༄༅། །བོད་མིའི་སྒྲིག་འཛུགས་ཀྱི་སྤྱི་ཁྱབ་རྩིས་ཞིབ་ལས་ཁང་གིས་ཕྱི་ལོ་ ༢༠༢༢ ཟླ་བ་ ༠༦ ཚེས་ ༢༨ ནས་ ༣༠ བར་ཉིན་གྲངས་གསུམ་རིང་རྒྱ་གར་ལྷོ་ཕྱོགས་བྷེང་ལོར་ནང་རྟེན་གཞི་བྱས་པའི་ (Regional Institute of Cooperative Management) དུ་རྩིས་ཞིབ་ལས་བྱེད་ ༡༦ ལ་སྤྱི་མཐུན་མཉམ་ལས་སྟངས་འཛིན་དང་རྩིས་ཁྲའི་ཐོག་ཟབ་སྦྱོང་གོ་སྒྲིག་གནང་ཡོད།

དེ་ཡང་ཟབ་སྦྱོང་གི་དབུ་འབྱེད་མཛད་སྒོའི་སྐུ་མགྲོན་གཙོ་བོར་བྷེང་ལོར་མཉམ་ལས་ཚོགས་པའི་འགན་འཛིན་གཞོན་པ་སྐུ་ཞབས་སི་དཱ་ན་གོ་ད་ནི་ལ་པ་ན་ཝར་ (Siddanagowda B Nellapanavar) ལགས་དང་། (Regional Institute of Cooperative Management) ཞེས་པའི་མཐོ་སློབ་ཀྱི་དབུ་འཛིན་གཞོན་པ་འབུམ་རམས་པ་ར་བི་ཅནྡྲན་ (K. Ravichandran) ལགས། གཞན་ཡང་མཐོ་སློབ་ཀྱི་དགེ་ལས་སློབ་ཕྲུག་བཅས་མཉམ་ཞུགས་གནང་ཡོད་པ་རེད།

ཉིན་གསུམ་གྱི་ཟབ་སྦྱོང་སྐབས་མཉམ་ཞུགས་པ་རྣམས་ལ་ (Primary Agriculture Credit Societies) ཡི་རྩིས་ཁྲ། སྤྱི་མཐུན་མཉམ་ལས་ཚོགས་པ། དངོས་ཟོག་ཞབས་ཞུའི་ཁྲལ། འབབ་ཁྲལ། (EDP)རྩིས་ཁྲ། (KCS) ཁྲིམས་འཆར་གྱི་གལ་གནད་ཆེ་བའི་ཆ་རྐྱེན། རྩིས་དང་རྩིས་ཁྲའི་བསྐྱར་བཅོས་ཁྲིམས་ཡིག་ངོ་སྤྲོད་སོགས་གནང་ཡོད།

རྒྱ་གར་ནང་གི་བཙན་བྱོལ་བོད་མིའི་གཞིས་ཆགས་ཁག་བཅོ་ལྔས་མངའ་སྡེ་སོ་སོའི་སྤྱི་མཐུན་མཉམ་ལས་ཁྲིམས་ཡིག་གཞིར་བཟུང་རྒྱ་གར་ནང་གི་མངའ་སྡེ་དང་དབུས་འཛིན་མངའ་ཁུལ་བརྒྱད་ནང་སྤྱི་མཐུན་མཉམ་ལས་ཚོགས་པ་དབུ་འཛུགས་གནང་ཡོད། སྤྱི་ཁྱབ་རྩིས་ཞིབ་ལས་ཁང་གིས་ཟབ་སྦྱོང་འདི་བརྒྱུད་སྤྱི་མཐུན་མཉམ་ལས་ཀྱི་རྩིས་ཁྲའི་ནུས་ཚད་གོང་མཐོར་གཏང་རྒྱུ་མཚོན། མཉམ་ལས་རྩིས་ཁྲའི་རྩ་འཛིན་གོ་རྟོགས་མཐོ་རུ་གཏང་རྒྱུ། མཉམ་ལས་རྩིས་ཁྲ་དང་འབྲེལ་བའི་ཁྲིམས་ཡིག་དགོངས་དོན་གོ་རྟོགས་སྤེལ་རྒྱུ། མཉམ་ལས་ཁག་གི་རྩིས་དང་སྙན་ཐོའི་སྤུས་ཚད་བཟང་དུ་གཏང་རྒྱུའི་དམིགས་ཚད་བཟུང་ཡོད་པ་བཅས།།།