༄༅།།འདི་གར་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ ༢༠༢༢ ཟླ་ ༧ ཚེས་ ༡ ཉིན་དཔལ་ལྡན་སྨད་རྒྱུད་གྲྭ་ཚང་གི་གངས་ཅན་རིག་གནས་སློབ་གྲྭའི་ཚོགས་ཁང་དུ་བོད་ཀྱི་སྐད་ཡིག་དང་ནང་དོན་རིག་པའི་ཟབ་ཁྲིད་ཐེངས་དགུ་པའི་དབུ་འབྱེད་མཛད་སྒོ་ཚོགས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༠༠ ཐོག་སྐུ་མགྲོན་གཙོ་བོ་ཆོས་རིག་དྲུང་ཆེ་ཀླུ་ཁྲི་ཚང་འཆི་མེད་ཚེ་དབྱངས་ལགས་དང་དམིགས་བསལ་སྐུ་མགྲོན་སྨད་རྒྱུད་གྲྭ་ཚང་གི་མཁན་རིན་པོ་ཆེ་རྗེ་བཙུན་བསྟན་འཛིན་བཟང་པོ་མཆོག་གིས་དབུས་སྨད་རྒྱུད་གྲྭ་ཚང་གི་བླ་མ་དབུ་མཛད་དགེ་བཤེས་ངག་དབང་སངས་རྒྱས་ལགས། ཧོན་སུར་ས་གནས་ལས་ཁུངས་ཀྱི་ལས་དྲུང་། གངས་ཅན་རིག་གནས་སློབ་གྲྭའི་དགེ་ཆེས་གཙོས་དགེ་ལས་དང་། ཟབ་ཁྲིད་ནང་མཉམ་ཞུགས་བྱེད་མཁན་སློབ་མ་བཅས་ལྷན་འཛོམས་ཀྱིས་ཐོག་མར། སློབ་ཕྲུག་རྣམ་པས་སྣེ་དྲངས་ཏེ་བོད་རྒྱལ་ཁབ་ཆེན་པོའི་རྒྱལ་གླུ་དབྱངས་སུ་གྱེར་གྲུབ་བསྟུན། དགེ་ཆེ་སྔགས་རམས་པ་དགེ་ཡོན་ཏན་ལགས་ཀྱིས་མཛད་སྒོའི་ངོ་སྤྲོད་དང་། དེ་ནས་སློབ་ཕྲུག་རྣམས་ནས་རང་ཉིད་ངོ་སྤྲོད་མདོར་བསྡུས་ཞུས། དེ་རྗེས་རིམ་བཞིན་སྨད་རྒྱུད་གྲྭ་ཚང་གི་མཁན་རིན་པོ་ཆེ་མཆོག་དང་། བླ་མ་དབུ་མཛད། སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་ཆོས་རིག་དྲུང་ཆེ་བཅས་ནས་མཛད་སྒོ་དང་འབྲེལ་བའི་ལམ་སྟོན་གསུང་བཤད་གནང་། མཐར་ཟབ་ཁྲིད་འདིའི་འབྲེལ་ལས་ཀུན་དགའ་བྱམས་པ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ་ཡོད།
ཟླ་དྲུག་བོད་ཀྱི་སྐད་ཡིག་དང་ནང་དོན་རིག་པའི་ཟབ་ཁྲིད་ནི། ཕྱི་ལོ་ ༢༠༡༤ ལོ་ནས་བཟུང་ཆོས་རིག་ལས་ཁུངས་དང་དཔལ་ལྡན་སྨད་རྒྱུད་གྲྭ་ཚང་གི་གངས་ཅན་རིག་གནས་སློབ་གྲྭ་གཉིས་ཟུང་འབྲེལ་གྱི་གོ་སྒྲིག་ཞུས་དང་ཞུ་མུས་སུ་ཡོད་པ་ཞིག་ཆགས་ཡོད། ཟབ་ཁྲིད་འདིའི་དམིགས་ཡུལ་གཙོ་བོ་ནི་མཐོ་སློབ་ཐོན་པའི་སློབ་མ་རྣམས་ལ་བོད་ཀྱི་སྐད་ཡིག་དང་ནང་དོན་རིག་པ་སློབ་ཁྲིད་གནང་རྒྱུ་དེ་ཡིན། དེ་སྔ་ཟབ་ཁྲིད་འདིའི་འགྲོ་གྲོན་ཆོས་རིག་མ་དངུལ་ནས་ནར་གཏོང་གནང་གི་ཡོད་ཀྱང་། འདི་ལོའི་ཟབ་ཁྲིད་དེ་བཞིན་ཨ་རི་ (USAID) རོགས་ཚོགས་ནས་གནང་གཏན་ཁེལ་ཡོད། ཐེངས་འདིའི་ཟབ་ཁྲིད་ཐོག་སློབ་མ་ ༢༥ ནས་མཉམ་ཞུགས་བྱས་ཡོད།
སྤྱིར་རྒྱུད་སྨད་གངས་ཅན་རིག་གནས་སློབ་གྲྭ་འདི་བཞིན་ཐོག་མར་ཕྱི་ལོ་ ༢༠༠༧ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གྲྭ་ཚང་དུ་ཆིབས་སྒྱུར་སྐབས་བཀའ་སློབ་ཕེབས་དགོངས་སུ། དགོན་པའི་གནས་སྟངས་གང་ལེགས་ཆགས་ཡོད་པ་བརྟེན། གྲྭ་ཚང་སློབ་གཉེར་ཁང་འདིའི་ཁོངས་ནས་མི་རིགས་དང་ཕོ་མོ། སྐྱ་སེར་སོགས་ཀྱིས་དབྱེ་བ་མེད་པར་བོད་ཀྱི་ཆོས་དང་རིག་གནས་ལ་དོ་དབྱིངས་དང་འདུན་པ་ཡོད་མཁན་རྣམས་ལ་སློབ་སྦྱོང་བྱེད་སའི་སློབ་གྲྭ་ཞིག་གསར་འཛུགས་ཐུབ་ན་གང་ཅིའི་ཕན་ཐོགས་ཡོང་རྒྱུ་སོགས་ཀྱི་བཀའ་སློབ་ཕེབས་ཡོད་པ་ནི། དགོན་སྡེ་ཞིག་གི་ངོས་ནས་མང་ཚོགས་ལ་བོད་བརྒྱུད་ནང་བསྟན་དང་སྐད་ཡིག་སོགས་སློབ་ཁྲིད་ཀྱི་ཞབས་འདེགས་བསྒྲུབ་རྒྱུའི་དགོངས་བཞེད་ཡོད་པ་ཞིག་རེད་འདུག་ལ། “གངས་ཅན་རིག་གནས་སློབ་གྲྭ” ཞེས་སློབ་གྲྭའི་མཚན་བྱང་འདི་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཞལ་སྔ་ནས་གསོལ་སྩལ་མཛད་པ་ཞིག་རེད་འདུག །
