༄༅། །ཕྱི་ལོ་ ༢༠༢༢ ཟླ་བ་ ༠༧ ཚེས་ ༡༠ ཉིན་ཉི་ཧོང་གནས་སྡོད་བོད་མི་རྣམས་ཀྱིས་བཀྲ་ཤིས་བདེ་ལེགས་ཟ་ཁང་དུ་སྐུའི་འཁྲུངས་སྐར་སྲུང་བརྩི་ཞུས་འདུག

དེ་ཡང་སྐུའི་འཁྲུངས་སྐར་གྱི་མཛད་སྒོར་ཉི་ཧོང་སྐུ་ཚབ་དོན་ཁང་གི་ཚེ་ལྷ་ལགས་མཉམ་ཞུགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཆོད་མེ་དང་མཇལ་དར་ཕུལ་བ་མ་ཟད། མཛད་སྒོ་གོ་སྒྲིག་གནང་མཁན་བཀྲ་ཤིས་བདེ་ལེགས་ཟ་ཁང་ལའང་ཐུགས་རྗེ་ཆེ་ཞུས་འདུག དེ་བཞིན་ཚེ་ལྷ་ལགས་ཀྱིས་བོད་དོན་རྒྱབ་སྐྱོར་བ་ཉི་ཧོང་གི་སྲིད་བློན་ཟུར་པ་སྐུ་ཞབས་ཤིན་ཛོ་ཨ་བྷེ་མཆོག་ལྐོག་གསོད་ལ་བརྟེན་འདས་གྲོངས་སུ་གྱུར་བར་ཐུགས་ཕམ་དང་། བོད་མིའི་སྒྲིག་འཛུགས་ངོས་ནས་ཁོང་གི་ལྟོས་ཤུལ་ནང་མི་ཡོངས་ལ་ཐུགས་གསོ་ཞུས་ཡོད་པའི་ཁར། ཀྲོག་ཡོར་ཡོད་པའི་བོད་མི་རྣམས་ཀྱིས་རིང་མིན་མཆོད་འབུལ་སྨོན་ལམ་འཚོག་རྒྱུ་ཡིན་སྐོར་གསུངས་འདུག །ཕྱོགས་མཚུངས་ཁོང་གིས་ཏོག་དབྱིབས་གཉན་རིམས་ཁྱབ་གདལ་དབང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གཞུང་འབྲེལ་འཁྲུངས་སྐར་མཛད་སྒོ་ཕྱི་སྣུར་གནང་ཡོད་པའི་གསལ་བཤད་ཀྱང་གནང་འདུག །

སྐབས་དེར་མཛད་སྒོ་གོ་སྒྲིག་པ་དང་བཀྲ་ཤིས་བདེ་ལེགས་ཟ་ཁང་གི་སྦྱིན་བདག་བློ་བཟང་ཡེ་ཤེས་ལགས་ཀྱིས་སྐུ་མགྲོན་རྣམས་པར་ཕེབས་བསུ་དང་སྦྲགས། སྐུའི་འཁྲུངས་སྐར་དུས་ཆེན་དང་ཁོང་གི་ཟ་ཁང་བཙུགས་ནས་ལོ་ངོ་བདུན་ཧྲིལ་པོ་འཁོར་བ་གཉིས་དུས་ཚིགས་གཅིག་ལ་ཁེལ་ཡོད་པའི་སྐོར་གསུངས། མཐར་བོད་ཀྱི་ཟློས་གར་ཚོགས་པའི་སྒྱུ་རྩལ་བ་ཟུར་པ་བསྟན་འཛིན་ཀུན་བཟང་ལགས་དང་བསྟན་འཛིན་རྒན་དབྱངས་ལགས། དེ་བཞིན་ཉི་ཧོང་གི་སྒྱུ་རྩལ་བ་ཁག་གཅིག་ནས་བོད་ཀྱི་སྲོལ་རྒྱུན་གཞས་སྣ་གཟིགས་འབུལ་ཞུས་ཏེ་མཛད་སྒོ་ལེགས་པར་གྲོལ་འདུག་པ་བཅས།།