༄༅། །༸སྐྱབས་རྗེ་ཇོ་ནང་རྒྱལ་ཚབ་རིན་པོ་ཆེ་མཁན་སྤྲུལ་ངག་དབང་ཆོས་ཀྱི་སྣང་བ་མཆོག་གིས་ཐུགས་འགན་ཆེ་བཞེས་དང་། ཇོ་ནང་དུས་འཁོར་སྦྱོར་དྲུག་སྒོམ་གྲྭ་ཆོས་འཁོར་གླིང་གི་བགྲོ་གླེང་གོ་སྒྲིག་ཚོགས་ཆུང་གི་གོ་སྒྲིག་འོག་ཕྱི་ལོ་ ༢༠༢༢ ཟླ་ ༦ ཚེས་ ༡༤ ཉིན་གྱི་ཉིན་རྒྱབ་གོ་པལ་པུར་དུ་རྟེན་གཞི་བྱས་པའི་གོ་པལ་པུར་ཇོ་ནང་དུས་འཁོར་སྒྲུབ་ཁང་ཆེན་མོའི་ཚོགས་ཁང་དུ་མདོ་སྔགས་ཟུང་འབྲེལ་གྱི་གཞན་སྟོང་དབུ་མ་ཆེན་མོའི་ཤིང་རྟའི་སྲོལ་འབྱེད་ཀུན་མཁྱེན་དོལ་པོ་སངས་རྒྱས་རྟོན་པ་བཞི་ལྡན་ཤེས་རབ་རྒྱལ་མཚན་དཔལ་བཟང་པོ་མཆོག་སྐུ་ཞི་བར་གཤེགས་ནས་བགྲང་བྱ་ཧྲིལ་པོ་ ༦༦༠ འཁོར་བའི་བཀའ་དྲིན་རྗེས་དྲན་དང་འབྲེལ་བའི་ཇོ་ནང་རིས་མེད་དུས་འཁོར་བགྲོ་གླེང་ཆེན་མོ་དབུ་འབྱེད་ཀྱི་མཛད་སྒོ་ཚོགས་སོང་།
མཛད་སྒོར་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་དང་ཆོས་རིག་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་དང་། ༸སྐྱབས་རྗེ་ཇོ་ནང་རྒྱལ་ཚབ་རིན་པོ་ཆེ་མཁན་སྤྲུལ་ངག་དབང་ཆོས་ཀྱི་སྣང་བ་མཆོག དགའ་ལྡན་ཕོ་བྲང་གི་དྲུང་ཆེ་དགེ་བཤེས་ལྷ་རམས་པ་ཡང་སྟེང་སྤྲུལ་སྐུ་བློ་བཟང་བསྟན་པའི་རྒྱལ་མཚན་མཆོག དེ་བཞིན་མཁན་ལས་ཟུར་དང་བགྲོ་གླེང་གནང་མཁན་ཆོས་ལུགས་རིས་མེད་ཀྱི་སྐུ་ཚབ་རྣམ་པ། གཞན་ཡང་ཕྱི་ནང་གི་སྐུ་མགྲོན་སོགས་ཕེབས་ཡོད།
དེ་ཡང་ཐོག་མར་དཔལ་དུས་ཀྱི་འཁོར་ལོའི་རིས་མེད་མཁས་པའི་བགྲོ་གླེང་ཆེན་མོ་དབུ་འབྱེད་མཛད་སྒོའི་ཚོགས་མགོན་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེ་གདན་ཞུ་གྲུབ་མཚམས་༸སྐྱབས་རྗེ་ཇོ་ནང་རྒྱལ་ཚབ་རིན་པོ་ཆེ་མཁན་སྤྲུལ་ངག་དབང་ཆོས་ཀྱི་སྣང་བ་མཆོག་གིས་མཎྜལ་རྟེན་གསུམ་འདེགས་འབུལ་ཞུས་པ་དང་འབྲེལ་དཔལ་ལྡན་སྲིད་སྐྱོང་མཆོག་ལ་ཀུན་མཁྱེན་དོལ་པོ་སངས་རྒྱས་རྟོན་པ་བཞི་ལྡན་ཤེས་རབ་རྒྱལ་མཚན་དཔལ་བཟང་པོ་མཆོག་གི་སྐུ་བརྙན་ཞིག་ཕུལ་གནང་ཡོད། དེ་རྗེས་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