༄༅། །འདི་གའི་ཆེད་གཉེར་གསར་འགོད་པ་སྐལ་བཟང་རྒྱ་མཚོ་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༧ ཚེས་ ༨ ཉིན་གྱི་སྔ་དྲོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་བྱང་ཕྱོགས་སྦིར་བོད་མིའི་གཞིས་ཆགས་ཁག་ཏུ་གཞུང་འབྲེལ་འཚམས་གཟིགས་ཕེབས་ཡོད།
དེ་ཡང་ཐོག་མར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་སྦིར་དཔལ་ཡུལ་ཆོས་འཁོར་གླིང་དགོན་པ་དང་། འབྲི་རུ་ས་སྐྱ་དགོན་པ། སྨྱུང་གནས་ལྷ་ཁང་། ནང་ཆེན་ཅོན་ཏ་ར་བུམ་མང་དགོན་པ། སྡེ་དགེ་ཟབ་གསང་དགོན་པ། སྡེ་དགེ་རྫོང་སར་དགོན་པ་བཅས་ལ་གནས་གཟིགས་དང་། དེ་བཞིན་ཅོན་ཏ་ར་སྨན་རྩྭ་འདེབས་ལས་ཁང་དང་སྨན་སྦྱོར་ཁང་། ཅོན་ཏ་ར་གསོ་བ་རིག་པ་སློབ་གཉེར་དང་ཞིབ་འཇུག་ཁང་བཅས་ལ་འཚམས་གཟིགས་གནང་གྲུབ་མཚམས་སྦིར་སྡེ་དགེ་ལས་ཁུངས་དང་ཁྱབ་ཁོངས་ལས་ཁུངས་ཁག ལི་ལི་གྲོང་སྡེ་བཅས་ལ་འཚམས་གཟིགས་དང་། དེ་བཞིན་སྦིར་བོད་ཚོགས་ས་གནས་འགོ་འཛིན་ལས་ཁུངས་དང་ཁྱབ་ཁོངས་ལས་ཁུངས་ཁག སྦིར་ས་གནས་གཞོན་ནུ་ཚོགས་པ། སྦིར་ས་གནས་བུད་མེད་ཚོགས་པ། སྦིར་ས་གནས་འཕྲོད་བསྟེན་སྨན་ཁང་། སྦིར་གསོ་བ་རིག་པའི་བརྟག་དཔྱད་སྨན་ཁང་བཅས་ལ་འཚམས་གཟིགས་གནང་བ་དང་། ཉིན་རྒྱབ་དཔལ་ལྡན་སྲིད་སྐྱོང་མཆོག་གིས་སྦིར་ཁྱབ་ཁོངས་སུ་ཇཱ་བོད་ཁྱིམ་སློབ་གྲྭར་འཚམས་གཟིགས་གནང་གྲུབ་རྗེས་སྦིར་སཾ་བྷོ་ཊ་ཉིན་སློབ་ཏུ་འཚམས་གཟིགས་གནང་སྐབས་སྦིར་སྡེ་དགེ་ས་གནས་འགོ་འཛིན་དང་། སྦིར་བོད་ཚོགས་ས་གནས་འགོ་འཛིན་གྱི་ལས་ཚབ། སྦིར་ཅོན་ཏ་ར་ནང་ཆེན་ས་གནས་འགོ་འཛིན་བཅས་དང་། གཞུང་དང་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་རྣམ་པ། སྦིར་སཾ་བྷོ་ཊ་ཉིན་སློབ་ཀྱི་དགེ་ལས་སློབ་ཕྲུག་དང་སེར་སྐྱ་མང་ཚོགས་སོགས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།
དེ་རྗེས་སྦིར་སཾ་བྷོ་ཊ་ཉིན་སློབ་ཀྱི་ཚོགས་ཁང་དུ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སྦིར་སྡེ་དགེ་དང་སྦིར་བོད་ཚོགས་ས་གནས་མང་ཚོགས་ལ་གསུང་བཤད་མ་གནང་གོང་ཐོག་མར་རྒྱལ་བའི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་དང་མར་མེ་ཞལ་ཕྱེ་གནང་རྗེས་ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བཏང་གནང་ཡོད། དེ་ནས་སྦིར་སྡེ་དགེ་ས་གནས་འགོ་འཛིན་ཚེ་རིང་ཕུན་ཚོགས་ལགས་ཀྱིས་འཚམས་འདྲིའི་གསུང་བཤད་གནང་བ་དང་འབྲེལ་ལས་བསྡོམས་སྙན་སྒྲོན་ཞུས་ཡོད་པ་དང་། སྦིར་བོད་ཚོགས་ས་གནས་འགོ་འཛིན་ལས་ཚབ་པ་སངས་རྡོ་རྗེ་ལགས་ཀྱིས་སྦིར་བོད་ཚོགས་ཁྱབ་ཁོངས་ཀྱི་ལས་བསྡོམས་སྙན་སྒྲོན་ཞུས། དེ་རྗེས་དཔལ་ལྡན་སྲིད་སྐྱོང་མཆོག་གིས་སྦིར་སྡེ་དགེ་དང་སྦིར་བོད་ཚོགས་ས་གནས་མང་ཚོགས་ལ་གསུང་བཤད་གནང་དོན། ང་ཚོའི་མི་རབས་གོང་མ་རྣམས་བོད་ནས་རྒྱ་གར་ལ་བཙན་བྱོལ་དུ་ཕེབས་རྗེས་ཁོང་རྣམ་པས་ཧ་ཅང་སྐུ་ལས་བསྐྱོན་གནང་ཡོད། མ་འོངས་པར་མི་རབས་གཞོན་པ་རྣམས་ཀྱིས་འགན་མང་ཙམ་འཁུར་དགོས་པ་གལ་ཆེན་པོ་ཆགས་ཡོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། བོད་ཀྱི་བསྟན་བདག་བླ་ཆེན་རྣམ་པས་སྐུ་ལས་བསྐྱོན་བར་བརྟེན་ནས་ད་ལྟའི་ཆར་བཙན་བྱོལ་བོད་མིའི་སྒྲིག་འཛུགས་སྲ་བརྟེན་ཆགས་ཡོད། དེར་བརྟེན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བོད་ཀྱི་བསྟན་བདག་བླ་ཆེན་རྣམ་པའི་བཀའ་དྲིན་དྲན་རྒྱུ་ཤིན་ཏུ་གལ་ཆེན་པོ་རེད། ཅེས་གསུངས།
གཞན་ཡང་དཔལ་ལྡན་སྲིད་སྐྱོང་མཆོག་གིས་བོད་ཀྱི་ལོ་རྒྱུས་ཀྱི་གནས་བབ་སྤྱི་དང་བཙན་བྱོལ་བོད་མིའི་མང་གཙོའི་འཕེལ་རིམ་སྐོར། དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་རིམ་པ་ཕེབས་པ་རྣམས་ལ་མང་ཚོགས་ནས་སློབ་སྦྱོང་གནང་དགོས་པའི་གལ་གནད་དང་། ང་ཚོས་ཁྲིམས་དང་སྒྲིག་གཞིའི་སྐོར་སློབ་སྦྱོང་གནང་དགོས་པ། དངོས་ཡོད་གནས་ཚུལ་གང་ཡིན་པ་མང་ཚོགས་ནས་ཤེས་དགོས་པའི་གལ་གནད་དང་བོད་ཀྱི་ལོ་རྒྱུས་ཀྱི་གནས་བབ་ཤེས་རྟོགས་བྱེད་དགོས་པ། མི་རབས་གཞོན་པ་ཚོས་བོད་ཀྱི་ལོ་རྒྱུས་ཁྱོན་ཡོངས་ཀྱི་སྐོར་ཤེས་རྟོགས་དགོས་པའི་གལ་གནད་དང་བཙན་བྱོལ་བོད་མིའི་བཅའ་ཁྲིམས་ལ་སློབ་སྦྱོང་བྱེད་དགོས་པ་སོགས་ཀྱི་སྐོར་གསུངས།
ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་མ་འོངས་པའི་ལས་གཞི་ཁག་ལག་བསྟར་ཚད་ལྡན་བྱ་རྒྱུའི་ཆེད་དུ་བཙན་བྱོལ་བོད་མིའི་མི་འབོར་གྲངས་བཤེར་གནང་རྒྱུ་ཡིན་པའི་སྐོར་དང་། བོད་མིའི་སྒྲིག་འཛུགས་ཀྱི་འཛིན་སྐྱོང་བྱེད་སྟངས་དྲ་རྒྱ་བརྒྱུད་བྱ་རྒྱུ་ཡིན་པ། གཞུང་འབྲེལ་ཡིག་ཆ་ཁག་གྲངས་འཛིན་གྱི་ལམ་ནས་ཉར་ཚགས་བྱ་རྒྱུ་ཡིན་པ། བཙན་བྱོལ་བོད་མིའི་སྒྲིག་འཛུགས་ཀྱི་སྒྲོམ་གཞི་ཚད་ལྡན་དགོས་པ། དེ་བཞིན་བོད་མི་ནང་ཁུལ་མཐུན་སྒྲིལ་བྱེད་དགོས་པའི་ཕན་ཡོན་སོགས་ཀྱི་སྐོར་གསུང་བཤད་གནང་རྗེས་མང་ཚོགས་ཀྱི་དྲི་བ་ཁག་ལ་ལན་འདེབས་གསལ་བཤད་གནང་གྲུ
