༄༅། །འདི་གའི་ཆེད་གཉེར་གསར་འགོད་པ་སྐལ་བཟང་རྒྱ་མཚོ་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༧ ཚེས་ ༧ ཉིན་གྱི་སྔ་དྲོ་རྒྱ་གར་བྱང་ཕྱོགས་ཧི་མཱ་ཅལ་མངའ་སྡེའི་ནང་ཆགས་པའི་འཕགས་ཡུལ་གདན་ས་དཔལ་སྤུངས་ཤེས་རབ་རྣམ་པར་རྒྱལ་བའི་གླིང་གི་བྱང་ཆུབ་ཆེན་མོའི་གཙུག་ལག་ཁང་གི་ཆོས་ར་བྱམས་ཆེན་ཆོས་ཀྱི་ལྡིང་ཁང་དུ་རིག་གནས་མཐོ་སློབ་དོན་གཉིས་ནོར་བུའི་དགའ་ཚལ་གྱི་སྐབས་དང་པོའི་སྨན་རྩིས་སློབ་གཉེར་བ་རྣམས་སློབ་ཐོན་དང་། ཉམས་གསོག བསྙེན་མཚམས་བཅས་ཡོངས་སུ་གྲུབ་པའི་བསླབ་པ་མཐར་སོན་གྱི་མཛད་སྒོ་ཚོགས་ཡོད་པ་དང་། མཛད་སྒོར་བྱམས་མགོན་ཀྭན་ཏིང་ཏཱའི་སི་ཏུ་རིན་པོ་ཆེ་མཆོག་དང་། སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གཙོས་དམིགས་བསལ་སྐུ་མགྲོན་དུ་བོད་མིའི་སྒྲིག་འཛུགས་ཀྱི་ཆོས་རིག་དྲུང་ཆེ་འཆི་མེད་ཚེ་དབྱངས་ལགས་དང་། ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས། འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས། ཁྱུང་པོ་རྒྱལ་སྟོན་རིན་པོ་ཆེ། དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་ལགས། གདན་ས་དཔལ་སྤུངས་ཤེས་རབ་རྣམ་པར་རྒྱལ་བའི་གླིང་གི་བླ་སྤྲུལ་མཁན་སློབ་དང་དགེ་ལས་རྣམ་པ། ནང་སྲིད་ལས་ཁུངས་ཀྱི་དྲུང་ཆེ་ལས་འཕར་བསྟན་འཛིན་ནོར་བུ་ལགས། བོད་ཀྱི་སྨན་རྩིས་ཁང་གི་འགན་འཛིན་ཐུབ་བསྟན་ཚེ་རིང་ལགས། དེ་བཞིན་སྦིར་ཁུལ་གྱི་གཞུང་དང་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་རྣམ་པ། ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་ཇོ་སྲས་བཀྲ་ཤིས་ཚེ་རིང་ལགས། བོད་ཀྱི་གསོ་བ་རིག་པའི་ལྷན་ཚོགས་ཀྱི་ཚོགས་གཙོ་ཚེ་རིང་མཚམས་གཅོད་ལགས་སོགས་ཕེབས་ཡོད།
