༄༅། །འདི་གར་སྦེལ་ཇམ་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༠༦ ཚེས་ ༡༨ རེས་གཟའ་སྤེན་པའི་ཉིན་སྦེལ་ཇམ་བོད་རིགས་ཚོགས་པའི་ཤེས་རབ་སྣང་འབྱེད་སློབ་གྲྭ་ནས་གྲོང་ཁྱེར་ཨན་ཊབ་ཏུ་དཔལ་འབྱོར་འདུ་འགོད་ཀྱི་རིག་གཞུང་དགོང་ཚོགས་ཤིག་བསྐོང་ཚོགས་གནང་ཡོད། མཛད་སྒོའི་སྐོུ་མགྲོན་གཙོ་བོར་སྦེལ་ཇམ་སྐུ་ཚབ་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་དང་བོད་རིགས་ཚོགས་པའི་ཚོགས་གཙོ། དེ་བཞིན་སྦེལ་ཇམ་ཁུལ་གྱི་ཚོགས་པ་ཁག་གི་སྐུ་ཚབ་རྣམ་པ་མཉམ་ཞུགས་གནང་ཡོད།དེ་ཡང་མཛད་སྒོའི་ཐོག་མར་སློབ་གྲྭའི་འགན་འཛིན་དང་སྐུ་མགྲོན་རྣམ་པས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེ་བཞུགས་ཁྲིར་གདན་འདྲེན་ཞུས་གྲུབ་བསྟུན། སྦེལ་ཇམ་སྐུ་ཚབ་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་དང་། བོད་རིགས་ཚོགས་པའི་ཚོགས་གཙོ་དཔལ་ལྡན་དོན་གྲུབ་ལགས། ཤེས་རབ་སྣང་འབྱེད་སློབ་གྲྭའི་འགན་འཛིན་བསྟན་འཛིན་དབང་པོ་ལགས་བཅས་ནས་མཎྜལ་རྟེན་གསུམ་འདེགས་འབུལ་ཞུས་ཟིན་འཕྲལ། ༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་མང་ཚོགས་ནས་མཇལ་དར་སྒྲོན་འབུལ་གྱི་ལས་རིམ་དབུ་འཛུགས་གནང་།

དེ་རྗེེས་ཤེས་རབ་སྣང་འབྱེད་གཟའ་མཇུག་སློབ་གྲྭའི་སློབ་ཁག་གཉིས་ཀྱི་སློབ་མ་ཁག་གཅིག་དང་ཟློས་དགེ་ནོར་བུ་ལགས་ནས་ཐོག་མར་བཀྲ་ཤིས་རྟེན་འབྲེལ་མཚོན་ཕྱིར་བཀྲ་ཤིས་ཞོལ་པ་འཁྲབ་སྟོན་གནང་། དེ་ནས་རིམ་པས་སློབ་མ་རྣམས་དང་ཕ་མ་རྣམ་པས་རྐང་བྲོ་གླུ་གཞས་ཀྱི་ལེའུ་རྣམས་གཟིགས་འབུལ་ཞུས་ཡོད། གཞན་ཡང་རོལ་དབྱངས་དགོངས་ཚོགས་འདིར་རྒྱབ་སྐྱོར་མཚོན་ཕྱིར་ཕ་རན་སིར་བཅའ་བཞུགས་བོད་ཀྱི་གཞས་པ་གྲགས་ཆེ་བ་བསྟན་འཛིན་རྒྱལ་པོ་ལགས་ (Michael) དང་ན་གཞོན་གླུ་པ་ངག་དབང་གླིང་དཀྱིལ་ལགས་རྣམ་གཉིས་ནས་ཀྱང་གླུ་གཞས་ཁག་གཅིག་གཟིགས་འབུལ་ཞུས་སོང་།མཛད་སྒོའི་སྐུ་མགྲོན་གཙོ་བོ་སྦེལ་ཇམ་སྐུ་ཚབ་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་ཀྱིས་མང་ཚོགས་ལ་གཏམ་བཤད་གནང་དོན། ཚང་མས་མཁྱེན་ཆུབ་བཞིན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཤེས་ཡོན་སློབ་སྦྱོང་ཟེར་བ་དེ་མིའི་རྣམ་དཔྱོད་ཀྱི་སྒོ་རྒྱ་འབྱེད་པའི་ལྡེ་མིག་ཡིན་ཞེས་དུས་རྟག་ཏུ་གསུང་པ་བཞིན། བཙན་བྱོལ་དུ་གྱར་བའི་རྗེས་སུ་༸གོང་ས་༸སྐྱབས་མགོན་ཆེན་པོ་མཆོག་གིས་ཤེས་ཡོན་དེ་གལ་འགངས་ཆེ་ཤོས་སུ་རྩིས་ནས་བོད་ཕྲུག་གཞོན་སྐྱེས་རྣམས་ལ་ཤེས་ཡོན་གྱི་བསྟི་གནས་ཟུར་འཛུགས་གནང་བ་དེས་ང་ཚོའི་མི་རིགས་འདིའི་ཆོས་དང་རིག་གཞུང་། སྐད་ཡིག་ལ་སོགས་པའི་མེ་ཁ་དེ་གསོས་ཐུབ་པ་བྱུང་བ་རེད། ཕྱི་རྒྱལ་ཡུལ་གྲུ་ཁག་ཏུ་ཡོད་པའི་གཟའ་མཇུག་སློབ་གྲྭ་རྣམས་རིམ་པས་ང་ཚོའི་མི་རིགས་འདིའི་མི་རབས་གསར་པ་རྣམས་ལ་བོད་ཀྱི་ཆོས་དང་རིག་གཞུང་། སྐད་ཡིག བོད་མི་རིགས་ཀྱི་ཐུན་མོང་མ་ཡིན་པའི་ཡ་རབས་བཟང་པོའི་ཡོན་ཏན་རྒྱུད་སྤྲོད་བྱ་སའི་བསྟི་གནས་གལ་ཆེ་ཞིག་ཆགས་ཐུབས་པའི་འགན་འཁྲི་དེ། ང་ཚོ་མི་རེ་ངོ་རེར་ཡོད་ཅིང་། མཐུན་རྐྱེན་བཟང་མིན་ལ་མ་བལྟོས་པར་དང་བླངས་དགེ་ལས་ཡོངས་ནས་ད་བར་སྐུ་ངལ་ཚད་མེད་བསྐྱོན་གནང་བར་རྗེས་སུ་ཡི་རང་དང་། ད་དུང་ཡིན་ཡང་སེམས་ཤུགས་མ་ཆགས་པར་མི་རབས་གསར་པ་རྣམས་འདབས་ཤོག་གཉིས་ལྡན་གྱི་བོད་མི་ཚད་ལྡན་ཞིག་ཡོང་ཐབས་ལ་འབད་བརྩོན་གནང་རོགས་ཞེས་གསུང་བ་དང་སྦྲགས། བོད་མིའི་སྒྲིག་འཛུགས་ཀྱི་ལས་འཆར་གལ་ཆེ་བ་དང་བླངས་བོད་དོན་ཞུ་གཏུག་ལས་འགུལ་ནང་རང་རེའི་གཞོན་སྐྱེས་རྣམས་ངེས་པར་མཉམ་ཞུགས་གནང་གལ་དང་། དེ་བཞིན་རིང་མིན་ཕྱི་ཟླ་ ༧ པའི་ནང་གནང་འཆར་གྱི་མི་འབོར་གྲངས་བཤེར་ནང་སྦེལ་ཇམ་ནང་ཡོད་བོད་མི་ཚང་མས་ངེས་པར་དུ་མཉམ་ཞུགས་གནང་དགོས་པའི་འབོད་སྐུལ་ཡང་གནང་སོང་།སྦེལ་ཇམ་བོད་རིགས་ཚོགས་པའི་ཚོགས་གཙོ་དཔལ་ལྡན་ཚེ་རིང་ལགས་ཀྱིས་དགེ་ལས་སློབ་ཕྲུག་ཡོངས་ལ་འཚམས་འདྲི་དང་སྦྲགས་སྦེལ་ཇམ་ནང་བོད་རིགས་ཚོགས་པའི་གཟིགས་རྟོགས་འོག་ཡོད་པའི་ཤེས་རབ་སྣང་འབྱེད་གཟའ་མཇུག་སློབ་གྲྭ་དང་། ཆོས་རིག་འཛིན་སྐྱོང་ཁང་གི་བཏང་འཛིན་འོག་ཡོད་པའི་འཇམ་དབྱངས་བློ་འཕེལ་གཟའ་མཇུག་སློབ་གྲྭ་གཉིས་ཡོད་ཅིང་། བོད་རིགས་ཚོགས་པའི་ངོས་ནས་སློབ་ཁག་གཉིས་ལ་གཟིགས་ཕྱོགས་གཅིག་མཚུངས་དང་མཐུན་གྱུར་ཞུ་འོས་ཅི་མཆིས་ལ་རྒྱབ་སྐྱོར་ཞུ་རྒྱུ་ཡིན་ཞེས་གསུངས་སོང་།དེ་རྗེས་སྦེལ་ཇམ་བོད་རིགས་ཚོགས་པའི་ཤེས་རབ་སྣང་འབྱེད་སློབ་གྲྭའི་འགན་འཛིན་བསྟན་འཛིན་དབང་པོ་ལགས་ནས། ཤེས་རབ་སྣང་འབྱེད་སློབ་གྲྭའི་དཔལ་འབྱོར་འདུ་འགོད་ཀྱི་རིག་གཞུང་དགོང་ཚོགས་ཉིན་མོ་འདིར། སློབ་གྲྭའི་དགེ་ལས་སློབ་ཕྲུག་ཙམ་མ་ཡིན་པར། སྐུ་མགྲོན་མང་པོ་ཞིག་ཀྱང་ཕེབས་འདུག་སྟབས། རྣམ་པ་ཚོས་ང་ཚོའི་དཔལ་འབྱོར་འདུ་འགོད་ཀྱི་དགོང་ཚོགས་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་ཡིན་ཞེས་དང་། ཐེངས་འདིའི་རོལ་དབྱངས་དགོང་ཚོགས་འདི་མཚན་དཀྱིལ་ཆུ་ཚོད་དང་པོར་མཚམས་འཇོག་ཞུ་རྒྱུ་ཡིན་འདུག །