༄༅། །ཕྱི་ལོ་ ༢༠༢༢ ཟླ་ ༧ ཚེས་ ༡༡ ཉིན་གྱི་སྔ་དྲོ་རྡ་ས་འཛིན་སྐྱོང་སྦྱོང་བརྡར་བསྟི་གནས་ཁང་གི་ཐུ་མི་ཚོགས་ཁང་དུ་བོད་ཀྱི་གསོ་བ་རིག་པའི་ལྷན་ཚོགས་ཀྱི་དམིགས་བསལ་ཚོགས་འདུའི་དབུ་འབྱེད་མཛད་སྒོ་ཚོགས་ཡོད་པ་དང་། དབུ་འབྱེད་ཀྱི་མཛད་སྒོར་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། དམིགས་བསལ་སྐུ་མགྲོན་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས། བོད་ཀྱི་གསོ་བ་རིག་པའི་ལྷན་ཚོགས་ཀྱི་ཚོགས་གཙོ་ཚེ་རིང་མཚམས་གཅོད་ལགས་དང་ཚོགས་གཞོན་ཆོས་ལོ་ཐར་ལགས། བོད་ཀྱི་སྨན་རྩིས་ཁང་གི་འགན་འཛིན་ཐུབ་བསྟན་ཚེ་རིང་ལགས། དེ་བཞིན་བོད་ཀྱི་གསོ་བ་རིག་པའི་ལྷན་ཚོགས་ཀྱི་ཚོགས་མི་ ༣༠ ཙམ་མཉམ་ཞུགས་གནང་ཡོད།
དེ་ཡང་ཐོག་མར་བོད་ཀྱི་གསོ་བ་རིག་པའི་ལྷན་ཚོགས་ཀྱི་ཚོགས་གཞོན་ཆོས་ལོ་ཐར་ལགས་ཀྱིས་ཕེབས་བསུ་དང་འབྲེལ་བའི་ཚོགས་འདུའི་སྐོར་ངོ་སྤྲོད་གསུང་བཤད་གནང་རྗེས་བོད་ཀྱི་གསོ་བ་རིག་པའི་ལྷན་ཚོགས་ཀྱི་ཚོགས་གཙོ་ཚེ་རིང་མཚམས་གཅོད་ལགས་ཀྱིས་བོད་ཀྱི་གསོ་བ་རིག་པའི་ལྷན་ཚོགས་ཀྱི་ངོས་ནས་ད་བར་ཁྲིམས་སྒྲིག་དགོངས་དོན་བཞིན་ལས་དོན་བསྒྲུབས་དང་མ་བསྒྲུབ་པ། ལྷན་ཚོགས་ཀྱི་ད་ལྟའི་གནས་བབ་སྐོར་གསུང་བཤད་གནང་ཡོད། དེ་རྗེས་དམིགས་བསལ་སྐུ་མགྲོན་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཀྱིས་བོད་ཀྱི་གསོ་བ་རིག་པའི་ལྷན་ཚོགས་ཀྱི་ཉི་གདུགས་གཅིག་གི་འོག་འབྲེལ་ཡོད་སྒྲིག་འཛུགས་ཁག་མཉམ་གནས་བྱེད་དགོས་པའི་གལ་གནད་དང་། དེ་བཞིན་འབྲེལ་ཡོད་ཚོགས་མི་རྣམས་ཀྱིས་གསོ་བ་རིག་པའི་བསྟན་པ་མི་ཉམས་རྒྱུན་འཛིན་དང་ཉམས་པ་སླར་གསོ་གནང་དགོས་པའི་གལ་གནད་སོགས་ཀྱི་སྐོར་གསུངས་སོང་།
སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བཀའ་ཤག་སྐབས་བཅུ་དྲུག་པའི་ངོས་ནས་ཚོགས་པ་གང་ཡིན་ནའང་སྒྲིག་འཛུགས་ཀྱི་སྒྲོམ་གཞི་གལ་ཆེན་པོ་རྩི་ཡི་ཡོད་པའི་སྐོར་དང་། བོད་ཀྱི་གསོ་བ་རིག་པའི་ལྷན་ཚོགས་ཀྱི་སྒྲིག་གཞི་བསྐྱར་བཅོས་ཀྱིས་ཁ་གསལ་བཟོ་དགོས་པ་དང་ནང་ཁུལ་གཅིག་ཕན་གཅིག་གྲོགས་བྱེད་དགོས་པ། གསོ་བ་རིག་པའི་སྨན་པ་མང་པོ་ཐོན་དང་འཐོན་བཞིན་ཡོད་པས་དེ་དག་གི་གྲངས་ཐོ་ཉར་དགོས་པའི་གལ་གནད། སྨན་རྩྭ་འདེབས་ལས་ཀྱི་ལས་གཞི་རྒྱ་ཆེ་རུ་གཏོང་རྒྱུ་ཡིན་པ་སོགས་ཀྱི་སྐོར་གསུངས།
གཞན་ཡང་དཔལ་ལྡན་སྲིད་སྐྱོང་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གྲ་སྒྲིག་སྡུག་ས་ནས་བྱེད་དགོས་པ་དང་། རེ་བ་བཟང་ས་ནས་རྒྱག་དགོས་ཞེས་བཀའ་སློབ་རིམ་པ་ཕེབས་པ་ལྟར་ང་ཚོས་གྲ་སྒྲིག་སྡུག་ས་ནས་བྱེད་དགོས། ཞེས་དང་། བོད་ནས་རྒྱ་གར་ལ་བཙན་བྱོལ་དུ་ཕེབས་མཁན་ཚོར་སྡོད་ཁང་མེད་པའི་དཀའ་ངལ་འཕྲད་བཞིན་ཡོད་སྟབས། ཁོང་ཚོའི་དཀའ་ངལ་སེལ་ཐབས་དང་། དེ་བཞིན་བཙན་བྱོལ་བོད་མིའི་གཞིས་ཆགས་ཁག་ཏུ་ཡུལ་སྐོར་སྤྲོ་འཆམ་པའི་ལས་གཞི་སྤེལ་རྒྱུ་ཡིན་པ། དགོན་སྡེ་ཁག་ཏུ་སྒོམ་སྒྲུབ་བསྟི་གནས་ཁང་གསར་འཛུགས་གནང་རྒྱུའི་དགོངས་འཆར་ཡོད་པ་སོགས་ཀྱི་སྐོར་གསུང་བཤད་གནང་ཡོད།
མཐར་སྨན་པ་ཐོགས་མེད་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ་ཡོད། བོད་ཀྱི་གསོ་བ་རིག་པའི་ལྷན་ཚོགས་ཀྱི་དམིགས་བསལ་ཚོགས་འདུ་དེ་བཞིན་ཕྱི་ལོ་ ༢༠༢༢ ཟླ་ ༧ ཚེས་ ༡༡ ནས་ ༡༢ བར་ཉིན་གྲངས་གཉིས་རིང་ཚོགས་རྒྱུ་ཡིན་ཞིང་། ཐེངས་འདིའི་ཚོགས་འདུའི་བརྗོད་གཞི་གཙོ་བོ་ཁག་ནི། བོད་ཀྱི་གསོ་བ་རིག་པའི་ལྷན་ཚོགས་ཀྱི་གནས་བབ་དང་ལས་དོན་བྱེད་ཕྱོགས། གསོ་རིག་སྨན་པ་དང་བརྟག་དཔྱད་སྨན་ཁང་། སྨན་སྦྱོར་དང་སྨན་སྦྱོར་ཐོན་སྐྱེད་ཀྱི་གྲངས་ཐོ་དང་། འབྱུང་འགྱུར་གསོ་རིག་སྨན་རྒྱུའི་གནས་བབ། རྒྱ་གར་དབུས་སའི་གཞུང་ནས་གསོ་བ་རིག་པའི་ཐོག་ཁྲིམས་སྒྲིག་གཏན་འབེབས་དང་ལག་བསྟར་གནང་ཕྱོགས་སོགས་ཀྱི་སྐོར་གྲོས་བསྡུར་དང་གྲོས་ཆོད་གཏན་འབེབས་གནང་རྒྱུ་ཡིན་པ་བཅས།།