དེ་ཡང་ཐོག་མར་རིག་དགེ་ཀརྨ་དབང་གྲགས་ལགས་ཀྱིས་མཛད་སྒོའི་སྐོར་ངོ་སྤྲོད་གསུང་བཤད་གནང་གྲུབ་མཚམས་དབུ་མཛད་ཀྱིས་ཡན་ལག་བདུན་པ་དང་ས་གཞི་བྱིན་རླབས་གསུང་འདོན་གནང་རྗེས་གསོལ་ཇ་འབྲས་སིལ་འདེགས་འབུལ་ཞུས་པ་དང་། རྩིས་དགེ་ངེས་དོན་རབ་རྒྱས་ལགས་ཀྱིས་གསོ་རྩིས་ལུགས་དང་སྦྱར་བའི་ཕུན་ཚོགས་ལྔ་ལྡན་གྱི་བཤད་པ་གསུངས། དེ་ནས་བྱམས་མགོན་ཀྭན་ཏིང་ཏཱའི་སི་ཏུ་རིན་པོ་ཆེ་མཆོག་གིས་གསུང་བཤད་གནང་རྗེས་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་དཔེ་དེབ་ཁག་དབུ་འབྱེད་གནང་གྲུབ་མཚམས་བོད་ཀྱི་གསོ་བ་རིག་པའི་ལྷན་ཚོགས་ནས་དཔལ་སྤུངས་རིག་གནས་མཐོ་སློབ་དོན་གཉིས་ནོར་བུའི་དགའ་ཚལ་དེ་ཉིད་གསོ་རིག་སློབ་གཉེར་ཁང་ཚད་ལྡན་ཞིག་ཏུ་ངོས་འཛིན་གནང་བའི་ལག་འཁྱེར་གནང་བ་དང་། བྱམས་མགོན་ཀྭན་ཏིང་ཏཱའི་སི་ཏུ་རིན་པོ་ཆེ་མཆོག་གིས་ཆོས་ཕྱོགས་ཀྱི་མཛད་རིམ་དུ་དམིགས་བསལ་རྩིས་རམས་པ་རྣམས་དང་སྐབས་དང་པོའི་སྨན་རྩིས་སློབ་ཐོན་པ་རྣམས་ལ་བསླབ་པ་མཐར་སོན་གྱི་ལག་འཁྱེར་དང་།
དཔལ་ལྡན་སྲིད་སྐྱོང་མཆོག་གིས་སྐབས་གཉིས་པའི་སྨན་རྩིས་སློབ་གཉེར་བ་དང་དམིགས་བསལ་སྒྲ་རིག་ཆེད་སྦྱོང་སྒྲ་རིག་སྔོན་འགྲོ་འཛིན་གྲྭའི་ལོ་འཁོར་ཡིག་རྒྱུགས་རྩེ་ཕུད་རྣམས་ལ་བྱ་དགའ་གནང་རྗེས་དཔལ་སྤུངས་རིག་གནས་མཐོ་སློབ་ཀྱི་སློབ་སྤྱི་ཨེ་པ་བསོད་ནམས་རིན་ཆེན་ལགས་ཀྱིས་རིག་གནས་མཐོ་སློབ་ཀྱི་ལས་བསྡོམས་སྙན་སྒྲོན་ཞུས་པ་དང་འབྲེལ་དཔལ་སྤུངས་རིག་གནས་མཐོ་སློབ་ཀྱི་སྐབས་དང་པོ་སྨན་རྩིས་བསླབ་པ་མཐར་སོན་པ་རྣམས་ནས་བྱམས་མགོན་ཀྭན་ཏིང་ཏཱའི་སི་ཏུ་རིན་པོ་ཆེ་མཆོག་ལ་བརྟན་བཞུགས་ཕུལ་སོང་། 
དཔལ་ལྡན་སྲིད་སྐྱོང་མཆོག་དང་སྐུ་མགྲོན་རྣམ་པ་གདན་སའི་རྒྱུད་གྲྭའི་སྐབས་དང་པོའི་སློབ་ཐོན་པ་རྣམས་ཀྱིས་བཞེངས་པའི་གསང་སྔགས་རྒྱུད་སྡེའི་རྒྱ་མཚོའི་དཀྱིལ་འཁོར་དང་། གཞན་ཡང་སྙན་རྩོམ་དང་ཡིག་གཟུགས་སོགས་ལ་གཟིགས་ཞིབ་དང་། དེ་བཞིན་དཔལ་སྤུངས་དམ་ཆོས་བང་མཛོད་ཁང་ལ་གཟིགས་སྐོར་དུ་ཕེབས་ཡོད།
ཉིན་རྒྱབ་བོད་ཀྱི་སྲོལ་རྒྱུན་སྤྱི་དང་བྱེ་བྲག་དཔལ་ཀུན་སྤུངས་པའི་གསོ་རྩིས་བརྡ་སྤྲོད་རིག་པའི་འཆད་ཉན་ལམ་ལུགས་སོགས་ཀྱི་ཁྱད་ཆོས་སྐོར་གསུང་བཤད་ཀྱི་ལས་རིམ་དབུ་འཛུགས་གནང་སོང་། སྐབས་དེར་སྨན་དགེ་ཡེ་ཤེས་སྐལ་བཟང་ལགས་ཀྱིས་གསོ་བ་རིག་པའི་ཁྱད་ཆོས་དང་། རྩིས་དགེ་ངག་དབང་ལགས་ཀྱིས་རྩིས་རིག་པའི་ཁྱད་ཆོས། རིག་དགེ་ཀརྨ་དབང་གྲགས་ལགས་ཀྱིས་བརྡ་སྤྲོད་རིག་པའི་སྐོར་གསུང་བཤད་གནང་ཡོད། སློབ་སྤྱི་ཨེ་པ་བསོད་ནམས་རིན་ཆེན་ལགས་ཀྱིས་ཡིད་འཕྲོག་སྨན་གྱི་ལྡུམ་ར་བདུད་རྩི་གཏེར་མཛོད་སྐོར་ངོ་སྤྲོད་གསུང་བཤད་གནང་བ་དང་འབྲེལ་དམིགས་བསལ་སྐུ་མགྲོན་རྣམ་པས་གསུང་བཤད་གནང་ཡོད།
