༄༅། །བཀའ་ཤག་སྐབས་བཅུ་དྲུག་པའི་དགོངས་གཞི་ནི་མ་འོངས་པར་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་ནང་འཛིན་སྐྱོང་གནང་ཕྱོགས་མཐའ་དག་ཤོག་བུའི་སྟེང་ནས་མིན་པར་དྲ་ཐོག་ནས་འཛིན་སྐྱོང་གནང་རྒྱུ་ཡིན་པ་ལྟར། དྲ་ཐོག་ནས་འཛིན་སྐྱོང་གནང་ཕྱོགས་ཀྱི་སློབ་སྤྱོང་སླད་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་པ་གྲངས་བཅུ་ཨེསྚོ་ནི་ཡཱར་(Estonia) ཕེབས་འབྱོར་བྱུང་ཡོད།
དེ་ཡང་ཉིན་དང་པོར་དྲ་ཐོག་འཛིན་སྐྱོང་སྦྱོང་བརྡར་བསྟི་གནས་ཁང་ (e-Governance Academy) གི་ཚོགས་མི་ཨེར་ཝོ་ཝོ་ཊི་ (Arvo Ott) ལགས་ཀྱིས་ཕེབས་བསུའི་གསུང་བཤད་གནང་གྲུབ་རྗེས་དྲ་ཐོག་འཛིན་སྐྱོང་ཆེད་མཁས་པ་ཝིན་ཀེལ་ (Priit Vinkel) ལགས་ཀྱིས་བདུན་ཕྲག་གཅིག་རིང་གི་ལས་རིམ་སྐོར་ངོ་སྤྲོད་གསུང་བཤད་གནང་བ་དང་། དེ་བཞིན་དྲ་ཐོག་འཛིན་སྐྱོང་སྦྱོང་བརྡར་བསྟི་གནས་ཁང་གི་ལས་འཆར་ངེས་སྟོན་པ་ཨེན་ནེ་ལ་ (Annela Kirats) ལགས་ཀྱིས་དྲ་ཐོག་འཛིན་སྐྱོང་སྦྱོང་བརྡར་བསྟི་གནས་ཁང་གི་ལས་དོན་གནང་ཕྱོགས་སྐོར་ངོ་སྤྲོད་གསུང་བཤད་གནང་ཡོད།བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་པའི་སྐུ་ཚབ་རྣམ་པ་ཨེསྚོ་ནི་ཡཱའི་གྲོས་ཚོགས་ནང་ཆེད་ཕེབས་ཀྱིས་ཨེསྚོ་ནི་ཡཱའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ལྕམ་སྐུ་ཡོ་ཀོ་ཨེ་ལེན་ཌར་ (Yoko Alender) ལགས་དང་ཨེསྚོ་ནི་ཡཱའི་གྲོས་ཚོགས་འཐུས་མི་ཨེན་ནེ་ལེ་ཨེ་ཀར་མན་ (Annely Akkermann) ལགས་རྣམ་གཉིས་དང་མཇལ་འཕྲད་ཞུས་ཡོད།
སྐབས་དེར་ལྕམ་སྐུ་ཡོ་ཀོ་ཨེ་ལེན་ཌར་ལགས་ཀྱིས་ཨེསྚོ་ནི་ཡཱའི་གྲོས་ཚོགས་དྲ་ཐོག་ནས་འཛིན་སྐྱོང་གནང་སྟངས་སྐོར་ངོ་སྤྲོད་དང་། དེ་བཞིན་བོད་མིའི་སྒྲིག་འཛུགས་ཀྱི་ལས་བྱེད་པའི་སྐུ་ཚབ་རྣམས་ཀྱི་དྲི་བ་ཁག་ལ་ལན་འདེབས་གནང་ཡོད། དེ་རྗེས་ཨེསྚོ་ནི་ཡཱའི་གྲོས་ཚོགས་ཀྱི་བརྡ་འཕྲིན་སྒྲིག་འཛུགས་ཀྱི་ངེས་སྟོན་པ་ཀར་ལི་མོར་ཊན་ཀོ་པེལ་ (Karl-Morten Koppel) ལགས་ཀྱིས་ཨེསྚོ་ནི་ཡཱའི་གྲོས་ཚོགས་ཀྱིས་དྲ་ཐོག་འཛིན་སྐྱོང་དང་གྲོས་གཞི་གྲོས་ཆོད་འཇོག་སྟངས་སྐོར་ངོ་སྤྲོད་གནང་ཡོད།གཞན་ཡང་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་པའི་སྐུ་ཚབ་རྣམས་ཨེསྚོ་ནི་ཡཱའི་སྲིད་བློན་ལས་ཁུངས་སུ་གཟིགས་སྐོར་དུ་ཕེབས་ཡོད་པ་དང་། ཨེསྚོ་ནི་ཡཱ་གཞུང་གི་བརྡ་འཕྲིན་འབྲེལ་ལམ་གྱི་ངེས་སྟོན་པ་ཀེ་ཊེ་རིན་པེ་ཇུ་མ་གྷི་ (Kateriin Pajumagi) ལགས་ཀྱིས་ཨེསྚོ་ནི་ཡཱའི་བཀའ་ཤག་ལྷན་རྒྱས་ཚོགས་སྟངས་དང་། བཀའ་ཤག་ལྷན་རྒྱས་ཀྱིས་དྲ་ཐོག་ནས་ཐག་གཅོད་གནང་སྟངས་སོགས་ཀྱི་སྐོར་ངོ་སྤྲོད་གནང་ཡོད། དྲ་ཐོག་འཛིན་སྐྱོང་སྦྱོང་བརྡར་བསྟི་གནས་ཁང་ནི་ཁེ་མེད་ཚོགས་པ་ཞིག་ཡིན་ཞིང་། ཕྱི་ལོ་ ༢༠༠༢ ལོར་གསར་དུ་བཙུགས་པ་ཞིག་ཡིན། ད་བར་ཚོགས་པ་དེས་གཞུང་དང་གཞུང་ཁོངས་མིན་པའི་ཚོགས་པ་ཁག་ལ་དྲ་ཐོག་འཛིན་སྐྱོང་སྦྱོང་དང་འབྲེལ་བའི་སློབ་སྟོན་དང་། སྦྱོང་བརྡར། རམ་འདེགས་གནང་དང་གནང་མུས་ཡིན་པ་བཅས།།