༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དཔལ་ལྡན་སྟོད་རྒྱུད་གྲྭ་ཚང་དང་དཔལ་ལྡན་སྨད་རྒྱུད་གྲྭ་ཚང་གཉིས་ནས་ཇི་ལྟར་གསོལ་བ་བཏབ་པ་ལྟར་བཀའ་བཞེས་བཟང་པོ་སྨིན་སྩལ་གྱིས་བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་བདེ་མཆོག་ལཱུ་ཨི་པའི་བཀའ་དབང་བཀའ་དྲིན་སྩལ་རྒྱུ་དང་། དེ་ཡང་ཕྱི་ལོ་ ༢༠༢༢ ཟླ་ ༧ ཚེས་ ༨ ཉིན་གྱི་སྔ་དྲོ་སྔོན་འགྲོའི་སྟ་གོན་གྱི་རིམ་པ་དང་། ཚེས་ ༩ དང་ ༡༠ ཉིན་གཉིས་རིང་དངོས་གཞིའི་བཀའ་དབང་སྩལ་གཏན་ཁེལ་ཡོད་པ་དང་།
གཞན་ཡང་དགའ་ལྡན་ཕོ་བྲང་ཡིག་ཚང་ནས་ཕྱི་ལོ་ ༢༠༢༢ ཟླ་ ༦ ཚེས་ ༨ ཉིན་གསལ་བསྒྲགས་སྤེལ་བ་ལྟར་ན། ཀུན་གྱིས་མཁྱེན་གསལ་ལྟར་ཕྱི་ལོ་ ༢༠༢༢ ཟླ་ ༧ ཚེས་ ༨ ནས་ཉིན་གྲངས་གསུམ་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་སྩལ་གཏན་འཁེལ་བའི་དཔལ་འཁོར་ལོ་སྡོམ་པ་ལཱུ་ཨི་པའི་བཀའ་དབང་སྐབས་ཆོས་ཞུ་བ་ཡོངས་ནས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་དོན་གཉེར་སྦྱངས་པ་ཡོད་ཐོག བྱུང་ན་ལཱུ་ཨི་པའི་བདག་བསྐྱེད་དང་། མ་མཐའ་ནའང་དག་པ་གསུམ་གྱི་རྣལ་འབྱོར་ཁ་འདོན་དུ་ཁས་ལེན་ངེས་པར་དགོས་པ་དེ་ལུགས་དབང་ཞུ་བ་ཡོངས་ཀྱིས་དགོངས་འཇགས་ཡོད་པ་ཞུ། དགའ་ལྡན་ཕོ་བྲང་ཡིག་ཚང་ནས། ཕྱི་ལོ་ ༢༠༢༢ ཟླ་ ༦ ཚེས་ ༨ ལ། །
