༄༅། །ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་བདུན་ཕྲག་སྔོན་མའི་རེས་གཟའ་ཉི་མའི་ཉིན་རྒྱ་གར་ནས་ཉི་ཧོང་ལ་ཕྱིར་ལོག་གིས་ཕྱི་ལོ་ ༢༠༢༢ ཟླ་ ༧ ཚེས་ ༢༨ ཉིན་ཉི་ཧོང་གི་གྲོས་ཚོགས་ཚོགས་འོག་མའི་ནང་ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་དྲུང་ཆེ་ཨི་ཤཱི་ཀ་ཝ་ཨ་ཀི་མ་ས་ (Ishikawa Akimasa) ལགས་དང་མཇལ་འཕྲད་ཀྱིས་ཉེ་ཆར་ཉི་ཧོང་གི་སྲིད་བློན་ཟུར་པ་སྐུ་ཞབས་ཤིན་ཛོ་ཨ་བྷེ་ (Shinzo Abe) མཆོག་གིས་འོས་བསྡུའི་དྲིལ་བསྒྲགས་གསུང་བཤད་གནང་བཞིན་པའི་སྐབས་མི་ཞིག་གིས་གློ་བུར་དུ་མེ་མདའ་བརྒྱབ་པར་བརྟེན་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་མ་ཐག་བློ་ཕམ་ཤུགས་ཆེ་བྱུང་བ་དང་། འདས་པོ་དམ་པ་སྐུ་ཞབས་ཤིན་ཛོ་ཨ་བྷེ་མཆོག་གིས་ད་བར་ཁ་ཞེ་གཉིས་མེད་ཀྱི་སྒོ་ནས་བོད་རྒྱའི་དཀའ་རྙོག་སེལ་ཐབས་སུ་རྒྱབ་སྐྱོར་དང་ལམ་སྟོན་གནང་ཡོད་པ་སོགས་ཀྱི་སྐོར་གསུངས་ཡོད།
གཞན་ཡང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས། སྐུ་ཞབས་ཤིན་ཛོ་ཨ་བྷེ་མཆོག་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་མ་ཐག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་བཅས་ནས་ཧ་ཅང་བློ་ཕམ་དང་སྦྲགས་སྐུ་ཞབས་ཤིན་ཛོ་ཨ་བྷེ་དམ་པ་དེ་ཉིད་ལ་ཐུགས་སྨོན་དང་། དམ་པ་ཁོང་གི་ནང་མི་ཉེ་འབྲེལ་ཀུན་ལ་ཐུགས་གསོའི་གསུང་འཕྲིན་གནང་བ་དེ་དག་ཉི་ཧོང་སྐུ་ཚབ་དོན་གཅོད་ཁང་བརྒྱུད་འབྲེལ་ཡོད་ལ་ཕུལ་ཡོད་སྐོར་གསུངས།
ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་དངོས་སུ་ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ལས་ཁུངས་སུ་ཆེད་ཕེབས་ཀྱིས་གཞིས་བྱེས་བོད་མིའི་ཚབ་ཞུས་ཏེ་སྐུ་ཞབས་ཤིན་ཛོ་ཨ་བྷེ་མཆོག་དམ་པ་དེ་ཉིད་ཀྱི་ཤུལ་ལུས་ནང་མི་དང་གཉེན་ཉེ་དུ། དེ་བཞིན་དམ་པ་ཁོང་གི་ཆབ་སྲིད་ཚོགས་པ་བཅས་ལ་གདུང་སེམས་མཉམ་སྐྱེའི་རྒྱབ་སྐྱོར་ཞུས་གནང་ཡོད།
ཕྱོགས་མཚུངས་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས། སྐུ་ཞབས་ཤིན་ཛོ་ཨ་བྷེ་དམ་པ་དེ་ཉིད་ཀྱི་ཆེད་དུ་ཕྱི་ལོ་ ༢༠༢༢ ཟླ་ ༧ ཚེས་ ༡༡ རེས་གཟའ་ཟླ་བ་ཉིན་གྱི་ཕྱེད་ཡོལ་ཆུ་ཚོད་ ༣ ཐོག་བཞུགས་སྒར་རྡ་ས་གངས་སྐྱིད་སྲིད་སྐྱོང་ཚོགས་ཁང་དུ་བོད་མིའི་སྒྲིག་འཛུགས་ཀྱི་མང་གཙོ་ཀ་བ་གསུམ་གྱི་མཛད་གཙོ་རྣམ་པས་དབུས་ལྷན་ཁང་ཁག་གི་དྲུང་ཆེ་ཆུང་རྣམ་པ་དང་། དེ་བཞིན་སྲི་ཞུའི་ལས་བྱེད་བཅས་ཚང་འཛོམས་ཐོག་གཞུང་འབྲེལ་མཆོད་འབུལ་སྨོན་ལམ་ཚོགས་པ་དང་། དེ་བཞིན་ཉི་ཧོང་སྐུ་ཚབ་དོན་གཅོད་ཁང་དུ་ཉི་ཧོང་ནང་གནས་སྡོད་བོད་མི་རྣམས་ཀྱིས་མཆོད་འབུལ་སྨོན་ལམ་ཚོགས་པ་སོགས་ཀྱི་སྐོར་གསུངས།
