༄༅། །བོད་ཀྱི་དུས་བབ་གསར་ཁང་ནས་གནས་ཚུལ་སྤེལ་བ་ལྟར་ན། བོད་དཀར་མཛེས་རྫོང་ཉེན་རྟོག་པ་ཁག་གཅིག་གིས་རང་ལོ་ ༦༠ ཙམ་ཡིན་པའི་བོད་མི་ཞིག་གི་ཁྱིམ་དུ་འཛུལ་ཏེ་༸གོང་ས་མཆོག་གི་སྐུ་པར་བཙན་འཁྱེར་བྱས་ཡོད་པ་མ་ཟད། ཁོང་རང་ཡང་རྫོང་ཉེན་རྟོག་ཁང་དུ་བཙན་ཁྲིད་བྱས་ཏེ་གཅར་རྡུང་དྲག་པོ་བཏང་ཡོད་འདུག
བོད་ཀྱི་དུས་བབ་གསར་ཁང་ལ་བོད་ནས་གནས་ཚུལ་འབྱོར་བ་ལྟར་ན། ཟླ་སྔོན་མའི་ནང་དཀར་མཛེས་རྫོང་གི་ཉེན་རྟོག་པ་ཁག་གཅིག་གློ་བུར་དུ་བོད་མི་ཞིག་གི་ཁྱིམ་དུ་བསླེབས་ཏེ། ཁོང་གི་ཁྱིམ་དུ་༸གོང་ས་མཆོག་གི་སྐུ་པར་ཆེན་པོ་ཞིག་བཤམས་ཡོད་པ་དེ་བཙན་འཁྱེར་བྱས་ཡོད་པ་མ་ཟད། ཁོང་ཡང་འཛིན་བཟུང་བྱས་ཏེ་རྫོང་ཉེན་རྟོག་ཁང་དུ་འཁྲིད་ཡོད་འདུག
ཡང་གནས་ཚུལ་མཁོ་སྤྲོད་པས། དང་ཐོག་བཙན་ཁྲིད་བྱེད་སྐབས་ཁོང་བདེ་པོ་ཐང་པོ་ཡོད་ཀྱང་། བཀག་ཉར་ཁང་དུ་ཁོང་ལ་ཉེས་མེད་ཉེས་འཛུགས་ཀྱིས་གཅར་རྡུང་དྲག་པོ་བཏང་བར་བརྟེན། བར་ལམ་ནས་སྨན་ཁང་དུ་འཁྲིད་དགོས་བྱུང་འདུག་ཀྱང་། ནད་མནར་ཅི་བྱུང་གི་གནས་ཚུལ་གང་ཡང་ཁྱིམ་མི་ཚོར་འགྲེལ་བརྗོད་བྱས་མི་འདུག་ལ། སྨན་ཁང་དུ་བསྟན་རྗེས་ཕྱིར་ཉེན་རྟོག་ཁང་དུ་ཁྲིད་ཡོད་ཀྱང་དེ་ནས་བཟུང་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་སྐོར་བརྗོད་བྱུང་།