་དང་ཆོས་རིག་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་སྣང་གསལ་མར་མེ་ཞལ་ཕྱེ་གནང་རྗེས་རིམ་པས་དབུ་མཛད་ནས་རྒྱུན་ཆགས་གསུམ་པ་དང་། རྒྱལ་མདུན་མ། ༸རྒྱལ་བའི་འཁྲུངས་རབས་གསོལ་འདེབས་བཅས་ཞལ་འདོན་གསུང་སྐུལ་གནང་མཚམས་གསོལ་ཇ་འབྲས་སིལ་འདེགས་འབུལ་ཞུས།
༸སྐྱབས་རྗེ་ཇོ་ནང་རྒྱལ་ཚབ་རིན་པོ་ཆེ་མཁན་སྤྲུལ་ངག་དབང་ཆོས་ཀྱི་སྣང་བ་མཆོག་གིས་དཔལ་དུས་ཀྱི་འཁོར་ལོའི་རིས་མེད་མཁས་པའི་བགྲོ་གླེང་ཆེན་མོའི་དགོས་དམིགས་དང་འབྲེལ་བའི་གསུང་བཤད་གནང་སྐབས་དཔལ་དུས་ཀྱི་འཁོར་ལོ་བོད་གངས་ཅན་ལྗོངས་སུ་དར་ཚུལ་དང་། དུས་འཁོར་སྦྱོར་དྲུག་གི་ཉམས་ལེན་རིམ་པ། དེ་བཞིན་མདོ་སྔགས་ཟུང་འབྲེལ་གྱི་གཞན་སྟོང་དབུ་མ་ཆེན་མོའི་ཤིང་རྟའི་སྲོལ་འབྱེད་ཀུན་མཁྱེན་དོལ་པོ་སངས་རྒྱས་རྟོན་པ་བཞི་ལྡན་ཤེས་རབ་རྒྱལ་མཚན་དཔལ་བཟང་པོ་མཆོག་སྐུ་ཞི་བར་གཤེགས་ནས་བགྲང་བྱ་ཧྲིལ་པོ་ ༦༦༠ འཁོར་བའི་བཀའ་དྲིན་རྗེས་དྲན་དང་འབྲེལ་བའི་ཇོ་ནང་རིས་མེད་དུས་འཁོར་བགྲོ་གླེང་ཆེན་མོ་དབུ་འབྱེད་ཀྱི་མཛད་སྒོ་ཚོགས་དགོས་པའི་དམིགས་ཡུལ་སོགས་ཀྱི་སྐོར་གསུང་བཤད་གནང་རྗེས་བགྲོ་གླེང་གོ་སྒྲིག་ལྷན་ཚོགས་ཀྱི་ཚོགས་གཙོ་སློབ་དཔོན་ལྷ་སྐྱབས་ལགས་ཀྱིས་དཔལ་དུས་ཀྱི་འཁོར་ལོའི་རིས་མེད་མཁས་པའི་བགྲོ་གླེང་གི་བརྗོད་གཞི་དང་། གསུང་བཤད་པ། གཙོ་སྐྱོང་བ། ཉིན་རེའི་མཛད་རིམ། ཟུར་ཉན་པ། ཚོགས་ཞུགས་པའི་གྲུབ་ཆ་བཅས་ཀྱི་སྐོར་ངོ་སྤྲོད་གནང་གྲུབ་མཚམས་དགེ་བཤེས་ལྷ་རམས་པ་ཡང་སྟེང་སྤྲུལ་སྐུ་བློ་བཟང་བསྟན་པའི་རྒྱལ་མཚན་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཇོ་ནང་རིས་མེད་དུས་འཁོར་བགྲོ་གླེང་ཆེན་མོར་སྩལ་བའི་བཀའ་ཡིག་སྒྲོགས་སྦྱང་གནང་དོན། ཀུན་མཁྱེན་དོལ་པོ་བ་དགོངས་པ་རྫོགས་ནས་ལོ་ ༦༦༠ འཁོར་བའི་དུས་ཚིགས་བཀའ་དྲིན་རྗེས་དྲན་ཞུ་བའི་ལོ་འདིར། ཕྱི་ནང་གཞན་གསུམ་གྱི་བདག་ཉིད་ཅན་གདོད་མའི་མགོན་པོ་དཔལ་ལྡན་རྒྱུ་སྐར་དཀྱིལ་འཁོར་གྱི་བསྟན་པ་ཉམས་པ་སླར་གསོ་དང་། མི་ཉམས་གོང་འཕེལ་ཆེད་ཆོས་བརྒྱུད་རིས་སུ་མ་ཆད་པའི་དགེ་བའི་བཤེས་གཉེན་མང་པོ་གདན་ཞུས་ཀྱིས་ཉིན་གསུམ་རིང་བགྲོ་གླེང་གནང་འཆར་ལ་ལེགས་སོ་ཡི་རང་གི་བསྔགས་བརྗོད་དང་འབྲེལ་ཚོགས་ཞུགས་ཚང་མར་འཚམས་འདྲི་ཞུ།
