༄༅། །བྱང་ཨ་རི་སྐུ་ཚབ་དོན་ཁང་དང་། རྒྱལ་སྤྱིའི་བོད་དོན་ལས་འགུལ་ཁང་། ཨ་རི་རྒྱལ་ས་ཁུལ་གྱི་བོད་རིགས་སྤྱི་མཐུན་ཚོགས་པ་བཅས་ཐུང་མོང་གི་གོ་སྒྲིག་འོག་ཕྱི་ལོ་ ༢༠༢༢ ཟླ་བ་ ༠༧ ཚེས་ ༠༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༧ ལ་ཕེབས་པའི་སྐུའི་འཁྲུངས་སྐར་སྲུང་དུས་ཆེན་བརྩི་གཟབ་རྒྱས་ཞུས་ཡོད། 

དེ་ཡང་མཛད་སྒོའི་སྐུ་མགྲོན་གཙོ་བོར་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ཨ་ཛ་ར་ཛེ་ཡ་མཆོག་དང་། དམིགས་བསལ་སྐུ་མགྲོན་དུ་ཅེག་སྤྱི་མཐུན་རྒྱལ་ཁབ་ཀྱི་གཞུང་ཚབ་ཧེ་ནག་མོ་ནི་སེག་ (Hynek Kmonicek) ལགས་དང་། སྐྱབས་རྗེ་ཀིརྟི་རིན་པོ་ཆེ་མཆོག་ཕེབས་ཡོད། བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་མཆོག་གྲུབ་ལགས་ཀྱིས་སྐུ་མགྲོན་རྣམས་ལ་ཕེབས་བསུའི་འཚམས་འདྲི་ཞུས་པ་འབྲེལ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་གནང་དོན་ལྟར་འགྲོ་བ་མི་རིགས་གཅིག་གྱུར་གྱི་འདུ་ཤེས་དང་། བྱམས་སྙིང་རྗེ་གོང་མཐོར་གཏང་རྒྱུ་སོགས་ནི་དེང་སྐབས་སྔར་ལྷག་དགོས་མཁོ་ཆེ་ཆེར་གྱུར་ཡོད་སྐོར་སོགས་ངོ་སྤྲོད་གནང་ཡོད།སྐབས་དེར་ལྕམ་སྐུ་ཨ་ཛ་ར་ཛེ་ཡ་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་ལ་འཚམས་འདྲི་དང་སྦྲགས། ཉེ་ལམ་ཁོང་མོས་གོང་པོ་གང་ཉིད་མཆོག་དང་མཇལ་འཕྲད་ཞུས་པའི་སྐོར་དང་། བོད་མིའི་འགྲོ་བ་མིའི་ཐོབ་ཐང་དང་ཆོས་དད་རང་དབང་སྲུང་སྐྱོབ་ཆེད་སྐུ་ལས་སྐྱོན་རྒྱུ་ཡིན་སྐོར་འགྲེལ་བརྗོད་གནང་ཡོད། ཅེག་སྤྱི་མཐུན་རྒྱལ་ཁབ་ཀྱི་གཞུང་ཚབ་ཀྱིས་བོད་དང་ཅེག་སྤྱི་མཐུན་རྒྱལ་ཁབ་གཉིས་ཀ་སྟོབས་ཆེན་རྒྱལ་ཁབ་ཀྱི་ཁྱིམ་མཚེས་ཡིན་པར་བརྟེན་ལོ་རྒྱུས་ཀྱི་མྱོང་བ་ཐུན་མོང་ཡོད་སྟབས། ཅེག་སྤྱི་མཐུན་རྒྱལ་ཁབ་ཀྱིས་བོད་མིར་རྒྱབ་སྐྱོར་དང་འབྲེལ་བ་དམ་པོ་ཉར་ཡོད་པའི་སྐོར་དང་། དེ་བཞིན་ཁོང་རང་ཉིད་རྒྱ་གར་དུ་ཅེག་སྤྱི་མཐུན་རྒྱལ་ཁབ་ཀྱི་གཞུང་ཚབ་གནང་སྐབས་མགོན་པ་གང་ཉིད་མཆོག་དང་ཕྱི་འབྲེལ་ཐོག་ནས་འབྲེལ་བ་ཇི་བྱུང་དྲན་གསོ་གནང་། དམིགས་བསལ་སྐུ་མགྲོན་སྐྱབས་རྗེ་ཀིརྟི་རིན་པོ་མཆོག་གིས་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ཨ་ཛ་ར་ཛེ་ཡ་མཆོག་གིས་གཙོས་ཚོགས་སུ་ཕེབས་པའི་གནད་ཡོད་མི་སྣ་རྣམས་ནས་བོད་དོན་ལ་རྒྱབ་སྐྱོར་གནང་བར་བཀའ་དྲིན་རྗེས་དྲན་ཞུས་པ་དང་ཆབས་ཅིག བོད་ནང་བོད་མི་རྣམས་ཀྱི་མངོན་འདོད་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་རྒྱུར་མུ་མཐུད་རྒྱབ་སྐྱོར་གནང་སྐྱོང་ཡོང་བའི་རེ་སྐུལ་གནང་ཡོད་པ་རེད། འཁྲུངས་སྐར་གྱི་མཛད་སྒོའི་ཐོག་གཞན་ཡང་བཀའ་ཟུར་བཀྲས་ཐོང་བསྟན་འཛིན་རྣམ་རྒྱལ་ལགས་དང་། ཤིང་བཟའ་རིན་པོ། ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་གི་ལས་བྱེད་བགྲེས་པ་མཧི་ཀལ་ཤུ་ཕར་ (Michael Schiffer) ལགས། ཨ་རིའི་རོགས་ཚོགས་ཀྱི་ཨེ་ཤི་ཡ་ཁུལ་གྱི་འགན་འཛིན་ཨན་ཇ་ལི་ཀོར་ལགས། ཕྱི་སྲིད་ལྷན་ཁང་གི་ལས་བྱེད། བོད་དོན་རྒྱབ་སྐྱོར་བ་སོགས་མཉམ་ཞུགས་གནང་ཡོད། རྒྱལ་སྤྱིའི་བོད་དོན་ལས་འགུལ་ཁང་གི་བར་རྒལ་འགན་འཛིན་གཞོན་པ་བསྟན་ཆོས་རྒྱ་མཚོ་ལགས་ཀྱིས་མཛད་སྒོའི་མདོ་འཛིན་པ་གནང་ཞིང་། བོད་ཀྱི་ཟློས་གར་ཚོགས་མི་ཟུར་པ་ཀརྨ་རྒྱ་མཚོ་ལགས་དང་། གཞས་པ་ཟླ་བ་རིན་ཆེན་ལགས་ཀྱིས་༸གོང་ས་མཆོག་ལ་བཀའ་དྲིན་རྗེས་དྲན་མཚོན་ཆེད་གསུང་གཞས་རེ་འབུལ་ལམ་ཞུས་ཏེ་མཛད་སྒོ་བཀྲ་ཤིས་ལོ་ལེགས་ངང་གྲོལ་ཡོད་པ་བཅས།།