཐུབ། རྣམ་པ་ཚོ་རིམ་པས་མཐོ་སློབ་ཁག་ལ་སློབ་གཉེར་བྱེད་དུ་འགྲོ་ངེས་རེད། དེ་དུས་རྣམ་པ་ཚོས་མི་རིགས་འདྲ་མིན་ལ་ཐུག་འཕྲད་གནང་ངེས་ཡིན་པས་བོད་ཀྱི་ལོ་རྒྱུས་དང་བོད་ནང་གི་གནས་ཚུལ་ངོ་མ་གང་ཡིན་འགྲེལ་བཤད་བརྒྱབ་དགོས། བོད་དོན་སྐོར་འགྲེལ་བཤད་རྒྱག་པར་བོད་ཀྱི་ལོ་རྒྱུས་ཀྱི་གནས་བབ་དང་གནས་ཚུལ་ངོ་མ་གང་ཡིན་ཤེས་པར་བྱ་རྒྱུ་ཧ་ཅང་གལ་ཆེན་པོ་ཆགས་ཡོད།
མི་རབས་རྒན་པ་རྣམས་ཀྱིས་སྐུ་ལས་ཧ་ཅང་བསྐྱོན་གནང་ཡོད་སྟབས་མི་རབས་གསར་པའི་གཞོན་སྐྱེས་རྣམས་ཀྱིས་མི་རབས་རྒན་པ་ཚོའི་བཀའ་དྲིན་དྲན་རྒྱུ་ཤིན་ཏུ་གལ་ཆེན་པོ་རེད། སློབ་ཕྲུག་ཚོས་བོད་གངས་ཅན་ལྗོངས་ཀྱི་ས་ཆའི་རྒྱ་ཁྱོན་དང་ལོ་རྒྱུས་སྐོར་ཤེས་རྟོགས་བྱེད་དགོས། ནུབ་ཕྱོགས་པ་ཚོས་བོད་ནི་འཛམ་གླིང་གི་ཡང་རྩེ་ཞེས་བརྗོད་ཀྱི་ཡོད། བོད་ལ་འཁྱགས་རོམ་ཕུན་སུམ་ཚོགས་པ་ཡོད་སྟབས་འཛམ་གླིང་གི་སྣེ་གསུམ་པ་ཞེས་བརྗོད་ཀྱི་ཡོད། ཨེ་ཤི་ཡའི་མི་རྣམས་ཀྱིས་བོད་ནི་ཨེ་ཤི་ཡའི་ཆུ་མཛོད་རེད་ཅེས་བརྗོད་ཀྱི་ཡོད། ཅེས་དང་། སློབ་ཕྲུག་ཚོས་རྒྱ་ནག་གིས་བོད་ཀྱི་ས་ཁུལ་ཁག་དབྱེ་བ་ཕྱེ་ཡོད་པ་རྣམས་ཤེས་དགོས་པ་གལ་ཆེན་པོ་ཡིན་པ་མ་ཟད། བོད་ཀྱི་ལོ་རྒྱུས་ཀྱི་གནས་བབ་ཤེས་རྟོགས་དགོས་རྒྱུ་གལ་ཆེན་པོ་ཆགས་ཡོད། ཅེས་གསུངས།
གཞན་ཡང་དཔལ་ལྡན་སྲིད་སྐྱོང་མཆོག་གིས་མི་རབས་གསར་པའི་གཞོན་སྐྱེས་རྣམས་ཀྱིས་བོད་བཙན་པོ་དང་བོད་སིལ་བུའི་སྐབས་ཀྱི་ལོ་རྒྱུས་དང་། བོད་དང་སོག་པོ་དབར་བྱུང་བའི་ལོ་རྒྱུས། རིན་སྤུངས་པ་དང་། ཕག་མོ་གྲུ་པ། སྡེ་པ་གཙང་པ་བཅས་ཀྱི་སྐབས་ཀྱི་ལོ་རྒྱུས། ༸རྒྱལ་དབང་རིམ་བྱོན་སྐབས་ཀྱི་བོད་ཀྱི་ལོ་རྒྱུས་སྐོར་ཤེས་རྟོགས་བྱེད་རྒྱུ་གལ་ཆེན་པོ་ཆགས་ཡོད་སྐོར་དང་། དེ་བཞིན་དཔལ་ལྡན་སྲིད་སྐྱོང་མཆོག་གིས་བོད་པ་ཚོས་དཀྲོག་གཏམ་རིགས་ལ་མགོ་འཁོར་ནས་མ་བསྡད་པར་ནང་ཁུལ་འཆམ་མཐུན་གནང་དགོས་པའི་གལ་གནད་དང་། བཀའ་ཤག་སྐབས་བཅུ་དྲུག་པའི་ངོས་ནས་ལས་དོན་ཚང་མ་ཕྱི་གསལ་ནང་གསལ་བྱས་དང་བྱེད་བཞིན་ཡོད་པ་སོགས་ཀྱི་སྐོར་གསུངས།
ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་སློབ་ཕྲུག་ཚོས་གོ་སྐབས་ལེན་ཐབས་གནང་དགོས་པ་སོགས་ཀྱི་སྐོར་གསུང་བཤད་གནང་རྗེས་ཅོན་ཏ་ར་བོད་ཁྱིམ་སློབ་གྲྭའི་སློབ་སྤྱི་པ་སངས་ཚེ་རིང་ལགས་ཀྱིས་དཔལ་ལྡན་སྲིད་སྐྱོང་མཆོག་ལ་དྲན་རྟེན་ཕྱག་རྟགས་ཕུལ་བ་དང་། སློབ་གྲྭའི་དགེ་ཆེ་བསྟན་འཛིན་སྒྲོལ་མ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་ཡོད། ཉིན་རྒྱབ་དཔལ་ལྡན་སྲིད་སྐྱོང་མཆོག་གིས་སྦིར་དུ་རྟེན་གཞི་བྱས་པའི་པདྨའི་ཨེ་ཝཾ་ཆོས་སྒར་རྟེན་མཆོག་འགྱུར་མེད་གླིང་དགོན་པར་གནས་གཟིགས་དང་། དགོན་པར་སྤྲེལ་ཟླའི་སྤྲོས་བཅས་ཚེས་བཅུ་ཆེན་མོའི་གིང་ཆེན་བཅུ་དྲུག་གི་འཆམ་འཁྲབ་བཞིན་པར་མཇལ་ཁ་ཞུས་ཡོད་པ་བཅས།། 
