༄༅། །རྒྱ་གར་གྲོས་ཚོགས་འོག་མའི་འཐུས་མི་སྐུ་ཞབས་ཏ་པིར་གྷའོ་ལགས་མེའོ་ཆོས་འཕེལ་གླིང་བོད་མིའི་གཞིས་ཆགས་སུ་ཕྱི་ལོ་༢༠༢༢ ཟླ་བ་ ༠༦ ཚེས་ ༢༣ ཉིན་འཚམས་གཟིགས་སུ་ཕེབས་ཡོད། སྐབས་དེར་ས་གནས་འཐུས་ཚོགས་ཀྱི་ཚོགས་གཙོ་རིག་འཛིན་རྡོ་རྗེ་ལགས་དང་། ས་འགོ་ལས་ཚབ་བསྟན་འཛིན་རང་གྲོལ་ལགས། ས་གནས་མཉམ་འབྲེལ་གྱི་འགན་འཛིན་ལྷན་ཚོགས་ཀྱི་ཚོགས་གཙོ་བཀྲ་ཤིས་དོན་གྲུབ་ལགས། གཞིས་གྲོང་སོ་སོའི་བརྒྱ་དཔོན་བཅས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།
གྲོས་ཚོགས་འཐུས་མི་གྷའོ་ལགས་ཀྱིས་ཁོང་ཉིད་ས་གནས་སུ་ཕེབས་དགོས་དོན་གཙོ་བོ་ནི་གཅིག་ནས་དེ་སྔ་ཁོང་གཞིས་ཆགས་སུ་ཕེབས་མྱོང་མེད་པ་དང་། གཉིས་ནས་ཁོང་ཉིད་རྒྱ་གར་གྱི་བྷི་ཇེ་པི་(BJP) སྲིད་དོན་ཚོགས་པའི་རྒྱལ་ཡོངས་རྒྱུན་ལས་ཚོགས་མི་དང་། རྒྱ་གར་བྱང་ཤར་ཨ་རུ་ན་ཅལ་མངའ་སྡེའི་ཁྱབ་ཁོངས་ཀྱི་གྲོས་ཚོགས་འཐུས་མི་ཡིན་པར་སོང་ལྡི་ལིར་བོད་མི་མང་སྤྱི་འཐུས་ལྷན་ཚོགས་ཀྱི་འཐུས་མི་རྣམ་པ་ཐེངས་མང་མཇལ་མྱོང་ཡོད་པ་དང་། ཁོང་རྣམ་པས་ས་གནས་སུ་ཕེབས་གནང་ཡོང་བའི་མགྲོན་འབོད་གནང་དོན་ལྟར་ད་ཐེངས་ས་གནས་བོད་མི་རྣམས་ལ་དགོས་ངེས་ཀྱི་རྒྱབ་སྐྱོར་གནང་བར་ཕེབས་པ་ཡིན་ཞེས་ངོ་སྤྲོད་གནང་ཡོད།
ཁོང་གིས་གཞིས་མི་རྣམས་ཀྱི་བདེ་སྡུག་རྒྱུས་ལོན་གནང་བ་དང་འབྲེལ་གནད་དོན་དེ་དག་འབྲེལ་ཡོད་ལས་ཁུངས་སོ་སོར་དབུལ་རྒྱུ་དང་། དེ་འབྲེལ་མཇུག་སྐྱོང་ཞུ་ཐད་ཁོང་ལ་འབྲེལ་བ་གནང་དགོས་པའི་ལམ་སྟོན་གནང་། གཞིས་མི་རྣམས་ཀྱིས་བདེ་སྡུག་གཙོ་བོ་ས་གནས་སུ་ཡོ་གུའི་ལོ་མའི་ཕོར་པ་དང་སྡེར་མ་བཟོ་བསྐྲུན་ཐད་མངའ་སྡེ་གཞུང་ནས་རྒྱབ་སྐྱོར་གནང་སྐྱོང་ཡོང་བའི་རེ་འདུན་བཏོན་ཡོད།
གཞན་ཡང་གྲོས་ཚོགས་འཐུས་མི་ཁོང་གིས་གཞིས་ཆགས་ཀྱི་རང་ཁ་རང་གསོའི་འཚོ་རྟེན་ལ་བསྔགས་བརྗོད་གནང་ཡོད། མཐར་ས་གནས་ཀྱི་རུམ་གདན་ཚན་པས་བཏོན་པའི་རུམ་གདན་ཞིག་ཁོང་ལ་དྲན་རྟེན་དུ་ཕུལ་ཡོད་པ་བཅས།།