དེ་རྗེས་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་དོན། བྱམས་མགོན་ཀྭན་ཏིང་ཏཱའི་སི་ཏུ་རིན་པོ་ཆེ་མཆོག་གིས་དབུས་པའི་སྐུ་མགྲོན་རྣམ་པ་དང་། གདན་ས་དཔལ་སྤུངས་ཤེས་རབ་གླིང་གི་བླ་སྤྲུལ་དང་མཁན་སློབ། དགེ་འདུན་འདུས་མང་ཡོངས་ལ་བཀའ་ཤག་སྐབས་བཅུ་དྲུག་པའི་ངོས་ནས་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། ལས་ཀ་བྱེད་སྐབས་སྒྲོམ་གཞི་ཡག་པོ་དགོས་པ་ཧ་ཅང་གལ་ཆེན་པོ་ཆགས་ཡོད། སྨན་རྩིས་ཁང་གིས་སྒྲིག་འཛུགས་ཀྱི་ངོ་བོ་ཐོག་ནས་སྨན་དང་རྩིས་ཀྱི་སྡེ་ཚན་གཉིས་བོད་ཀྱི་གསོ་རིག་སྨན་པའི་ལྷན་ཚོགས་ནས་ཕྱིར་འཐེན་བྱས་པ་དེ་འགྲིག་གི་མེད་པ་ངོས་འཛིན་ཞུ་ཡི་ཡོད། དེར་བརྟེན་སྨན་རྩིས་ཁང་གི་སྨན་དང་རྩིས་ཀྱི་སྡེ་ཚན་གཉིས་གང་མགྱོགས་བོད་ཀྱི་གསོ་རིག་སྨན་པའི་ལྷན་ཚོགས་ནང་བསླེབ་ཐབས་ཞུ་རྒྱུ་ཡིན།
སྨན་པ་ཐོན་མཁན་མང་དུ་འགྲོ་བཞིན་ཡོད་སྟབས་སྔོ་སྨན་འདེབས་ལས་ཀྱི་ལས་གཞི་ཤུགས་ཆེ་རུ་གཏོང་དགོས་པ་རེད་མ་གཏོགས་མ་འོངས་པར་དཀའ་ངལ་འཕྲད་ངེས་རེད། འཛིན་སྐྱོང་བཀའ་ཤག་གི་ངོས་ནས་སྔོ་སྨན་འདེབས་ལས་ཀྱི་ལས་གཞི་ཤུགས་ཆེ་རུ་གཏོང་རྒྱུའི་འཆར་གཞི་ཡོད། བྱམས་མགོན་ཀྭན་ཏིང་ཏཱའི་སི་ཏུ་རིན་པོ་ཆེ་མཆོག་གི་དགོངས་པ་རྒྱ་ཆེན་པོ་ཡོད་པ་དེ་ང་ཚོ་ཚང་མས་རྒྱུན་སྐྱོང་གནང་དགོས་ཞེས་སོགས་ཀྱི་གསུང་བཤད་གནང་།
མཐར་དཔལ་ལྡན་སྲིད་སྐྱོང་མཆོག་གིས་ཡིད་འཕྲོག་སྨན་གྱི་ལྡུམ་ར་བདུད་རྩིའི་གཏེར་མཛོད་དབུ་འབྱེད་དང་། སྨན་ཤིང་འདེབས་འཛུགས་གནང་རྗེས་སྐུ་མགྲོན་ལྷན་རྒྱས་རིག་གནས་མཐོ་སློབ་ཀྱི་སྡེ་ཚན་སྨན་གྱི་ལྡུམ་ར་དང་། བརྟག་དཔྱད་སྨན་ཁང་། འཇམ་དཔྱད་ཁང་། འགྲེམས་སྟོན་ཁང་། བཟོ་རིག མཐོ་སློབ་ཀྱི་ཡིག་ཚང་། སྨན་སྦྱོར་ཁང་བཅས་ལ་གཟིགས་སྐོར་གནང་ཡོད་པ་བཅས།།
