༄༅། །ཕྱི་ལོ་ ༢༠༢༢ ཟླ་བ་ ༠༥ ཚེས་ ༣༡ ཉིན་གྱི་སྔ་དྲོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་ལྷོ་ཕྱོགས་སྦེལ་ཀོབ་ལུགས་ཟུང་བསམ་གྲུབ་གླིང་བོད་མིའི་གཞིས་ཆགས་དང་། བདེ་སྐྱིད་སླར་གསོ་བོད་མིའི་གཞིས་ཆགས་བཅས་སུ་གཞུང་འབྲེལ་འཚམས་གཟིགས་སུ་ཕེབས་འབྱོར་སྐབས་ལུགས་ཟུང་བསམ་གྲུབ་གླིང་དང་བདེ་སྐྱིད་སླར་གསོ་བོད་མིའི་གཞིས་ཆགས་ཀྱི་ས་གནས་འགོ་འཛིན་དང་། དགོན་སྡེ་ཁག་གི་སྐུ་ཚབ་རྣམ་པ། དེ་བཞིན་གཞུང་དང་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་སོགས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།
དེ་ཡང་ཐོག་མར་དཔལ་ལྡན་སྲིད་སྐྱོང་མཆོག་གིས་སྦེལ་ཀོབ་བོད་མིའི་གཞིས་ཆགས་ཀྱི་རྒྱལ་སྒོ་གསར་པ་ལེགས་གྲུབ་བྱུང་བ་དབུ་འབྱེད་གནང་གྲུབ་མཚམས་༧རྒྱལ་བའི་ཕོ་བྲང་དུ་གནས་གཟིགས་དང་། སྦེལ་ཀོབ་བོད་ཁྱིམ་སློབ་གྲྭར་འཚམས་གཟིགས་གནང་སྟེ་དགེ་ལས་སློབ་ཕྲུག་ཡོངས་ལ་གསུང་བཤད་གནང་ཡོད། དཔལ་ལྡན་སྲིད་སྐྱོང་མཆོག་གིས་སྦེལ་ཀོབ་བོད་ཁྱིམ་སློབ་གྲྭའི་དགེ་ལས་སློབ་ཕྲུག་ཡོངས་ལ་གསུང་བཤད་གནང་སྐབས་གཙོ་བོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་གཞིར་བཞག་ཐོག་བཀའ་ཤག་སྐབས་བཅུ་དྲུག་པའི་འཕྲལ་ཕུགས་ཀྱི་དམིགས་ཡུལ་དང་ལས་དོན་གནང་ཕྱོགས། དཀྲོག་གཏམ་རིགས་ལ་ཁ་གཡེང་མིག་གཡེང་བྱས་ནས་མ་བསྡད་པར་བོད་སྤྱི་པའི་དོན་དུ་ཚང་མས་མཉམ་རུབ་ཀྱིས་ནུས་པ་སྤུང་དགོས་པ། བཀའ་ཤག་སྐབས་བཅུ་དྲུག་པའི་ངོས་ནས་ལས་དོན་ག་རེ་བརྩམས་པ་ཡིན་ནའང་ཕྱི་གསལ་ནང་གསལ་གནང་རྒྱུ་ཡིན་པའི་གལ་གནད་སོགས་ཀྱི་སྐོར་གསུང་བཤད་གནང་རྗེས་དྲི་བ་ཁག་ལ་ལན་འདེབས་ཁ་གསལ་གནང་ཡོད།
ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་བྱེས་ཀྱི་གདན་ས་ཆེན་མོ་སེ་ར་བླ་སྤྱི་དང་། སེར་སྨད་ཐོས་བསམ་ནོར་གླིང་གྲྭ་ཚང་། སེར་བྱེས་མཁས་སྙན་གྲྭ་ཚང་། ཐེག་མཆོག་རྣམ་གྲོལ་བཤད་སྒྲུབ་དར་རྒྱས་གླིང་། འབྲི་གུང་བཀའ་བརྒྱུད་ཐུབ་བསྟན་བཤད་སྒྲུབ་བྱང་ཆུབ་གླིང་། པད་མ་གསང་སྔགས་ཆོས་འཁོར་གླིང་། ཀརྨ་བཀའ་བརྒྱུད་དགོན་པ། ས་སྐྱ་བརྩེ་ཆེན་ཆོས་འཁོར་གླིང་། འབྲུག་དཀར་སྒྲུབ་བརྒྱུད་ཐོས་བསམ་དར་རྒྱས་གླིང་། བཀྲ་ཤིས་ལྷུན་པོ་དགོན་པ་བཅས་སུ་མཆོད་མཇལ་དུ་ཕེབས་འབྱོར་སྐབས་དགོན་པའི་མཁན་པོ་དང་དགེ་འདུན་པ་སོགས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་གནང་ཡོད། སྐབས་དེར་དཔལ་ལྡན་སྲིད་སྐྱོང་མཆོག་གིས་མཁས་མང་དགེ་འདུན་འདུས་པ་རྒྱ་མཚོར་གསུང་བཤད་གནང་སྐབས་གཙོ་བོ་བཀའ་ཤག་སྐབས་བཅུ་དྲུག་པའི་ངོས་ནས་བཙན་བྱོལ་བོད་མིའི་བཅའ་ཁྲིམས་ནང་གང་འཁོད་ཡོད་པ་གཞིར་བཞག་ཐོག་ལས་དོན་གནང་རྒྱུའི་ཆོད་སེམས་བརྟན་པོ་ཡོད་པའི་སྐོར་དང་། རྒྱལ་སྤྱིའི་ནང་བསྟན་སློབ་གཉེར་བསྟི་གནས་ཁང་ཞིག་གསར་འཛུགས་གནང་རྒྱུའི་འཆར་གཞི་ཡོད་པ་དེ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡུན་རིང་གི་དགོངས་གཞི་ཡང་ཡིན་པ།
