༄༅། །འདི་གར་བེལ་ཇི་ཡམ་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༦ ཚེས་ ༤ རེས་གཟའ་སྤེན་པའི་ཉིན་བེལ་ཇི་ཡམ་མོད་སྨད་ས་གནས་སྐྱིད་སྡུག་གི་གོ་སྒྲིག་འོག་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་བོད་ལུགས་ལྟར་དགུང་གྲངས་ ༨༨ བཞེས་པའི་༧སྐུའི་འཁྲུངས་ལྷ་དབྱར་གསོལ་སྲུང་བརྩི་གཟབ་རྒྱས་ཞུས་སོང་། མཛད་སྒོའི་ཐོག་མར་སྐུ་མགྲོན་རྣམ་པ་དང་མདོ་སྨད་ས་རྒྱུན་རྣམ་པས་༧གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེ་བཞུགས་ཁྲིར་གདན་འདྲེན་ཞུས་གྲུབ་བསྟུན། མདོ་སྨད་ས་རྒྱུན་རྣམ་པས་མཎྜལ་རྟེན་གསུམ་འདེགས་འབུལ་ཞུས་ཡོད།
དེ་ཡང་བེལ་ཇི་ཡམ་མདོ་སྨད་ས་གནས་སྐྱིད་སྡུག་གི་ཚོགས་གཙོ་ཙ་ཡུས་སྐལ་བཟང་ལགས་ཀྱིས་མཛད་སྒོ་དབུ་འབྱེད་ཀྱི་གསུང་བཤད་གནང་དོན། བེལ་ཇི་ཡམ་མདོ་སྨད་ས་གནས་སྐྱིད་སྡུག་ཐོག་མར་གསར་འཛུགས་གནང་དགོས་པའི་དམིགས་ཡུལ་གཙོ་བོ་གཉིས་ཡོད་པ་དང་། དེ་ནི་བོད་མིའི་སྒྲིག་འཛུགས་ཀྱིས་མཛུབ་སྟོན་ཅི་ཞིག་གནང་ཡང་ཀར་ཀོར་དང་ཐེ་ཚོམ་སྤུ་ཙམ་མེད་པར་ཤར་བསྐྱོད་བྱ་རྒྱུས་མཚོན་ལས་དོན་གང་ལའང་དབུ་འོག་དཔུང་འདེགས་ཞུ་རྒྱུ་དེ་ཡིན་པ་དང་། དམིགས་ཡུལ་གཞན་དེ་ནིི་བེལ་ཇི་ཡམ་ཁུལ་གྱི་མདོ་སྨད་རྒྱ་ཆེའི་མང་ཚོགས་ཀྱི་དཀའ་ངལ་ཕྲ་མོ་ཇི་འཕྲད་སེལ་ཐབས་ཞུ་རྒྱུ་བཅས་ཡིན་སྐོར་གསུང་གནང་སོང་།
མཛད་སྒོའི་སྐུ་མགྲོན་གཙོ་བོ་བེལ་ཇི་ཡམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་གསུང་བཤད་གནང་དོན། དེ་རིང་མདོ་སྨད་སྐྱིད་སྡུག་ནས་༧གོང་ས་མཆོག་གི་འཁྲུངས་ལྷ་དབྱར་གསོལ་གོ་སྒྲིག་གང་ལེགས་གནང་འདུག་པར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་དང་། སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གིས་སྐུ་ན་ཕྲ་མོའི་དུས་ནས་བོད་བསྟན་སྲིད་ཀྱི་མཛད་འཁུར་དང་དུ་བླངས་ནས་ང་ཚོ་བོད་མིིའི་བདེ་དོན་ཁོ་ནར་སྐུ་ཚེ་ཧྲིལ་པོ་སྐུ་ལས་བསྐྱོན་ཡོད་པ་དང་། ང་ཚོ་བོད་མིར་མཚོན་ན། ཁོང་ལས་ལྷག་པའི་དབུ་ཁྲིད་ཅིག་མེད་པར་སོང་། བོད་མི་སྤྱི་བོ་གནམ་བསྟན་པ་ཚང་མས་དུས་དང་རྣམ་པ་ཀུན་ཏུ་ཞལ་དུ་མེད་པའི་ཁོང་གི་བཀའ་དྲིན་ཡིད་ལ་དྲན་པའི་ཐོག་བོད་མིའི་འཐབ་རྩོད་ལ་ནུས་པ་མཉམ་སྤུང་གནང་དགོས་པའི་བསྐུལ་མ་ཡང་གནང་སོང་། གཞན་ཡང་ཁོང་གིས་བཀའ་ཤག་སྐབས་ ༡༦ པའི་གལ་ཆེའི་ལས་འཆར་ཁག་གཉིས་སྟེ། རིང་མིན་ཕྱི་ཟླ་བདུན་པའི་ནང་མི་འབོར་གྲངས་བཤེར་གནང་འཆར་དང་དང་བླངས་གཞོན་སྐྱེས་བོད་དོན་ཞུ་གཏུག་ལས་འགུལ་གཉིས་ནང་རྒྱ་ཆེའི་མང་ཚོགས་ངོས་ནས་ངེས་པར་རྒྱབ་སྐྱོར་དང་ཆ་ཤས་བླངས་རོགས་ཅེས་གསུངས།
བེལ་ཇི་ཡམ་མདོ་སྨད་སྐྱིད་སྡུག་གི་ཚོགས་གཞོན་བཟོད་པ་ལགས་ནས་ཐུགས་རྗེ་ཆེ་ཞུའི་གསུང་བཤད་གནང་བ་དང་སྦྲགས་དགོངས་ཚོགས་ཀྱི་མདོ་འཛིན་པ་ཁག་གིས་སྙན་ངག་གྱེར་འདོན་གྱི་མཛད་རིམ་གྲུབ་བསྟུན་ས་ཁུལ་ཁག་བཞིར་ཆ་བགོས་ཞུས་པའི་མདོ་སྨད་རྒན་གཞོན་ཚོས་བོད་ཀྱི་སྲོལ་རྒྱུན་རྐང་བྲོ་གླུ་གཞས་ཁག་གཅིག་གཟིགས་འབུལ་ཞུས་གནང་ཡོད། ཐེངས་འདིའི་འཁྲུངས་ལྷ་དབྱར་གསོལ་གྱི་མཛད་སྒོར་བོད་རིགས་ཚོགས་པ་དང་གཞོན་ནུ། བུད་མེད། དབུས་གཙང་དང་མདོ་སྟོད་བཅས་ཀྱི་ཚོགས་པ་ཁག་གི་སྐུ་ཚབ་རྣམ་པ་ཡང་ངོ་བཅར་ཞུས་འདུག་ཅིང་། སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་དང་ལྷན་དོན་ཁང་གི་དྲུང་ཆེ་འཕྲིན་ལས་དབང་འདུས་དང་རྩིས་པ་བསྟན་འཛིན་ལེགས་བཤད་རྣམ་གཉིས་ཀྱང་ལྷན་བཅར་ཞུས་ཡོད་པ་བཅས།།
