༄༅། །འདི་གར་བྱང་ཨ་རི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་བ་ ༠༦ ཚེས་ ༡༨ ཉིན་ནིའུ་ཡོག་ནིའུ་ཇར་སི་བོད་རིགས་སྤྱི་མཐུན་ཚོགས་པའི་བློ་གསལ་སྐྱེས་ཚལ་བོད་ཀྱི་སྐད་ཡིག་དང་རིག་གཞུང་སློབ་གྲྭ་དབུ་བརྙེས་ནས་ལོ་ ༢༥ སོང་བའི་དུས་དྲན་སྲུང་བརྩི་གནང་བ་དང་། སློབ་གྲྭ་དེ་བཞིན་ ༡༩༩༦ ལོར་སློབ་ཕྲུག་བདུན་ལས་མེད་པ་ནས་དེང་སང་རེས་གཟའ་སྤེན་པ་ཉི་མ་ཉིན་སློབ་ཕྲུག་ ༤༥༠ རྒལ་བར་བོད་ཀྱི་སྐད་ཡིག་དང་རིག་གཞུང་སློབ་འཁྲིད་གནང་བཞིན་ཡོད་པ་རེད།

བྱང་ཨ་རི་སྐུ་ཚབ་དོན་གཅོད་ལས་ཁུངས་ལ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གི་འཚམས་གཟིགས་དང་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་གྱི་ཚོགས་ཆེན། སྐུ་ཚབ་དོན་གཅོད་རྣམ་པའི་ཚོགས་ཆེན་སོགས་ཀྱི་ལས་ཀའི་བྲེལ་འཚུབ་ཡོད་ཀྱང་། སློབ་གྲྭའི་དུས་དྲན་གལ་ཆེ་དོན་ཆེན་དུ་རྩིས་ནས་སྐུ་ཚབ་དོན་གཅོད་སྐུ་མགྲོན་དུ་མགྲོན་འབོད་གནང་སྐབས་སྐུ་ཚབ་ཏུ་རྒྱ་རིགས་འབྲེལ་མཐུད་པ་ཆེད་གཏོང་གནང་ཡོད།རྒྱ་རིགས་འབྲེལ་མཐུད་པས་སློབ་གྲྭ་དབུ་བརྙེས་ནས་ལོ་ངོ་ ༢༥ འཁོར་བའི་དུས་དྲན་ལ་བཅར་ནས། ཐོག་མར་སློབ་གྲྭའི་འགྲེམས་སྟོན་དབུ་འབྱེད་དང་འཛིན་རིམ་ཁག་སོ་སོའི་འབྲི་ཀློག་ཀྱི་འགྲེམས་སྟོན་གནང་བ་ལ་འཚམས་གཟིགས་དང་། མཛད་སྒོའི་སྐབས་སློབ་གྲྭའི་སློབ་མ་རྣམས་ནས་ལོ་ངོ་ཉེར་ལྔའི་དྲན་རྟེན་དུས་དེབ་བཏོན་གནང་བ་དབུད་འབྱེད། སློབ་གྲྭའི་སྤྱི་ཁྱབ་སློབ་སྟོན་པ་སྐུ་ཞབས་པད་རྡོར་ལགས་ལ་སློབ་གྲྭ་དབུ་བརྙེས་ནས་ད་བར་ཕྱག་ལས་གནང་བར་ལེགས་གསོལ་བྱ་དགའ་ཕུལ་ཡོད་པ་རེད།རྒྱ་རིགས་འབྲེལ་མཐུད་པས་བོད་ཀྱི་སྐད་ཡིག་ཤེས་ན་རང་བཞིན་གྱིས་བོད་ཀྱི་ངོ་བོ་ཁྱད་ཆོས་སྲུང་བར་ཕན་པ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་ཀྱི་སྐད་ཡིག་སྦྱོང་དགོས་པ་ཧ་ཅང་གལ་ཆེན་པོ་ཡིན་སྐོར་ཡང་ནས་ཡང་དུ་བཀའ་སྩལ་བ་བཞིན་ཉེ་བའི་ཆར་སྤྱན་རས་གཟིགས་རྒྱལ་བ་རྒྱ་མཚོའི་བཀའ་དབང་སྩལ་སྐབས་ཀྱང་བོད་ཀྱི་སྐད་ཡིག་དེ་བཞིན་ཆོས་རྒྱལ་སྲོང་བཙན་སྒམ་པོའི་སྐབས་ནས། རང་གི་སྐད་ཐུན་མོང་མ་ཡིན་པ་ཉར་ཐབས་ཀྱིས་རྒྱ་གར་གྱི་ཡིག་གཟུགས་ཡག་ཤོས་ལ་དཔེ་བླངས་ནས་བོད་ཡིག་གསར་གཏོད་གནང་བ་དང་། ཆོས་རྒྱལ་ཁྲི་སྲོང་ལྡེའུ་བཙན་གྱི་སྐབས་མཁན་སློབ་ཆོས་གསུམ་འཛོམས་ནས་དཔལ་ན་ལནྡྲའི་ཆོས་བརྒྱུད་དྲི་མ་མེད་པ་བོད་ཡིག་ཐོག་བསྒྱུར་འགོ་འཚུགས་ནས་ལོ་ཙྭ་བ་མཁས་དབང་རྣམས་ཀྱི་བཀའ་དྲིན་འོག་བོད་ཀྱི་ནང་ཆོས་གཙོ་བོར་བཟུང་བའི་རིག་གཞུང་ཐུན་མོང་མ་ཡིན་པ་བྱུང་ཡོད་པ་གསུང་པ་ལྟར། དེ་དག་མི་ཉམས་བརྒྱུད་འཛིན་དགོས་པ་ནི་བོད་ནང་སྐད་གཉིས་སློབ་གསོའི་སྲིད་བྱུས་བོད་ཀྱི་སྐད་ཡིག་རྩ་མེད་གཏོང་བཞིན་པ་དང་། རྒྱ་གར་གཙོ་བྱས་པའི་ཕྱི་རྒྱལ་ཡུལ་གྲུ་ཁག་ནང་བོད་ཡིག་སྦྱོང་བར་ཁོར་ཡུག་གི་དཀའ་ངལ་འཕྲད་ནས་ཆགས་འཇིགས་ཀྱི་གནས་བབ་སྐབས་གལ་ཆེན་ཡིན་པ་བཤད། མཐར་རྒྱ་རིགས་འབྲེལ་མཐུད་པས་བོད་མི་མི་རེ་ངོ་རེས་རང་སོ་སོའི་བོད་སྤྱི་པའི་འགན་འཁུར་ནས་མི་རབས་གསར་པ་རྣམས་ལ་བོད་ཡིག་སློབ་འཁྲིད་ཀྱི་ལམ་ལ་འབད་དགོས་པ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་ཀྱི་བཞེད་དོན་ཐམས་ཅད་འགེགས་མེད་ལེགས་གྲུབ་ཡོང་བ་དང་། གཞིས་བྱེས་བོད་མི་ཡོངས་ཀྱིས་གཅིག་སྒྲིལ་གྱི་ནུས་པ་འགྱུར་མེད་སྲ་བརྟན་གྱི་ཐོག་བོད་ལ་སྐྱིད་པའི་ཉི་མ་སྟེ་༸གོང་ས་མཆོག་རི་བོ་གྲུ་འཛིན་གྱི་ཕོ་བྲང་དུ་གདན་ཞུ་ཐུབ་པའི་ཉི་མ་ཤར་བའི་སྨོན་འདུན་ཞུས་པ་དང་བཅས། །