༄༅། །ཀིརྒིསྟཱན་གྱི་གྲོང་ཁྱེར་བྷེ་ཤི་ལེག་ནང་གི་ཨེ་ཤི་ཡ་སྨན་གྱི་སློབ་གཉེར་ཁང་ (Asian Medical Institute) དུ་སློབ་སྦྱོང་བྱེད་བཞིན་པའི་བོད་ཕྲུག་བསྟན་འཛིན་ཡེ་ཤེས་ལགས་སུ་ཕྱི་ལོ་ ༢༠༢༢ ལོའི་ན་གཞོན་ཚན་རིག་པ་རྩེ་ཕུད་ཀྱི་གཟེངས་རྟགས་ཐོབ་འདུག

དེ་ཡང་བསྟན་འཛིན་ཡེ་ཤེས་ལགས་དེ་སྔོན་སུ་ཇ་དང་སྦེལ་ཀོབ་བོད་ཁྱིམ་གཉིས་སུ་སློབ་སྦྱོང་གནང་འདུག་ཅིང་། དེ་རྗེས་ཀིརྒིསྟཱན་ (Kyrgyzstan) ནང་ཡོད་པའི་ཨེ་ཤི་ཡ་སྨན་གྱི་སློབ་གཉེར་ཁང་དུ་འཛུལ་ཞུགས་ཀྱིས་ཕྱི་ལོ་ ༢༠༢༡ ལོར་ཉམས་ཞིབ་སློབ་མ་རྩེ་ཕུད་ཀྱི་གཟེངས་རྟགས་ཐོབ་འདུག 

རྒྱ་གར་ནང་དུ་སློབ་གཉེར་གནང་བའི་སྐབས་ཕྱི་ལོ་ ༢༠༡༥ ལོར་འཛིན་རིམ་བཅུ་གཉིས་ཡིན་སྐབས་སུ་རྒྱལ་ཡོངས་བོད་ཡིག་རྩོམ་ཡིག་འགྲན་སྡུར་ཁྲོད་ཨང་རིམ་དང་པོ་སོན། དེ་བཞིན་ཕྱི་ལོ་༢༠༢༠ ལོར་ཧར་ཝཊ་མཐོ་སློབ་ཀྱི་སྨན་སྦྱོར་རིག་པ་དང་ནད་རིགས་སྔོན་འགོག་རིག་པ་སྡེ་ཚན་ནས་མཐར་སོན་ལག་ཁྱེར་གནང་། གཞན་ཡང་ཁོང་གིས་ཚན་རིག་དང་སྨན་དཔྱད་རིག་པར་ཞབས་འདེགས་དང་འཛམ་གླིང་འཕྲོད་བསྟེན་ལྷན་ཚོགས་ཀྱིས་གོ་སྒྲིག་ཞུས་པའི་ལས་གཞི་ཁག་ལ་མཉམ་ཞུགས་གནང་བར་འཛམ་གླིང་འཕྲོད་བསྟེན་ལྷན་ཚོགས་ནས་ཆེ་བསྟོད་གཟེངས་རྟགས་སོགས་གནང་འདུག 

སློབ་གྲྭ་འགྲིམས་པའི་སྐབས་ཕྱི་ལོ་ ༢༠༡༤ ནས་ ༢༠༡༦ བར་ཁོང་གིས་བོད་ཡིག་རྩོམ་སྒྲིག་པ་དང་། སྦེལ་ཀོབ་བོད་ཁྱིམ་གྱི་སློབ་ཕྲུག་ཚོགས་པའི་ཚོགས་མི་གནང་། ཀིརྒིསྟཱན་གྱི་སྨན་གྱི་མཐོ་སློབ་ཏུ་ལོ་བསྟུད་མར་ཨང་རིམ་རྩེར་སོན་གྱིས་ཀུན་གྱི་མིག་དཔེར་འོས་པའི་སློབ་མ་ཞིག་ཏུ་གྱུར་ཡོད་པ་བཅས།།