ད་རེས་ངོས་རང་ངོ་བཅར་མ་ཐུབ་ཀྱང་ཞུ་འདོད་པ་གཅིག་ལ། བདག་ཅག་གི་སྟོན་པ་ཟས་གཙང་སྲས་དགུང་ལོ་སོ་དྲུག་ལ་ཕེབས་སྐབས་འཕགས་ཡུལ་གྱི་ལྷོ་ཕྱོགས་དཔལ་ལྡན་འབྲས་སྤུངས་སུ་ཤམ་བྷ་ལའི་རྒྱལ་པོ་ཟླ་བ་བཟང་པོ་གཙོ་བོར་གྱུར་པའི་དག་པའི་འཁོར་ཐུན་མོང་མ་ཡིན་པ་རྣམས་ཀྱི་ངོར་རྒྱུད་ཀྱི་རྒྱལ་པོ་དཔལ་དུས་ཀྱི་འཁོར་ལོ་ཐོག་མར་གསུངས་ཤིང་། དུས་ཕྱིས་འཕགས་ཡུལ་གྱི་དུས་ཞབས་པ་ཆེན་པོ་འཇམ་དཔལ་རྡོ་རྗེ་ཤམ་བྷ་ལར་བྱོན་ནས་རིགས་ལྡན་དངོས་དང་མཇལ་སྟེ་དུས་ཀྱི་འཁོར་ལོའི་དབང་ལུང་མན་ངག་ཡོངས་སུ་རྫོགས་པ་གསན་པ་དང་། དེ་ཡང་འགའ་ཞིག་ཐུགས་ངོར་བཟུང་ཞིང་། འགའ་ཞིག་གླེགས་བམ་དུ་བྲིས་ཏེ་འཕགས་ཡུལ་དུ་གདན་དྲངས་པ་ནས་བཟུང་དུས་འཁོར་གྱི་བསྟན་པ་དར་འགོ་ཚུགས་པ་དང་། སྤྱིར་ན་དུས་འཁོར་གྱི་རྩ་རྒྱུད་ལ་ཤོ་ལོ་ཀ་སྟོང་ཕྲག་བཅུ་གཉིས་ཡོད་ཀྱང་བོད་དུ་གཅིག་སྟེ་དབང་མདོར་བསྟན་མ་གཏོགས་མ་འགྱུར། འོན་ཀྱང་ས་དགེ་བཀའ་རྙིང་རིས་སུ་མ་མཆིས་པའི་མཁས་གྲུབ་དམ་པ་མང་པོས་དཔལ་དུས་ཀྱི་འཁོར་ལོའི་བཤད་སྒྲུབ་ཉམས་བཞེས་གནང་སྟེ་དར་ཁྱབ་ཆེན་པོ་བྱུང་ཡོད།
ལྷག་པར་ཇོ་ནང་པར་དང་པོའི་སངས་རྒྱས་ལས་ཕྱུང་བའི་སྦྱོར་དྲུག་གི་རྨང་གཞི་བཟང་པོ་ཡོད་པ་འདི་ཐོས་བསམ་སྒོམ་གསུམ་གྱི་ཉམས་ལེན་རྣམ་པར་དག་པ་མཛད་དེ་དུས་འཁོར་སྦྱོར་དྲུག་གི་སྒོམ་གྲྭ་ཞེས་མིང་ཐོགས་པ་ཇི་བཞིན་རིགས་གཅིག་རྐང་འཛིན་གྱིས་མིང་དོན་མཚུངས་པ་ཞིག་གནང་གལ་ཤིན་ཏུ་ཆེ་བའི་གཞེན་སྐུལ་དང་། ད་རེས་ཀྱི་བགྲོ་གླེང་འདི་ཐོག་དཀའ་གནད་ཀྱི་མདུད་རྒྱ་ལྷུག་པོར་གྲོལ་ཞིང་སྦྱོར་དྲུག་གི་བསྟན་པ་ཕྱོགས་དུས་ཀུན་ཏུ་རྒྱས་པའི་སྨོན་ལམ་དང་བཅས། ཤཱཀྱའི་དགེ་སྦྱོང་ཆོས་སྨྲ་བ་ཏཱ་ལའི་བླ་མས། རབ་བྱུང་བཅུ་བདུན་པའི་ཆུ་སྟག་ཟླ་ ༢ ཚེས་ ༡༧ ཕྱི་ལོ་ ༢༠༢༢ ཟླ་ ༤ ཚེས་ ༡༨ ལ། 
