༄༅། །ཕྱི་ལོ་ ༢༠༢༢ ཟླ་བ་ ༠༦ ཚེས་ ༡༣ ཉིན་བདག་ཅག་གི་སྟོན་པ་ཉམས་མེད་ཤཱཀྱ་ཐུབ་པའི་རིང་བསྲེལ་རྒྱ་གར་ནས་མཁའ་གྲུ་བརྒྱུད་སོག་ཡུལ་ཨུ་ལན་བྷ་ཊོར་ (Ulan Bator) དུ་གདན་འདྲེན་ཞུས་འདུག
དེ་ཡང་གོང་ཚེས་ཉིན་རྒྱ་གར་གཞུང་གི་ཁྲིམས་དོན་བློན་ཆེན་སྐུ་ཞབས་ཀི་རན་རི་ཇི་ཇུ་ (Kiran Rijiju) མཆོག་གིས་སྣེ་ཁྲིད་པའི་རྒྱ་གར་གཞུང་གི་སྐུ་ཚབ་ཚོགས་ཆུང་ལྷན་བཅར་ཐོག་སེར་སྐྱའི་གྲོང་གི་སྟོན་པའི་རིང་བསྲེལ་རྒྱ་གར་གྱི་མཁའ་དམག་གནམ་གྲུའི་ནང་སོག་ཡུལ་དུ་གདན་ཞུས་ཀྱིས་ཉིན་གྲངས་བཅོ་ལྔའི་རིང་དགའ་ལྡན་ཐེག་ཆེན་ཆོས་གླིང་དགོན་པའི་ནང་མི་མང་ལ་མཇལ་ཁའི་ཆེད་འགྲེམས་སྟོན་གནང་གི་འདུག
རྒྱ་གར་གཞུང་གི་ཁྲིམས་དོན་བློན་ཆེན་སྐུ་ཞབས་ཀི་རན་རི་ཇི་ཇུ་མཆོག་གིས་གསུང་དོན་ལ། སྟོན་པའི་རིང་བསྲེལ་སོག་ཡུལ་དུ་གདན་ཞུ་གནང་རྒྱུ་འདི་ནི་རྒྱ་གར་གཞུང་གི་དམིགས་བསལ་རྣམ་འགྱུར་ཞིག་རེད། ཕྲན་དང་མཉམ་དུ་གདན་འདྲེན་ཞུས་པའི་སྟོན་པའི་རིང་བསྲེལ་འདི་མི་མང་གི་མཇལ་ཁའི་ཆེད་འགྲེམས་སྟོན་གནང་རྒྱུ་རེད། སོག་ཡུལ་མི་མང་ནི་རྒྱ་གར་དང་འབྲེལ་བ་དམ་པོ་ཡོད། ཁོང་ཚོས་རྒྱ་གར་ནི་ནང་ཆོས་དང་། ཤེས་རིག་གི་འབྱུང་ཁུངས་སུ་ངོས་འཛིན་གནང་གི་ཡོད་ཅེས་གསུངས་འདུག
སྟོན་པའི་རིང་བསྲེལ་མི་མང་ལ་འགྲེམས་སྟོན་གྱི་དབུ་འབྱེད་མཛད་སྒོ་ས་ག་ཟླ་བའི་ཚེས་བཅོ་ལྔ་ཉིན་ཚོགས་ཡོད་པ་དང་། སྐབས་དེར་སོག་ཡུལ་གྲོས་ཚོགས་ཀྱི་ཚོགས་གཙོ་སྐུ་ཞབས་ཛན་དན་ཤ་ཏར་ (G. ZandanShatar) ལགས་དང་། རིག་གཞུང་བློན་ཆེན་ནོ་མིན་ཆིན་བྷཊ་ (Nomin Chinbat) ལགས། སྲིད་འཛིན་ཟུར་པ་ཨེན་བྷ་ཡར་(N.Enkhbayer) ལགས། གྲོས་ཚོགས་འཐུས་མི་སོགས་གཞུང་གི་དཔོན་རིགས་ཁག་གཅིག་དང་། གཞུང་ཚབ་རྣམ་པ། ཆོས་ལུགས་ཁག་གི་སྐུ་ཚབ་སོགས་མཉམ་ཞུགས་གནང་འདུག
