༄༅། །ཕྱི་ལོ་༢༠༢༢ ཟླ་བ་༠༦ ཚེས་༠༤ ཉིན་ལྡི་ལི་བསམ་ཡས་གླིང་བོད་མིའི་གཞིས་སྒར་གྱི་བོད་ཁྱིམ་ཉིན་སློབ་ཏུ་ས་གནས་ཉེ་འཁོར་གྱི་རང་ལོ་༡༨ ནས་༦༥ བར་གྱི་བོད་མི་རྣམས་ལ་ཏོག་དབྱིབས་ནུས་སྤར་སྔོན་ཁབ་བརྒྱབ་ཡོད། དེ་ཡང་ཀུན་རྡོར་རིན་པོ་ཆེ་མཆོག་གིས་དཔལ་འབྱོར་མཐུན་འགྱུར་དང་ལྡི་ལི་བསམ་ཡས་གླིང་འཕྲོད་བསྟེན་སྨན་ཁང་དང་བོད་མིའི་འབྲས་ནད་ཚོགས་པའི་རོགས་སྐྱོར་འོག་ས་གནས་བོད་མི་རྣམས་ལ་རིན་མེད་ནུས་སྤར་སྔོན་ཁབ་བརྒྱབ་ཡོད་པ་དང་། རིན་པོ་ཆེ་མཆོག་གིས་བྱ་བ་བཟང་པོ་འདི་ལས་བྱུང་བའི་དགེ་བའི་རྩ་བ་འདི་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་སྐུ་ཚེ་ཡུན་རིང་བརྟན་པ་དང་། ཏོག་དབྱིབས་གཉན་རིམས་ཁྱབ་གདལ་སྐབས་འདས་གྲོངས་སུ་གྱུར་བའི་འདས་པོ་རྣམས་ཀྱི་ཆེད་བསྔོ་བ་མཛད་ཡོད་པ་རེད།གཞན་ཡང་རིན་པོ་ཆེ་མཆོག་གིས་ནུས་སྤར་འགོག་ཁབ་ལྷན་དུ་འབྲས་ནད་གོ་རྟོགས་དང་ནད་རིགས་(H-Pylori) རྟག་དཔྱད་བྱ་རྒྱུའི་མཐུན་རྐྱེན་ཡང་སྦྱར་གནང་འདུག སྐབས་དེར་ཀུན་རྡོར་རིན་པོ་ཆེ་མཆོག་གིས་འགོག་ཁབ་ལས་གཞིར་ཉིན་འཁྱོངས་ཕྱག་རོགས་གནང་མཁན་རྣམས་ལ་ཐུགས་རྗེ་ལེགས་འབུལ་ཞུ་རྒྱུའི་མཛད་སྒོ་ཞིག་ཚོགས་པའི་ཐོག་ལྡི་ལི་བསམ་ཡས་གླིང་བོད་མིའི་གཞིས་སྒར་གྱི་ས་གནས་འགོ་འཛིན་རྡོ་རྗེ་ཚེ་རིང་ལགས་མགྲོན་འབོད་གནང་ཡོད་ཅིང་། ས་གནས་འགོ་འཛིན་རྡོ་རྗེ་ཚེ་རིང་ལགས་ཀྱིས་ཀུན་རྡོར་རིན་པོ་མཆོག་ནས་དཔལ་འབྱོར་གྱི་མཐུན་འགྱུར་གནང་བ་དང་། དང་བླངས་པ་རྣམས་ནས་ལས་དོན་ཚགས་ཚུད་བསྒྲུབས་པར་ཐུགས་རྗེ་ལེགས་འབུལ་ཞུས་ཡོད་པ་བཅས།།