སྐབས་དེར་ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་དྲུང་ཆེ་ཨི་ཤཱི་ཀ་ཝ་ཨ་ཀི་མ་ས་ལགས་ཀྱིས། དུས་ཚོད་གཉན་འཕྲང་ཅན་གྱི་སྐབས་འདིར་བོད་མི་རྣམས་ཀྱིས་གདུང་སེམས་མཉམ་སྐྱེའི་རྒྱབ་སྐྱོར་གནང་བར་རྗེས་སུ་ཡི་རང་དང་། སྐུ་ཞབས་ཤིན་ཛོ་ཨ་བྷེ་དམ་པ་ཁོང་ནི། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཧ་ཅང་ཡིད་སྨོན་ཞུ་མཁན་ཞིག་ཡིན་པ་མ་ཟད། བོད་དོན་ལ་རྒྱབ་སྐྱོར་ཤུགས་ཆེ་གནང་མཁན་ཞིག་ཀྱང་ཡིན། སྐུ་ཞབས་ཤིན་ཛོ་ཨ་བྷེ་མཆོག་སྐུ་ཚེའི་འཕེན་པ་རྫོགས་པ་དེ་ང་ཚོར་མཚོན་ན་རླབས་ཆེན་གྱི་དབུ་ཁྲིད་ཅིག་སྐུ་ཚེའི་འཕེན་པ་རྫོགས་པ་རེད། ཅེས་དང་། འདས་པོ་དམ་པ་སྐུ་ཞབས་ཤིན་ཛོ་ཨ་བྷེ་མཆོག་གིས་ད་བར་བོད་དོན་སླད་རྒྱབ་སྐྱོར་གནང་བ་ལྟར་ཉི་ཧོང་གི་གྲོས་ཚོགས་འཐུས་མི་རྣམ་པས་ཀྱང་རྒྱུན་སྐྱོང་གིས་བོད་དོན་ཆེད་དུ་རྒྱབ་སྐྱོར་གནང་ངེས་ཡིན། ཞེས་གསུངས།
སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས། བོད་མི་མང་སྤྱི་འཐུས་ལྷན་ཚོགས་ཀྱི་གོ་སྒྲིག་འོག་ཨ་རིའི་རྒྱལ་ས་ཝ་ཤིན་ཌོན་དུ་ཕྱི་ལོ་ ༢༠༢༢ ཟླ་ ༦ ཚེས་ ༢༢ ནས་ ༢༣ བར་ཉིན་གྲངས་གཉིས་རིང་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པ་ཚོགས་པའི་སྐོར་དང་། ཉི་ཧོང་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཤི་མོ་མུ་ར་ཧ་ཀུ་བྷུན་ (Shimomura Hakubun) མཆོག་གིས་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པའི་ཐོག་གསུང་འཕྲིན་གནང་ཡོད་པ་མ་ཟད། བརྙན་ཐུང་བརྒྱུད་གསུང་བཤད་ཀྱང་གནང་ཡོད་པའི་སྐོར་གསུངས།
མཐར་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་དྲུང་ཆེ་ཨི་ཤཱི་ཀ་ཝ་ཨ་ཀི་མ་ས་ལགས་ལ་ཉི་ཧོང་སྐད་དུ་ཕབ་བསྒྱུར་ཞུས་པའི་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པ་ཚོགས་པའི་སྐོར་སྙན་ཐོ་དང་དྲན་རྟེན་ཕྱག་རྟགས་ཕུལ་གནང་ཡོད། སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་དང་ལྷན་དུ་ཉི་ཧོང་སྐུ་ཚབ་དོན་གཅོད་ཁང་གི་འབྲེལ་ཡོད་ལས་བྱེད་ཚེ་ལྷ་ལགས་ལྷན་བཅར་ཞུས་ཡོད་པ་བཅས།།
