༄༅། །འདི་གར་ཀུལླུ་མ་ནཱ་ལི་བོད་མིའི་ས་གནས་འགོ་འཛིན་ལས་ཁང་ནས་བཏང་གནས་ནང་འཁོད་དོན། དཔལ་ལྡན་འོན་མངའ་རིས་གྲྭ་ཚང་ནས་ཇི་ལྟར་གསོལ་བ་འདེབས་པ་བཞིན་ཕྱི་ལོ་ ༢༠༢༢ ཟླ་བ་ ༠༦ ཚེས་ ༢༢ ནས་ ༣༠ བར་ཀུལླུ་མ་ནཱ་ལི་ས་གནས་སུ་༸སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་༸རྗེ་བཙུན་བསྟན་འཛིན་ཆོས་ཀྱི་རྒྱལ་མཚན་དཔལ་བཟང་པོ་མཆོག་གིས་འོན་མངའ་རིས་གྲྭ་ཚང་དུ་དགེ་ཚུལ་གྱི་སྡོམ་པ་འབོག་ཆོག་དང་། ཕྱི་ཚེས་ ༢༧ ཉིན་སཾ་བྷོ་ཌའི་སློབ་གྲྭ་དང་། དཔལ་རབ་གླིང་བོད་མིའི་གཞིས་ཆགས་སུ་གདན་ཞུས་ཀྱིས་སཾ་བྷོ་ཌ་ཉིན་སློབ་དང་། ཀེ་ལཤ་བྷོ་ཌི་སློབ་གྲྭའི་དགེ་ལས་སློབ་ཕྲུག་ཡོངས། མི་མང་བཅས་ལ་བཀའ་སློབ་ཟབ་རྒྱས་གནང་ཡོད། ཕྱི་ཚེས་ ༢༨ ཉིན་དགོན་སྡེ་ཁག་གི་ལས་སྣེ་དང་རིས་མེད་གྲྭ་བཙུན། ས་གནས་འགོ་འཛིན་གྱིས་གཙོས་པའི་ས་གནས་ཀྱི་ལས་ཀྱི་སྣེ་མོ་བ་རྣམ་པ། ཧི་མ་ལ་ཡ་ཚོགས་པའི་འགན་འཛིན་རྣམ་པ། གཞུང་དང་གཞུང་ཁོངས་མིན་པའི་ཚོགས་པ་ཁག་གི་ཚོགས་གཙོ་རྣམ་པ། གཞིས་མི་དང་ཡུལ་མི་དད་ལྡན་པ་རྣམས་ལ་བླ་མ་དྷརྨ་རཀྴི་ཏས་མཛད་པའི་ཐེག་པ་ཆེན་པོའི་བློ་སྦྱོང་མཚོན་ཆ་འཁོར་ལོའི་གསུང་ཆོས་བཀའ་དྲིན་བསྐྱངས།ཕྱི་ཚེས་ ༢༩ ཉིན་སྒྲོལ་དཀར་ཡིད་བཞིན་འཁོར་ལོའི་བཀའ་དབང་གནང་རྗེས་མང་ཚོགས་ལ་གཙོ་བོ་བོད་པའི་ཆོས་དང་རིག་གཞུང་གཅེས་འཛིན་གནང་དགོས་པའི་སྐོར་དང་། བོད་ཀྱི་སྐད་ཡིག་སྦྱོང་དགོས་པ་ནི་དགེ་མཚན་ཆེ་སྐོར། དེ་བཞིན་བོད་རིགས་ནང་ཕན་ཚུན་དང་། ཧི་མ་ཡ་དང་བོད་མི་ཕན་ཚུན་དབར་འཆམ་མཐུན་དགོས་པ་སོགས་ཀྱི་གསུང་བཤད་ཟབ་མོ་ཕེབས་པ་དང་། ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལས་བཀའ་དྲིན་ཆེ་བ་ཞིག་བྱུང་མེད་པ་དང་། མགོན་པོ་གང་ཉིད་ཀྱི་བཀའ་སློབ་ལམ་སྟོན་གང་གནང་བ་རྣམས་ཀྱི་ཐོག་ལ་འབད་རྩོལ་ཡོང་བ་བཅས་ཀྱི་གསུང་བཤད་ཟབ་རྒྱས་གནང་ཡོད། མདོར་ན་ས་གནས་ཀྱི་སེར་སྐྱ་མི་མང་རྣམས་དགའ་དད་སྤྲོ་གསུམ་གྱི་སྒོ་ནས་འདོད་བློ་འཚིམ་པ་བྱུང་ཡོད་པ་བཅས། །