༄༅། །༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་ ༼ དགེ་འདུན་ཆོས་ཀྱི་ཉི་མ། ༽ མཆོག་གིས་དབུས་བོད་ནང་གི་བོད་མི་ཆབ་སྲིད་བཙོན་པ་རྣམས་གློད་བཀྲོལ་ཡོང་ཆེད་གདན་ས་བཀྲ་ཤིས་ལྷུན་པོའི་མཁན་པོ་གཟིག་རྒྱབ་རིན་པོ་ཆེ་མཆོག་དང་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་བོད་དོན་ཞུ་གཏུག་ཚན་པའི་འགན་འཛིན་འབྲུག་བསྟན་སྐྱིད་ལགས་རྣམ་གཉིས་ཀྱིས་བེལ་ཇམ་ནང་གནད་ཡོད་མི་སྣ་རྣམས་ལ་མཇལ་འཕྲད་ཀྱིས་ཞུ་གཏུག་གི་ལས་འགུལ་སྤེལ་དང་སྤེལ་མུས་ཡིན།

དེ་ཡང་གདན་ས་བཀྲ་ཤིས་ལྷུན་པོའི་མཁན་པོ་གཟིག་རྒྱབ་རིན་པོ་ཆེ་མཆོག་གིས་ཡུ་རོབ་གྲོས་ཚོགས་ནང་སྭི་ཌན་ནས་ཡིན་པའི་ཡུ་རོབ་གྲོས་ཚོགས་འཐུས་མི་ལྕམ་སྐུ་ཨི་ཝིན་ (Evin Incir) ལགས་དང་མཇལ་འཕྲད་གནང་སྟེ་ཞུ་ཡིག་དོན་ཚན་ལྔའི་སྐོར་འགྲེལ་བརྗོད་ཞུས་གནང་ཡོད་པ་དང་། སྐབས་དེར་ཡུ་རོབ་གྲོས་ཚོགས་འཐུས་མི་ལྕམ་སྐུ་ཨི་ཝིན་ལགས་ཀྱིས་གདུང་ཤུགས་དྲག་པོའི་སྒོ་ནས་རྒྱ་ནག་གཞུང་གིས་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་བཙན་འཕྲོག་བྱས་པ་ནས་བཟུང་ད་བར་རིན་པོ་ཆེ་མཆོག་ལོ་ངོ་ ༢༧ རིང་གར་སོང་ཆ་མེད་དུ་གྱུར་ཡོད་པས་རྒྱ་ནག་གཞུང་ཁུ་སིམ་པོར་སྡོད་ཐབས་རྩ་བ་ནས་མེད་ཅེས་གསུངས་ཡོད།གཞན་ཡང་གཟིག་རྒྱབ་རིན་པོ་ཆེ་མཆོག་གིས་ཨི་ཊ་ལཱི་ནས་ཡིན་པའི་ཡུ་རོབ་གྲོས་ཚོགས་འཐུས་མི་སྐུ་ཞབས་ཨན་ཌི་རི་ཡ་ཁོ་ཛོ་ལི་ནོ་ (Andrea Cozzolino) ལགས་དང་། ཡུ་རོབ་གྲོས་ཚོགས་འཐུས་མི་སྐུ་ཞབས་མེ་སི་མོ་ཁེ་སི་ཊལ་ཌོ་ (Massimo Castaldo) ལགས། ཡུ་རོབ་གྲོས་ཚོགས་འཐུས་མི་ལྕམ་སྐུ་ལི་ཝི་ཡ་ཇེ་རོ་ཀཱ་ (Livia Jaroka) ལགས་བཅས་དང་མཇལ་འཕྲད་ཀྱིས་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་ ༼ དགེ་འདུན་ཆོས་ཀྱི་ཉི་མ། ༽ མཆོག་གིས་དབུས་བོད་ཀྱི་ཆབ་སྲིད་བཙོན་པ་རྣམས་གློད་བཀྲོལ་དགོས་པའི་ཞུ་གཏུག་གནང་ཡོད། ཡུ་རོབ་གྲོས་ཚོགས་འཐུས་མི་རྣམ་པས་ཡུ་རོབ་གྲོས་ཚོགས་ནང་བོད་ཀྱི་ཆབ་སྲིད་བཙོན་པ་རྣམས་གློད་བཀྲོལ་ཡོང་ཐབས་སྐོར་གླེང་སློང་གནང་རྒྱུའི་ཞལ་བཞེས་གནང་ཡོད། གཟིག་རྒྱབ་རིན་པོ་ཆེ་མཆོག་དང་ལྷན་བེལ་ཇམ་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་ལྷན་བཅར་ཞུས་ཡོད་པ་བཅས།།