༄༅། །ཕྱི་ལོ་ ༢༠༢༢ ཟླ་ ༠༦ ཚེས་ ༠༦ ནས་ཚེས་ ༠༨ བར་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞིའི་བསྐྱར་ཞིབ་ཚོགས་འདུ་ཚོགས་ཡོད། སྐབས་དེར་བདེ་ལེགས་སྨན་ཁང་གི་སྨན་པ་བསོད་ནམས་སྟོབས་རྒྱལ་ལགས་དང་། སྦིར་འཕྲོད་བསྟེན་སྨན་ཁང་གི་སྨན་པ་ཡོན་ཏན་མཚོ་མོ་ལགས། བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞིའི་སློབ་སྟོན་པ་ཨ་ལོ་ཏི་གུཔ་ཏ་ལགས། དེ་བཞིན་ལས་འཆར་འགན་འཛིན་པདྨ་གཡུ་སྒྲོན་ལགས་དང་། འབྲེལ་ཡོད་ལས་བྱེད་བཅས་མཉམ་ཞུགས་གནང་ཡོད།
དེ་ཡང་རྩིས་ལོ་ ༢༠༢༡་་་༢༠༢༢ ནང་བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞི་ཁོངས་ནས་མིག་ནད་དང་། ཏོག་དབྱིབས་གཉན་རིམས། གཤག་བཅོས་ཀྱི་ལམ་ནས་ཕྲུ་གུ་སྐྱེ་ཐབས (LSCS) དབུགས་འབྱིན་དཀའ་བའི་ནད་རིགས། མཁྲིས་ནད་བཅས་ལ་སྨན་བཅོས་ཁེ་ཕན་ཞུ་མཁན་མང་ཤོས་བྱུང་འདུག ཕྱི་ལོ་ ༢༠༢༢་་་༢༠༢༣ ནང་བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞིའི་ཁོངས་སུ་ཞུགས་མཁན་རྒྱ་གར་ནང་བོད་མི་གྲངས་ ༢༤༡༠༡ བྱུང་ཡོད་པ་དང་། དེ་ཁོངས་ནས་༢༣༡༡༦ ཁྱིམ་ཚང་ཁོངས་གཏོགས་དང་ ༩༨༥ སྒེར་གྱི་ཁོངས་གཏོགས་སུ་འཛུལ་འདུག
འདི་ལོ་ནས་བཟུང་ཏོག་དབྱིབས་གཉན་རིམས་ཆེད་སྨན་བཅོས་ཁེ་ཕན་གསར་སྣོན་ཞུས་ཡོད་པ་དང་། དེ་བརྒྱུད་ཏོག་དབྱིབས་ནད་ཡམས་རྐྱེན་པས་སྨན་ཁང་དུ་ལུས་པའམ་ཛ་དྲག་མྱུར་སྐྱོབ་སྡེ་ཚན་དུ་ལྷག་པའི་ཚོགས་མི་དོ་བདག་ནས་རིམ་བཞིན་སྒོར་ ༣༥༠༠ དང་ ༧༠༠༠ གི་སྨན་བཅོས་ཁེ་ཕན་ཞུ་འཐུས། ཕྱོགས་མཚུངས་བཙན་བྱོལ་བོད་མིའི་སྨན་བཅོས་ལྟ་སྐྱོང་སྡེ་ཚན་ནས་རྗེས་ལོ་ ༢༠༢༣ ནས་ ༢༠༢༤ བར་སྨན་བཅོས་ཁེ་ཕན་གྱི་ཁྱབ་ཚད་ཆེ་རུ་གཏང་འཆར་ཡོད་པ་བཅས།། 
