༄༅། །༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་ ༼ དགེ་འདུན་ཆོས་ཀྱི་ཉི་མ། ༽ མཆོག་གིས་དབུས་བོད་ནང་གི་བོད་མི་ཆབ་སྲིད་བཙོན་པ་རྣམས་གློད་བཀྲོལ་ཡོང་ཆེད་གདན་ས་བཀྲ་ཤིས་ལྷུན་པོའི་མཁན་པོ་གཟིག་རྒྱབ་རིན་པོ་ཆེ་མཆོག་གིས་ཅེཀ་སྤྱི་མཐུན་རྒྱལ་ཁབ་ཀྱི་སྲིད་བློན་གཞོན་པ་སྐུ་ཞབས་ཨི་ཝན་བྷར་ཊོ་སི་ (H.E. Ivan Bartos) མཆོག་དང་མཇལ་འཕྲད་གནང་སྟེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་ཟུར་པ་འདས་པོ་དམ་པ་སྐུ་ཞབས་ཝག་ལེབ་ཧ་ཝེལ་(Vaclav Havel) མཆོག་དབར་དམིགས་བསལ་གྱི་འབྲེལ་བ་གཏིང་ཟབ་ཡོད་པའི་སྐོར་དྲན་གསོ་དང་། ཞུ་ཡིག་དོན་ཚན་ལྔ་ཅན་ཕུལ་གནང་ཡོད།

སྐབས་དེར་གཟིག་རྒྱབ་རིན་པོ་ཆེ་མཆོག་གིས་སྐུ་ཞབས་ཨི་ཝན་བྷར་ཊོ་སི་མཆོག་ལ་ཅེཀ་སྤྱི་མཐུན་རྒྱལ་ཁབ་ནི། ད་ལྟའི་ཆར་ཡུ་རོབ་སྤྱི་མཐུན་ཚོགས་པའི་གཙོ་འཛིན་ཡིན་པའི་ཆ་ནས་ཞུ་ཡིག་དོན་ཚན་ལྔར་དགོངས་བཞེས་གནང་དགོས་པའི་རེ་སྐུལ་ཤུགས་ཆེ་ཞུས་གནང་ཡོད།  ཅེཀ་སྤྱི་མཐུན་རྒྱལ་ཁབ་ཀྱི་སྲིད་བློན་གཞོན་པ་སྐུ་ཞབས་ཨི་ཝན་བྷར་ཊོ་སི་མཆོག་གིས་གཟིག་རྒྱབ་རིན་པོ་ཆེ་མཆོག་གི་ཞུ་སྐུལ་ལ་གདུང་སེམས་མཉམ་སྐྱེ་དང་ཐུགས་ཞིབ་ཟབ་མོ་གནང་སྟེ་ཡུ་ཀེ་རེན་ནང་གི་དཀའ་ངལ་དང་། ཡུ་རོབ་ཀྱི་རྒྱ་ནག་ལ་ལྟ་སྟངས་འགྱུར་བ་འགྲོ་བཞིན་ཡོད་པ་བཅས་ལ་བརྟེན་ནས་འཛམ་གླིང་སྤྱིའི་དབང་འཛིན་སྒྲིག་འཛུགས་ཀྱང་འགྱུར་བ་འགྲོ་བཞིན་པའི་སྐོར་འགྲེལ་བརྗོད་གནང་བ་མ་ཟད། ཞུ་ཡིག་དོན་ཚན་ལྔ་དང་འབྲེལ་བའི་གནད་དོན་ཐད་གང་ཐུབ་ཀྱིས་རྒྱབ་སྐྱོར་དང་རོགས་རམ་གནང་རྒྱུའི་ཞལ་བཞེས་གནང་ཡོད།

གོ་སྐབས་དེ་དང་བསྟུན་ནས་བེལ་ཇམ་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་དང་། ཕྱི་དྲིལ་བོད་དོན་ཞུ་གཏུག་ཚན་པའི་འགན་འཛིན་འབྲུག་བསྟན་སྐྱིད་ལགས་རྣམ་གཉིས་ཀྱིས་སྐུ་ཞབས་ཨི་ཝན་བྷར་ཊོ་སི་མཆོག་ལ་བཀའ་ཤག་སྐབས་བཅུ་དྲུག་པས་འབྱུང་འགྱུར་འཛིན་སྐྱོང་གནང་སྟངས་དྲ་རྒྱ་བརྒྱུད་གནང་རྒྱུ་ཡིན་པའི་སྐོར་དང་། བོད་མིའི་སྒྲིག་འཛུགས་ཀྱི་ལས་བྱེད་ཁག་གཅིག་ཡུ་རོབ་ཀྱི་རྒྱལ་ཁབ་ཨེསྚོ་ནི་ཡཱ་ནང་དྲ་རྒྱ་བརྒྱུད་འཛིན་སྐྱོང་བྱེད་སྟངས་སྐོར་སློབ་སྦྱོད་བྱེད་དུ་ཕེབས་པའི་སྐོར་སྙན་སྒྲོན་ཞུས་གནང་ཡོད།

ཐེངས་འདིའི་ཞུ་གཏུག་གི་ལས་འགུལ་ཆེད་དུ་ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་མེ་ཀུ་ལ་སི་པེག་ས་ (Mikulas Peksa) ལགས་དང་། ཁོང་གི་ལས་ཁུངས་ནས་མཐུན་འགྱུར་རོགས་རམ་གནང་ཡོད་པ་བཅས།།