༄༅། །འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན།  ཕྱི་ལོ་ ༢༠༢༢ ཟླ་ ༦ ཚེས་ ༧ དང་ ༨ ཉིན་གྲངས་གཉིས་རིང་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་གོ་སྒྲིག་འོག་ཕྱི་ལོ་ ༢༠༢༢ ལོའི་བོད་ཀྱི་རིག་གཞུང་དང་སྒྱུ་རྩལ་ལས་གཞིའི་མཐའ་མའི་འདེམས་སྒྲུག་ཆེད་སྙན་འབུལ་བ་རྣམས་ཀྱི་ངོ་འཕྲད་འདྲི་གླེང་དང་དྲ་ཐོག་འདྲི་གླེང་གི་ལས་རིམ་འགོ་བཙུགས་གནང་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་ཚོགས་མི་བཞི་ལས་གྲུབ་པའི་འདེམས་སྒྲུག་ཚོགས་ཆུང་གིས་རྡ་ས་ཉེ་འཁྲིས་སུ་གནས་སྡོད་སྙན་འབུལ་བ་རྣམས་ལ་ངོ་འཕྲད་འདྲི་གླེང་དང་། ཕྱོགས་མཐའ་ཁག་ཏུ་ཡོད་པའི་སྙན་འབུལ་བ་རྣམས་ལ་དྲ་རྒྱའི་བརྒྱུད་དྲི་བ་དྲིས་ལན་གནང་ཡོད། སང་ཉིན་ཡང་སྙན་འབུལ་ལྷག་འཕྲོས་རྣམས་ལ་མུ་མཐུད་དྲི་བ་དྲིས་ལན་གནང་སྟེ་འདེམས་སྒྲུག་གི་ལས་རིམ་མཇུག་བསྡུ་རྒྱུ་ཡིན། ཐེངས་འདིར་སྙན་འབུལ་བ་ཁྱོན་བསྡོམས་མི་གྲངས་ ༧༤བྱུང་ཡོད་ཁོངས་ནས་ ༧༡ མཐའ་མའི་འདེམས་སྒྲུག་ནང་སླེབས་ཐུབ་པ་བྱུང་ཡོད། ཁོང་རྣམས་ནས་ཉམས་ཞིབ་དང་། རྩོམ་སྒྱུར། བཟོ་རིག ཟློས་གར། པར་སྐྲུན་སོགས་ཀྱི་ལས་འཆར་ཐོག་འཚང་སྙན་ཕུལ་ཡོད།སྤྱིར་བོད་ཀྱི་རིག་གཞུང་དང་སྒྱུ་རྩལ་གྱི་ལས་འཆར་ནི་བོད་ཀྱི་སྲོལ་རྒྱུན་རིག་གཞུང་དང་། དེང་རབས་བོད་ཀྱི་བཟོ་རིག་སྒྱུ་རྩལ་རྒྱུན་འཛིན་དང་གོང་སྤེལ་སླད། བོད་ཀྱི་རིག་གཞུང་དང་། སྐད་ཡིག སྒྱུ་རྩལ་ཁོ་ནའི་ལས་འཆར་ཐོག་ཞབས་འདེགས་ཞུ་མཁན་ནམ་ལས་འཆར་འདྲ་མིན་སྤེལ་མཁན་ཚོགས་སྒེར་ཁག་ལ་རོགས་དངུལ་ཧིན་སྒོར་འབུམ་གཅིག་ནས་འབུམ་གསུམ་བར་རམ་འདེགས་ཞུ་ཕྱིར་ཡིན་པ་དང་། ལས་གཞི་འདི་བཞིན་ཆོས་རིག་ལས་ཁུངས་ནས་གོ་སྒྲིག་དང་ཨ་རིའི་རོགས་ཚོགས་(USAID) ནས་དཔལ་འབྱོར་མཐུན་འགྱུར་གནང་བ་ཞིག་ཆགས་ཡོད་པ་བཅས།།