དེ་རྗེས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་དང་ཆོས་རིག་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་གསུང་བཤད་གནང་དོན། ངས་དཔལ་དུས་ཀྱི་འཁོར་ལོའི་སྐོར་དམིགས་བསལ་ཞུ་ཤེས་པ་མི་འདུག གོང་དུ་ཡང་སྟེང་རིན་པོ་ཆེ་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཇོ་ནང་རིས་མེད་དུས་འཁོར་བགྲོ་གླེང་ཆེན་མོར་སྩལ་བའི་བཀའ་ཡིག་སྒྲོགས་སྦྱང་གནང་བ་དེ་དོན་གྱི་ཆ་ནས་གཙོ་བོ་ཆགས་ཡོད། དཔལ་རྒྱལ་བ་ཇོ་ནང་པའི་ཐུན་མོང་མིན་པའི་ཁྱད་ཆོས་གཙོ་བོ་ནི་དཔལ་དུས་ཀྱི་འཁོར་ལོ་རྩི་ཡི་འདུག དཔལ་དུས་ཀྱི་འཁོར་ལོ་འདི་བོད་པའི་ཆོས་བརྒྱུད་རིས་མེད་ཀྱིས་ཉམས་ལེན་གནང་གི་ཡོད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཇོ་ནང་རིས་མེད་དུས་འཁོར་བགྲོ་གླེང་ཆེན་མོར་སྩལ་བའི་བཀའ་ཡིག་ནང་རིགས་གཅིག་རྐང་འཛིན་གནང་དགོས་པའི་སྐོར་བཀའ་ཡིག་སྩལ་བ་བཞིན་རིགས་གཅིག་རྐང་འཛིན་གནང་དགོས་པ་དེ་གལ་ཆེན་པོ་ཆགས་ཡོད། ཐེངས་འདིའི་རིས་མེད་དུས་འཁོར་བགྲོ་གླེང་ཆེན་མོ་ནི་ཐེངས་གཉིས་པ་ཆགས་ཀྱི་ཡོད་ས་རེད། མ་འོངས་པར་རིས་མེད་དུས་འཁོར་བགྲོ་གླེང་ཆེན་མོ་མཇུག་སྐྱོང་དགོས་པ་ཡོད་ན་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ནས་མཐུན་འགྱུར་ཞུ་རྒྱུ་ཡིན། དེ་དང་ཆབས་ཅིག་ཏུ་ཐེངས་འདིའི་རིས་མེད་དུས་འཁོར་བགྲོ་གླེང་ཆེན་མོ་ལམ་ལྷོངས་ཡོང་བའི་སྨོན་འདུན་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང་།
མཐར་སློབ་དཔོན་ཀུན་དགའ་ལྷུན་གྲུབ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་རིས་མེད་དུས་འཁོར་བགྲོ་གླེང་ཆེན་མོ་དབུ་འབྱེད་ཀྱི་མཛད་སྒོ་རྒྱལ་ཁའི་ངང་ལེགས་པར་གྲུབ་ཡོད། དཔལ་དུས་ཀྱི་འཁོར་ལོའི་རིས་མེད་མཁས་པའི་བགྲོ་གླེང་ཆེན་མོ་དེ་བཞིན་ཕྱི་ལོ་ ༢༠༢༢ ཟླ་ ༦ ཚེས་༡༤ ཉིན་དབུ་འཛུགས་ཀྱིས་ཕྱི་ཚེས་༡༦ བར་ཉིན་གྲངས་གསུམ་རིང་ཚོགས་གཏན་ཁེལ་ཡོད་པ་བཅས།། 
