༄༅། །བོད་མིའི་སྒྲིག་འཛུགས་ཀྱི་དྲུང་ཆེ་ཟུར་པ་ཐུབ་བསྟན་བསམ་འཕེལ་ལགས་ཕྱི་ལོ་ ༢༠༢༢ ཟླ་བ་ ༠༦ ཚེས་ ༠༤ ཉིན་གྱི་སྔ་དྲོ་གློ་བུར་དུ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་ཡོད། 

ཐུབ་བསྟན་བསམ་འཕེལ་ལགས་ཀྱིས་དེ་སྔོན་ཕྱི་དྲིལ་དྲུང་ཆེ་དང་། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་སོགས་གནང་སྟེ་མི་ངོ་ ༤༠ ཙམ་བོད་མིའི་སྒྲིག་འཛུགས་སུ་ལྷག་བསམ་གཡོ་མེད་ཀྱིས་སྲི་ཞུའི་ཞབས་ཕྱི་ཞུས་ཡོད་པས། བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ནས་ཁོང་ལྟ་བུའི་མི་སྣ་མཛད་རྗེས་ཅན་ཞིག་འདས་གྲོངས་སུ་གྱུར་བར་ཡིད་སྐྱོ་གདུང་དྲག་པོས་མྱ་ངན་གུས་འདུད་ཞུ་རྒྱུ་ཡིན། 

ཁོང་གིས་བོད་དོན་སྐོར་རྒྱ་གར་དང་རྒྱལ་སྤྱིའི་གསར་ཤོག་དང་དུས་དེབ་ཆེ་གྲས་མང་པོའི་ནང་རྩོམ་ཡིག་སྤེལ་གནང་ཡོད་པ་མ་ཟད། ལྷག་པར་ཨིན་སྐད་ཐོག་ (Falling Through the Roof) དང་། བོད་ཀྱི་ཏཱ་ལའི་བླ་མ། (The Dalai Lamas of Tibet) ཟངས་རི། (Copper Mountain)་ལྟ་བུའི་དཔེ་དེབ་བརྩམས་གནང་ཡོད་པ་རེད། 

ཕྱི་དྲིལ་དྲུང་ཆེ་ཟུར་པ་ཁོང་འདས་གྲོངས་སུ་གྱུར་རྗེས་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས། ང་ཚོས་སྐུ་ངོ་ཐུབ་བསྟན་བསམ་འཕེལ་ལགས་ཀྱི་སྲི་ཞུའི་མཛད་རྗེས་དང་། ཡིད་འགུལ་ཐེབས་འོས་པའི་མི་གཤིས། ལས་གནས་འདྲ་མིན་ཐོག་ནས་བོད་ཀྱི་རྩ་དོན་ལ་ཞབས་ཞུ་ལྷོད་མེད་བསྒྲུབས་པར་མངོན་བསྟོད་ཞུ་བཞིན་ཡོད། ཁོང་གི་ནང་མི་ཉེ་འབྲེལ་ལྟོས་བཅས་ཡོངས་ལ་སེམས་སྡུག་ཆེ་བའི་དུས་སྐབས་འདིར་བསྔོ་སྨོན་དང་བཅས་ཐུགས་གསོ་ཞུ་རྒྱུ་ཡིན། ཞེས་གསུངས་ཡོད། 

དམ་པ་ཁོང་ནི། ཕྱི་ལོ་ ༡༩༥༦ ཟླ་ ༡༡ ཚེས་ ༠༢ ཉིན་བོད་ཀྱི་རྒྱལ་ས་ལྷ་སར་ཕ་ཟླ་བ་ལགས་དང་མ་ཚེ་རིང་སྒྲོལ་མ་གཉིས་ཀྱི་སྲས་སུ་སྐྱེས་ཤིང་། དགུང་ལོ་དྲུག་ལ་ཕེབས་སྐབས་རྒྱ་གར་ལ་བཙན་བྱོལ་དུ་ཕེབས་རྗེས་བོད་ཕྲུག་ཁྱི་སྡེ་ནས་སློབ་སྦྱོང་གནང་ཡོད་པ་དང་། དེ་ནས་ཀ་སྦུག་ཏུ་རྟེན་གཞི་བྱས་པའི་གྷི་ར་ཧམ་ཨིན་ཇི་སློབ་གྲྭ་ (Dr. Graham) ནས་སློབ་མཐར་སོན་རྗེས་ལྡི་ལི་གཙུག་ལག་སློབ་གཉེར་ཁང་གི་ཁྱབ་ཁོངས་སན་ཊི་སི་ཊེ་ཧྥན་མཐོ་སློབ་ཁང་ (St. Stephen’s College) དུ་ལོ་རྒྱུས་རིག་པའི་ཐོག་ཉེ་བའི་གཙུག་ལག་རབ་འབྱམས་པ་དང་། ལྡི་ལི་གཙུག་ལག་སློབ་གཉེར་ཁང་དུ་ལོ་རྒྱུས་རིག་པའི་ཐོག་གཙུག་ལག་རབ་འབྱམས་པའི་སློབ་སྦྱོང་གནང་ཡོད། དེ་རྗེས་ཨ་རིའི་བོད་མིའི་སློབ་ཡོན་ལས་གཞི་འོག་ཨ་རིའི་ནིའུ་ཡོག་གྲོང་ཁྱེར་དུ་ཡོད་པའི་ཀོ་ལུམ་བྷི་ཡ་གཙུག་ལག་སློབ་གཉེར་ཁང་ནས་གསར་འགོད་ལས་རིགས་ཐོག་སློབ་སྦྱོང་ལེགས་པར་ཐོན་ཡོད། 