སྐབས་དེར་རུ་སོག་སྐུ་ཚབ་དོན་གཅོད་ཏི་ལོ་རིན་པོ་ཆེ་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དམིགས་བསལ་གསུང་འཕྲིན་སྩལ་བ་དེ་ཉིད་སྒྲོགས་སྦྱང་གནང་བའི་ནང་། ས་ག་ཟླ་བའི་དུས་ཆེན་སྲུང་བརྩིའི་ཆེད་རྒྱ་གར་གཞུང་གི་སྐུ་ཚབ་ཚོགས་ཆུང་གིས་རྒྱ་གར་གྱི་རྒྱལ་ཡོངས་འགྲེམས་སྟོན་ཁང་ནས་སྟོན་པའི་རིང་བསྲེལ་སོག་ཡུལ་གྱི་དགའ་ལྡན་ཐེག་ཆེན་ཆོས་གླིང་དགོན་པར་གདན་འདྲེན་ཞུས་པར་དགའ་ཚོར་ཆེན་པོ་བྱུང་། སྟོན་པ་བཅོམ་ལྡན་འདས་ཀྱིས་ཁོང་གི་བསྟན་པ་བྱང་ནས་བྱང་དུ་དར་ངེས་ཡིན་པ་ལུང་བསྟན་གནང་ཡོད་པ་དང་། སྐབས་དོན་བྱང་ཞེས་པ་རྒྱ་གར་ནས་བོད་དང་། བོད་ནས་སོག་ཡུལ་དུ་གོ་བ་རེད། དུས་ཀྱི་བརྒྱུད་རིམ་ནང་སོག་པོ་བས་བསྟན་པ་ལ་ཞབས་འདེགས་རླབས་པོ་ཆེ་ཞུས་ཡོད། ཅེས་སོགས་འཁོད་ཡོད།
མཛད་སྒོ་གྲོལ་མཚམས་སུ་དགའ་ལྡན་ཐེག་ཆེན་ཆོས་གླིང་དགོན་པས་རྒྱ་གར་གཞུང་གི་སྐུ་ཚབ་ཚོགས་ཆུང་ལ་ཉིན་དགུང་གསོལ་སྟོན་བཤམས་ཤིང་། གསོལ་སྟོན་སྐབས་སྐུ་ཚབ་རྣམ་པས་རིག་གཞུང་དང་། གཞས་སྣ། ཆོས་ལུགས། སྤྱི་ཚོགས་ཀྱི་ཕན་བདེའི་གནད་དོན་སོགས་ཀྱི་ཐད་གྲོས་བསྡུར་ལྷུག་པོ་གནང་བ་དང་། སྐབས་དེར་ཏི་ལོ་རིན་པོ་ཆེ་མཆོག་གིས་རྒྱ་གར་དང་སོག་ཡུལ་སྐུ་ཚབ་རྣམ་པ་ལྷན་མཇལ་མོལ་གནང་ཡོད།
ཐེངས་འདིའི་རྒྱ་གར་ནས་སོག་ཡུལ་དུ་སྟོན་པའི་རིང་བསྲེལ་གདན་ཞུ་གནང་རྒྱུའི་གནང་སྒོ་དེ་བཞིན་རྒྱ་གར་དང་སོག་པོའི་འབྲེལ་ལམ་ནང་ལོ་རྒྱུས་རང་བཞིན་ལྡན་པའི་དོན་རྐྱེན་ཞིག་ཏུ་གྱུར་ཡོད་པ་དང་། དེ་ལ་བརྟེན་ནས་རྒྱལ་ཁབ་གཉིས་བར་རིག་གཞུང་དང་ཆོས་ལུགས་ཀྱི་འབྲེལ་ལམ་དམ་དུ་འགྲོ་ངེས་ཡིན། དེ་སྔ་ཕྱི་ལོ་ ༢༠༡༥ ལོར་རྒྱ་གར་གྱི་སྲིད་བློན་ནཱ་རེནྡྲ་མོ་དཱི་མཆོག་སོག་ཡུལ་དུ་ཕེབས་ཡོད་པ་དེ་ནི་རྒྱ་གར་གྱི་སྲིད་བློན་ཞིག་སོག་ཡུལ་དུ་ཕེབས་པ་ཐོག་མ་དེ་ཆགས་ཡོད་པ་རེད། །