གཞན་ཡང་དཔལ་ལྡན་སྲིད་སྐྱོང་གིས་འོས་བསྡུ་སྐབས་མང་ཚོགས་ལ་ཁས་ལེན་གནང་བ་བཞིན་བཀའ་ཤག་སྐབས་བཅུ་དྲུག་པའི་ངོས་ནས་དེ་ལྟར་ལས་དོན་བསྒྲུབ་རྒྱུའི་ཆོད་སེམས་བརྟན་པོ་ཡོད་པ། རྡོག་རྩ་གཅིག་སྒྲིལ་ནི་བོད་པའི་སྟོབས་ཤུགས་ཡིན་སྟབས་མང་ཚོགས་ཁྲོད་ཆབ་སྲིད་ཀྱི་ལྟ་བ་ལངས་ཕྱོགས་མི་འདྲ་བ་ཡོད་ཀྱང་ཚང་མས་བོད་པའི་བདེན་པའི་འཐབ་རྩོད་ཆེད་དུ་ཆོལ་ཁ་དང་། ཆོས་ལུགས། ལུང་ཚན། ཆབ་སྲིད་ཀྱི་ལྟ་བ་ལངས་ཕྱོགས་མི་འདྲ་བ་ཡོད་པ་དབྱེ་བ་མེད་པར་རྡོག་རྩ་གཅིག་སྒྲིལ་དང་མཐུན་སྒྲིལ་གནང་དགོས་པ། ཁག་གཅིག་གིས་རྐང་བཙུགས་ནས་བོད་པའི་མཐུན་སྒྲིལ་གཏོར་བཤིག་གཏོང་སླད་བོད་པའི་སྤྱི་ཚོགས་ཁྲོད་དྲང་བདེན་མ་ཡིན་པའི་གནས་ཚུལ་དང་དཀྲོག་གཏམ་རིགས་སྤེལ་བཞིན་ཡོད་པས། བོད་མི་སྤྱི་བོ་གནམ་བསྟན་ཡོངས་ནས་དེ་དག་ལ་མགོ་འཁོར་ནས་མ་བསྡད་པར་རྡོག་རྩ་གཅིག་སྒྲིལ་གནང་དགོས་པའི་གལ་གནད། བཀའ་ཤག་སྐབས་བཅུ་དྲུག་པའི་ངོས་ནས་ལས་དོན་གང་བརྩམས་པ་ཡིན་ནའང་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་པ་གཞིར་བཞག་ཐོག་ཁྲིམས་སྒྲིག་ཁག་ལ་བརྩི་སྲུང་ཞུས་ཏེ་ལས་དོན་བསྒྲུབ་རྒྱུའི་ཆོད་སེམས་བརྟན་པོ་ཡོད་པ། དེ་བཞིན་བོད་རྒྱའི་དཀའ་རྙོག་སེལ་ཐབས་དང་། བཙན་བྱོལ་བོད་མིའི་བདེ་དོན་ཆེད་དུ་ལྟ་རྟོག་གནང་རྒྱུའི་ཆོད་སེམས་བརྟན་པོ་ཡོད་པ་སོགས་ཀྱི་སྐོར་གསུང་བཤད་གནང་ཡོད།
གཞན་ཡང་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཕྱི་ཟླ་ ༠༦ ཚེས་ ༠༡ ཉིན་སྦེལ་ཀོབ་བདེ་སླར་སཾ་བྷོ་ཊ་སི་ཝི་པི་ཉིན་སློབ་ཏུ་འཚམས་གཟིགས་དང་འབྲེལ་རྐང་རྩེད་སྤོ་ལོའི་རྩེད་ཐང་དང་། ཚན་རིག་སྐྱེད་ཚལ་ཞིག་དབུ་འབྱེད་གནང་ཡོད་པ་མ་ཟད། བདེ་སླར་གཞིས་གྲོང་ཁག་བཅུ་གསུམ་དང་། ས་གནས་འགོ་འཛིན་ལས་ཁུངས། ས་གནས་རང་བདེན་ཚོགས་ཆུང། མཉམ་འབྲེལ་དང་སྡེ་ཚན་ཁག་གི་ལས་ཁུངས། དེ་བཞིན་ལུགས་བསམ་གཞིས་གྲོང་ ༥ དང་ ༦ ། ས་གནས་འགོ་འཛིན་ལས་ཁུངས། མཉམ་འབྲེལ། རྩིས་ཞིབ་ལས་ཁུངས་བཅས་ལ་འཚམས་གཟིགས་གནང་གྲུབ་རྗེས་སྦེལ་ཀོབ་ལུགས་བསམ་གཞིས་ཁོངས་སུ་ཡོད་པའི་ཚེ་རིང་དགེ་འཕེལ་གླིང་བགྲེས་ཤག་ཏུ་ཆེད་ཕེབས་ཀྱིས་ལས་བྱེད་བགྲེས་ཡོལ་བ་ཁག་གཅིག་དང་ཐུག་འཕྲད་ཀྱིས་འཚམས་འདྲིའི་བཀའ་མོལ་ལྷུག་པོ་གནང་ཡོད་པ་བཅས།།
