༄༅། །ཕྱི་ལོ་ ༢༠༢༢ ཟླ་བ་ ༠༧ ཚེས་ ༡༧ ཉིན་ཉི་ཧོང་གནས་སྡོད་བོད་མི་རྣམས་ཀྱིས་ཉི་ཧོང་སྲིད་བློན་ཟུར་པ་ཚེ་འདས་སྐུ་ཞབས་ཤིན་ཛོ་ཨ་བྷེ་ལགས་ཀྱི་ཆེད་དུ་མཆོད་འབུལ་སྨོན་ལམ་ཞིག་གོ་སྒྲིག་གནང་འདུག 

སྐབས་དེར་ཉི་ཧོང་སྐུ་ཚབ་དོན་ཁང་གི་དྲུང་ཆེ་བཀྲ་ཤིས་དབྱངས་འཛོམས་ལགས་ཀྱིས་སྲིད་བློན་ཟུར་པ་ཤིན་ཛོ་ཨ་བྷེ་ལགས་རྐྱེན་ངན་དབང་གིས་འདས་གྲོངས་སུ་གྱུར་བར་མྱ་ངན་གུས་འདུད་ཞུས་པ་དང་སྦྲགས་ཁོང་སྐུ་ཚེ་མ་བརྟན་པ་ནི་ཉི་ཧོང་ཙམ་མ་ཡིན་པར་འཛམ་གླིང་སྤྱི་ལ་གྱོང་གུན་ཆེན་པོ་ཡིན་པ་གསུངས། དེ་བཞིན་ཁོང་མོས་སྐུ་ཞབས་ཨ་བྷེ་ལགས་ཀྱི་མང་གཙོའི་འཆར་སྣང་དང་བོད་མིའི་རང་དབང་འཐབ་རྩོད་ལ་རྒྱབ་སྐྱོར་གཡོ་མེད་གནང་བ་རྣམས་དྲན་གསོ་གནང་བ་སྦྲགས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འདས་པོའི་ནང་མི་ཉེ་འབྲེལ་རྣམས་ལ་སྩལ་བའི་ཐུགས་གསོའི་གསུང་འཕྲིན་སྒྲོགས་སྦྱང་གནང་འདུག ཉི་ཧོང་བོད་རིགས་ཚོགས་པའི་ཚོགས་གཞོན་བསོད་ནམས་ཚེ་རིང་ལགས་ཀྱིས་དུས་མིན་རྐྱེན་ངན་དབང་གིས་སྲིད་བློན་ཟུར་པ་ཨ་བྷེ་ལགས་ཀྱི་སྐུ་ཚེའི་འཕེན་པ་རྫོགས་པར་མྱ་ངན་ཞུ་བཞིན་ཉི་ཧོང་གནས་སྡོད་བོད་མི་རྣམས་རྐྱེན་ངན་དེར་ཧོན་འཐོར་ཏེ་མྱ་ངན་གུས་འདུད་ཞུ་གི་ཡོད་ཅེས་གསུངས།

ཉི་ཧོང་སྐུ་ཚབ་དོན་ཁང་གི་ཚེ་ལྷ་ལགས་དང་ཧ་སི་གྷ་ཝ་ལགས་གཉིས་ནས་ཕྱི་ཚེས་ ༡༡ ཉིན་འདས་པོའི་ཕུང་པོར་མེ་ཏོག་ཞག་འཁོར་གཡོག་ཅིང་། དེ་རྗེས་ཉི་ཧོང་སྲིད་བློན་མཆོག་གི་ལས་ཁུངས་སུ་ཆེད་བཅར་གྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག  ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་བཅས་ཀྱིས་གནང་བའི་ཐུགས་གསོའི་གསུང་འཕྲིན་རྣམས་ཕུལ་འདུག 

མཆོད་འབུལ་སྨོན་ལམ་སྐབས་ཚོགས་བཅར་བ་རྣམས་ཀྱིས་སྒྲོལ་མ་དང་། ཤེས་རབ་སྙིང་པོ། སྤྱན་རས་གཟིགས་ཀྱི་གཟུངས་བསྔགས་གསུང་འདོན་གནང་འདུག་ཅིང་། ས་གནས་སུ་ཏོག་དབྱིབས་གཉན་རིམས་ཀྱི་བཀག་རྒྱའི་དབང་གིས་གཞུང་ཁྲིམས་དང་མཐུན་པའི་སྒོ་ནས་མི་མང་ཚད་ངེས་ཅན་ཚང་འཛོམས་ཐོག་སྨོན་ལམ་གོ་སྒྲིག་གནང་འདུག་པ་བཅས།།