ཕྱི་ལོ་ ༡༩༨༠ ཟླ་ ༡༠ ཚེས་ ༠༡ ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་སུ་གནས་བརྒྱད་པ་ཚོད་ལྟའི་ཐོག་དྲིལ་བསྒྲགས་ཨིན་ཡིག་རྩོམ་སྒྲིག་པ་རྒན་དྲུང་དུ་བསྐོ་གཞག་དང་། ཕྱི་ལོ་ ༡༩༨༡ ཟླ་ ༧ ཚེས་ ༢༠ ཉིན་ཕྱི་དྲིལ་ལས་ཁུངས་སུ་གནས་བརྒྱད་པ་རང་འཇགས་ཐོག་དྲིལ་བསྒྲགས་རྒན་དྲུང་ངོ་མར་བསྐོ་གཞག ཕྱི་ལོ་ ༡༩༨༢ ཟླ་ ༡༢ ཚེས་ ༢༤ ཉིན་ཕྱི་དྲིལ་ལས་ཁུངས་སུ་དམིགས་བསལ་དགོངས་བཞེས་ཀྱིས་གནས་བདུན་པར་གནས་སྤར་གྱི་དྲིལ་བསྒྲགས་ཁང་གི་དྲུང་གཞོན་དུ་བསྐོ་གཞག  ཕྱི་ལོ་ ༡༩༨༢ ཟླ་ ༡༢ ཚེས་ ༢༤ ཉིན་ཕྱི་དྲིལ་ལས་ཁུངས་སུ་དྲུང་གཞོན་གནས་རིམ་ཐོག་དམིགས་གསལ་གནས་སྤར། ཕྱི་ལོ་ ༡༩༨༦ ཟླ་ ༤ ཚེས་ ༠༡ ཉིན་སྐུ་སྒེར་ཡིག་ཚང་གི་ཨིན་དྲུང་གནས་རིམ་ཐོག་དྲུང་གཞོན་དུ་གནས་སྤོས། ཕྱི་ལོ་ ༡༩༨༧ ཟླ་ ༣ ཚེས་ ༡༦ ཉིན་དྲིལ་བསྒྲགས་ལས་ཁུངས་ཀྱི་དྲུང་གཞོན་དུ་གནས་སྤོས། ཕྱི་ལོ་ ༡༩༩༡ ཟླ་ ༤ ཚེས་ ༠༡ ཉིན་ཨ་རི་སྐུ་ཚབ་དོན་གཅོད་ལས་ཁུངས་ཀྱི་དྲུང་གཞོན་དུ་གནས་སྤོས།

ཕྱི་ལོ་ ༡༩༩༢ ཟླ་ ༨ ཚེས་ ༡ ཉིན་བལ་ཡུལ་ (Tibetan Refugee Welfare Office, Kathmandu) དུ་ཟུང་དྲུང་གནས་རིམ་དུ་བསྐོ་གཞག ཕྱི་ལོ་ ༡༩༩༥ ཟླ་ ༨ ཚེས་ ༡༠ ཉིན་ཕྱི་དྲིལ་ཟུང་དྲུང་དུ་གནས་སྤོས། ཕྱི་ལོ་ ༡༩༩༦ ཟླ་ ༥ ཚེས་ ༠༡ ཉིན་ཕྱི་དྲིལ་ལས་ཁུངས་ཀྱི་དྲུང་འཕར་གནས་རིམ་དུ་གནས་སྤར། ཕྱི་ལོ་ ༡༩༩༦ ཟླ་ ༧ ཚེས་ ༢༥ ཉིན་ཕྱི་དྲིལ་ལས་ཁུངས་ཀྱི་དྲུང་འཕར་དུ་ལས་འགན་བཀོད་སྒྲིག ཕྱི་ལོ་ ༡༩༩༩ ཟླ་ ༠༡ ཚེས་ ༢༠ ཉིན་ཕྱི་དྲིལ་དྲུང་ཆེར་ལས་འགན་རང་འཇགས། ཕྱི་ལོ་ ༡༩༩༩ ཟླ་ ༠༡ ཚེས་ ༢༠ ཉིན་ཕྱི་དྲིལ་ལས་ཁུངས་ཀྱི་དྲུང་ཡིག་ཆེན་མོའི་གནས་རིམ་དུ་གནས་སྤར། ཕྱི་ལོ་ ༢༠༡༢ ཟླ་ ༣ ཚེས་ ༠༢ ཉིན་བོད་ཀྱི་སྲིད་བྱུས་ཉམས་ཞིབ་ཁང་གི་དྲུང་ཆེར་གནས་སྤོས། ཕྱི་ལོ་ ༢༠༡༦ ཟླ་ ༡༡ ཚེས་ ༠༢ ནས་ཕྱི་ལོ་ ༢༠༡༧ ཟླ་ ༡༡ ཚེས་ ༠༡ བར་ལོ་གཅིག་རིང་བགྲེས་ཡོལ་ཕར་འགྱངས། ཕྱི་ལོ་ ༢༠༡༧ ཟླ་ ༡༡ ཚེས་ ༠༢ ནས་ཕྱི་ལོ་ ༢༠༡༨ ཟླ་ ༡༡ ཚེས་ ༠༡ བར་སླར་ཡང་ལོ་གཅིག་རིང་བགྲེས་ཡོལ་ཕར་འགྱངས། ཕྱི་ལོ་ ༢༠༡༨ ཟླ་ ༡༡ ཚེས་ ༠༢ ཉིན་བགྲེས་ཡོལ་དུ་ཕེབས་པ་བཅས་དམ་པ་དེ་ཉིད་ཀྱིས་ད་བར་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་གཉིས་སུ་ལོ་ངོ་ ༣༨ ལྷག་རིང་སྲི་ཞུ་ལེགས་པར་བསྒྲུབས་གནང་ཡོད་པ་བཅས།།