༄༅། །བོད་མིའི་སྒྲིག་འཛུགས་ཀྱི་ལས་བྱེད་འདེམས་བསྐོ་ལྷན་ཁང་གི་གོ་སྒྲིག་འོག་ཕྱི་ལོ་ ༢༠༢༢ ཟླ་ ༧ ཚེས་ ༡༨ ཉིན་ནས་འགོ་བཙུགས་ཀྱིས་ཉིན་གྲངས་དྲུག་རིང་རྒྱ་གར་གྱི་རཱཇསྠན་ (Rajasthan) མངའ་སྡེའི་རྒྱལ་ས་ཇཡ་པུར་ནང་རྟེན་གཞི་བྱས་པའི་རེ་ནེ་སི་ཊི་གསོལ་མགྲོན་ཁང་ (Renest Hotel) གི་ཚོགས་ཁང་དུ་བོད་མིའི་སྒྲིག་འཛུགས་ཀྱི་འགན་འཛིན་སྡེ་ཚན་ཁོངས་ཀྱི་སྲི་ཞུའི་ལས་བྱེད་གྲངས་ ༢༥ ལ་འགོ་ཁྲིད་ཟབ་སྦྱོང་དེ་ཉིད་ཕྱི་ཚེས་ ༢༣ ཉིན་མཇུག་སྡོམ་མཛད་སྒོ་ཚོགས་ཡོད་པ་དང་། མཇུག་སྡོམ་མཛད་སྒོར་ལས་བྱེད་འདེམས་བསྐོ་ལྷན་ཁང་གི་འགན་འཛིན་དཔེ་ཟུར་དབང་འདུས་ཚེ་རིང་ལགས་དང་། འགོ་ཁྲིད་སྦྱོང་བརྡར་བསྟི་གནས་ཁང་ (Synergie HR) ཞེས་པའི་ཁྱད་སྟོན་མི་སྣ་གཙོ་བོ་ཨ་ཤིཤ་ཇོ་རི་ (Dr. Ashish Johri ) ལགས་སོགས་ཕེབས་ཡོད།དེ་ཡང་ལས་བྱེད་འདེམས་བསྐོ་ལྷན་ཁང་གི་འགན་འཛིན་དཔེ་ཟུར་དབང་འདུས་ཚེ་རིང་ལགས་ཀྱིས་ཐེངས་འདིའི་འགོ་ཁྲིད་ཟབ་སྦྱོང་ནང་མཉམ་ཞུགས་གནང་མཁན་ཡོངས་ལ་ལག་འཁྱེར་གནང་ཡོད། ཁྱད་སྟོན་མི་སྣ་གཙོ་བོ་ཨ་ཤིཤ་ཇོ་རི་ (Dr. Ashish Johri ) ལགས་ཀྱིས་བོད་མིའི་སྒྲིག་འཛུགས་ལ་རྗེས་སུ་ཡི་རང་གི་གསུང་བཤད་གནང་བ་དང་། ལས་བྱེད་འདེམས་བསྐོ་ལྷན་ཁང་གི་འབྲེལ་ཡོད་ལས་བྱེད་བཀྲ་ཤིས་བདེ་སྐྱིད་ལགས་ཀྱིས་འགོ་ཁྲིད་ཟབ་སྦྱོང་གི་ལས་གཞི་སྤྱིའི་སྐོར་ངོ་སྤྲོད་གསུང་བཤད་གནང་སྟེ་ཟབ་སྦྱོང་ལེགས་པར་གྲུབ་ཡོད་པ་བཅས།།