༄། །ཕྱི་ལོ་ ༢༠༢༢ ཟླ་ ༦ ཚེས་ ༢༩   རེེས་གཟའ་ལྷག་པ་ཉིན་བལ་ཡུལ་མཆོད་འཇོར་ས་གནས་འགོ་འཛིན་གསར་རྙིང་དབར་རྩིས་སྤྲོད་རྩིས་ལེན་ལེགས་པར་གྲུབ་རྗེས་ས་འགོ་རྙིང་པ་རྩིབས་རི་ལོ་པཎ་སྤྲུལ་སྐུ་ངག་དབང་མཆོག་གྲུབ་ལགས་ཀྱིས་འདས་པའི་ལས་རིམ་གྱི་ཉམས་མྱོང་དང་། སྤྱི་པའི་ལས་དོན་གནང་སྐབས་དཀའ་ངལ་ལ་གདོང་ལེན་གནང་ཕྱོགས་སོགས་ཀྱི་བརྒྱུད་རིམ་དང་ལས་དོན་འཐུས་ཚང་གི་འབྲས་བུ་མི་དམན་པ་བྱུང་བའི་སྐོར་གསལ་བཤད་དང་། ས་གནས་འགོ་འཛིན་གསར་པ་ཕུར་བུ་བཀྲ་ཤིས་ལགས་ཀྱིས་མ་འོངས་ལས་དོན་བྱེད་ཕྱོགས་སོགས་བོད་མིའི་སྒྲིག་འཛུགས་ཀྱི་བཀའ་དགོངས་བཞིན་མི་མང་དགོས་མཁོ་ཅན་གྱི་རེ་བ་གང་ཐུབ་བསྐོང་རྒྱུའི་དམ་བཅའ་བརྟན་པོའི་ཐོག་ལས་འགོ་འཛུགས་རྒྱུ་སོགས་ཀྱི་སྐོར་གསུང་བཤད་གནང་། གཞན་ཡང་མཛད་སྒོའི་སྐུ་མགྲོན་གཙོ་བོ་བལ་དོན་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་དང་། དམིགས་གསལ་སྐུ་མགྲོན་བོད་མི་མང་སྤྱི་འཐུས་བཀྲ་ཤིས་དོན་གྲུབ་ལགས། བོད་མི་མང་སྤྱི་འཐུས་དབྲ་ཙ་བསོད་ནམས་ནོར་བུ་ལགས། བལ་དོན་དྲུང་ཆེ་དང་རྒྱ་འཕགས་ས་འགོ་གཅིག་ལྕོགས་ཀརྨ་རྒྱལ་མཚན་ལགས། མཆོད་འཇོར་ས་འགོའི་ལས་ཚབ་བསྟན་འཛིན་ཆོས་སྒྲོན་ལགས་སོགས་ཀྱིས་རིམ་བཞིན་གསུང་བཤད་གནང་།དེ་བཞིན་སྐུ་མགྲོན་དུ་མཆོད་འཇོར་ས་འཐུས་ཚོགས་གཞོན་དོན་ལྡན་ལགས་དང་། མཆོད་རྟེན་དང་འཇོར་པ་ཊི་ས་གནས་རང་བདེན་ཚོགས་གཙོ་རྣམ་གཉིས། ས་གནས་འགོ་འཛིན་ཟུར་པ་རྣམ་གསུམ། ས་གནས་རྩིས་ཞིབ་འགན་འཛིན། ཡན་ལག་སྨན་རྩིས་ཁང་གི་འགན་འཛིན། ས་གནས་མཐོ་སློབ་གཉིས་ཀྱི་དབུ་འཛིན་རྣམ་གཉིས། ཕྱོགས་མཚུངས་དགོན་སྡེ་གྲྭ་ཚང་ཁག་གི་ལས་ཀྱི་སྣེ་མོ་བ། ཆོལ་ཁ་གསུམ་དང་ཚོགས་སྐྱིད་ཁག་གི་ཚོགས་གཙོ་བརྒྱ་དཔོན་རྣམ་པ་བཅས་དབུ་བཞུགས་ཐོག་སེར་སྐྱ་མི་མང་བརྒྱ་ཕྲག་ལྔ་ལ་ཉེ་བ་ཚོགས་ཁང་ཡོངས་སུ་ཁེངས་པ་ལྟ་བུའི་མཛད་རིམ་ལེགས་པར་གྲུབ་པའི་འཇུག་སྡོམ་དུ་ལས་དྲུང་པ་སངས་དབང་འདུས་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་རྒྱལ་ཁའི་ངང་མཇུག་སྒྲིལ་ཡོད་པ་བཅས།།