༄༅། །ཉི་ཧོང་གྲོས་ཚོགས་ཀྱི་ལས་ཉིན་མཐའ་མའི་ཉིན་གྲོས་ཚོགས་འོག་མའི་ཚོགས་ཁང་དུ་རྒྱ་གར་དང་ཞི་བདེ་རྒྱ་མཚོ་ཐར་གྲོལ་མཐུན་ཕྱོགས་རྒྱལ་འབྲེལ་ (Free Indo-Pacific Alliance) གྱི་འབྲེལ་མཐུད་དང་ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་དྲུང་ཆེ་ཟུར་པ་སྐུ་ཞབས་ན་གའོ་ཏ་ཀ་ཤི་ (Nagao Takashi) ལགས་དང་། རྩོམ་པ་པོ་སྐུ་ཞབས་མིའུ་ར་ཀོ་ཊ་རོ་ (Miura Kotaro) ལགས་རྣམ་གཉིས་ཀྱི་གཙོ་སྐྱོང་འོག་རྒྱ་ནག་གི་བཙན་དབང་འོག་ཡོད་པའི་མི་རིགས་རྣམས་ཀྱི་སྐུ་ཚབ་ཐུན་མོང་ནས་གསར་འགོད་གསལ་བསྒྲགས་ཤིག་སྤེལ་འདུགདེ་ཡང་འདི་ལོའི་ཕྱི་ཟླ་གཉིས་པའི་ནང་ཉི་ཧོང་གྲོས་ཚོགས་འོག་མའི་ནང་རྒྱ་ནག་གཞུང་གིས་རང་གི་དབང་བསྒྱུར་འོག་ཡོད་པའི་མི་རིགས་རྣམས་ཀྱི་འགྲོ་བ་མིའི་ཐོབ་ཐང་དང་ཆོས་དད་རང་དབང་རྡོག་རོལ་ཚབས་ཆེ་བཏང་བ་མ་ཟད། ཁྱིམ་མཚེས་རྒྱལ་ཁབ་ཁག་ཏུ་དཔུང་འཛུལ་བྱས་པར་སྐྱོན་བརྗོད་ཀྱི་གྲོས་ཆོད་ཅིག་བཞག་ཡོད། ཐེངས་འདིར་གྲོས་ཚོགས་གོང་མའི་ནང་དུའང་གྲོས་ཆོད་དེ་ཉིད་གཏན་འབེབས་ཡོང་བའི་རེ་བ་བཅངས་ཡོད་ནའང་དོན་སྨིན་སོན་མེད། དེར་བརྟེན་རྒྱའི་བཙན་འོག་ཡོད་པའི་མི་རིགས་རྣམས་ཀྱི་སྐུ་ཚབ་ཐུན་མོང་ནས་གསར་འགོད་གསལ་བསྒྲགས་འདི་བརྒྱུད་གྲོས་ཚོགས་འཐུས་མི་རྣམས་ནས་གྲོས་ཆོད་གཏན་འབེབས་སླད་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཞུས་འདུགཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་དེ་སྔ་གྲོས་ཚོགས་འོག་མའི་ནང་རྒྱ་གཞུང་ནས་འགྲོ་བ་མིའི་ཐོབ་ཐང་རྡོག་རོལ་བཏང་བར་སྐྱོན་བརྗོད་ཀྱི་གྲོས་ཆོད་གཏན་འབེབས་གནང་བར་རྒྱལ་སྤྱིའི་མི་མང་གིས་དགའ་བསུ་ཞུས་པ་མ་ཟད། རྒྱའི་བཙན་འོག་ཏུ་ཡོད་པའི་མི་རིགས་ལ་རེ་བ་ཆེན་པོ་ཞིག་སྤྲད་ཡོད། དེ་བཞིན་དེ་ལ་བརྟེན་ནས་རྒྱ་ནག་ལ་རྒྱལ་སྤྱིའི་མི་མང་གིས་བལྟས་ནས་བསྡད་ཡོད་པའི་བརྡ་ལན་གསལ་པོ་ཞིག་བསྟན་ཡོད། འོན་ཀྱང་གྲོས་ཆོད་དེ་ཉིད་གྲོས་ཚོགས་གོང་མའི་ནང་གཏན་འབེབས་གནང་མ་ཐུབ་པར་བློ་ཕམ་ཡོད་ཅེས་དང་།

