༄༅།། ཕྱི་ལོ་ ༢༠༢༢ ཟླ་ ༦ ཚེས་ ༢༡ སྔ་དྲོ་ཆུ་ཚོད་ ༡༠་༣༠ ཐོག་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག དཔལ་ལྡན་ཚོགས་གཞོན་སྒྲོལ་མ་ཚེ་རིང་མཆོག ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག བྱང་ཨ་རི་སྐུ་ཚབ་དོན་གཅོད་རྣམ་རྒྱལ་མཆོག་གྲུབ་ལགས་བཅས་ལ་ཨ་རིའི་གཞུང་གི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ཨ་ཛི་རཱ་ཛེ་ཡ་ (Uzra Zeya ) མཆོག་གིས་མགྲོན་འབོད་གནང་དོན་ལྟར། ལྕམ་སྐུ་མཆོག་གི་ལས་ཁུངས་སུ་ཆེད་ཕེབས་ཀྱིས་མཇལ་མོལ་གནང་ཡོད།གཞན་ཡང་ཕྱི་དྲོ་ཆུ་ཚོད་ ༤་༣༠ ཐོག་ཨ་རིའི་གྲོས་ཚོགས་གོང་མའི་འཐུས་མི་ལྕམ་སྐུ་ཌ་ཡེན་ཧྥ་ཡེན་སི་ཊེན་ (Diane Fienstin) མཆོག་དང་མཇལ་མོལ་གནང་ཡོད།

དེ་ཡང་ཁོང་མོའི་བཟའ་ཟླ་བོད་ཀྱི་གྲོགས་པོ་རྙིང་གྲས་དང་བོད་དོན་རྒྱབ་སྐྱོར་བ་སྐུ་ཞབས་རི་ཅར་ཌི་ཅར་ལི་སི་བྷི་ལུམ་ (Richard Blum) མཆོག་ཉེ་སྔོན་ཕྱི་ཟླ་ ༢ པའི་ཟླ་མཇུག་ཏུ་འདས་གྲོངས་སུ་གྱུར་བར་ཐུགས་གསོའི་མཇལ་མོལ་གནང་སྐབས་ལྕམ་སྐུ་མཆོག་གིས་དྲི་བ་གནང་བ་ལྟར་རང་རེའི་ཕྱོགས་ནས་ཨ་རིར་བཅར་དགོས་དོན་ནི་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་  ༨ བོད་མི་མང་སྤྱི་འཐུས་ལྷན་ཁང་ནས་གོ་སྒྲིག་གནང་བཞིན་ཡོད་པ་དང་། དེ་འབྲེལ་ཚོགས་འདུའི་གནས་ལུགས་སྐོར་དང་། བོད་ནང་གི་ཛ་དྲག་གནས་སྟངས་སྐོར། ད་ལྟའི་ཆར་རྒྱ་གར་ནང་དཀའ་ངལ་གང་འཕྲད་བཞིན་ཡོད་སྐོར་འགྲེལ་བརྗོད་གནང་ཡོད། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་ཆེད་དུ་དམིགས་ནས་ཁོ་མོར་མཇལ་འཕྲད་སླད་ཕེབས་པར་དགའ་སྤྲོ་ཆེན་པོ་གནང་བ་དང་། ཐུགས་རྗེ་ཤིན་ཏུ་ཆེ་ཞེས་གསུང་གནང་ཡོད་པ་བཅས། །