ཁོང་གིས་མུ་མཐུད་དེ། རྒྱ་ནག་དམར་ཤོག་ཚོགས་པའི་འགོ་ཁྲིད་རྣམས་ནི་ཉེན་ཁ་དང་དམག་འཁྲུག་གི་རྒྱུ་རྐྱེན་ཡིན་ལ། ཉི་ཧོང་ནི་རང་དབང་དང་མང་གཙོའི་རྒྱལ་ཁབ་ཅིག་རེད། དེས་ཨེ་ཤི་ཡ་དང་འཛམ་གླིང་སྤྱི་ཡོངས་ལ་ཞི་བདེ་དང་བདེ་འཇགས་དར་འཕེལ་གཏོང་ཐུབ་པས། ཉི་ཧོང་གིས་འགན་ཁུར་སྣེ་ཁྲིད་ཀྱིས་འགྲོ་བ་མིའི་ཐོབ་ཐང་མེད་པའི་སྡུག་བསྔལ་མྱང་དང་མྱོང་བཞིན་པའི་མི་རིགས་རྣམས་ལ་རྒྱབ་སྐྱོར་གནང་དགོས་ཞེས་གསུངས།

གཞན་ཡང་གསར་འགོད་གསལ་བསྒྲགས་སྐབས་ཡུ་གུར་མི་རིགས་ཀྱི་སྐུ་ཚབ་གྷུ་ལིསྟན་ཨེ་ཛ་ (Gulistan Ezz) ལགས་དང་། ལྷོ་སོག་སྐུ་ཚབ་འབུམ་རམས་པ་གྷོ་རུཊ་ཨར་ཆ་ (Govrud Archa) ལགས། འཛམ་གླིང་སོག་རིགས་མཐུན་ཚོགས་ཀྱི་སྐུ་ཞབས་དཱར་ཧཊ་ཧ་ཆུ་ལུ་ (Darhad Haschuluu) ལགས། (Stop Medica Genocide) ཚོགས་པའི་སྐུ་ཞབས་ནི་མོ་ཏོ་ཡུ་ཀི་ཧི་ (Nemoto Yukio) ལགས་ཀྱིས་གསུང་བཤད་གནང་སྟེ་གྲོས་ཚོགས་གོང་མའི་ནང་དུ་རྒྱ་ནག་ལ་སྐྱོན་བརྗོད་ཀྱི་གྲོས་ཆོད་བཞག་མ་ཐུབ་པར་བློ་ཕམ་ཡོད་པ་གསུངས་འདུག

སྐབས་དེར་སྐུ་ཚབ་རྣམས་ཀྱིས་རྒྱ་ནག་གི་བཙན་དབང་འོག་གི་ཛ་དྲག་གནས་སྟངས་གསལ་བཤད་དང་། ཉི་ཧོང་གྲོས་ཚོགས་འཐུས་མི་རྣམས་ནས་ཁོང་ཚོའི་རང་དབང་དང་དྲན་བདེན་གྱི་རྩ་དོན་ལ་རྒྱབ་སྐྱོར་གནང་སྐྱོང་ཡོང་བའི་རེ་སྐུལ་ཞུས་པ་དང་ལྷན་ཅིག་ཡུ་གུར་སྐུ་ཚབ་པས་རྒྱའི་བཙན་གནོན་འོག་དཀའ་སྡུག་མྱང་བའི་དངོས་ཡོད་ལོ་རྒྱུས་དྲན་གསོ་གནང་འདུག་པ་བཅས།།