༄༅། །འདི་གར་བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་ནས་བཏང་གནས་ནང་འཁོད་དོན། ནང་སྲིད་ན་གཞོན་རོགས་སྐྱོར་ཚན་པའི་གོ་སྒྲིག་འོག་ལས་གཞི་གསར་པ་ཨིན་ཌོ་ནེ་ཤི་ཡཱ་  (Indonesia) ནང་རྟེན་གཞི་བྱས་པའི་ (Orbit Future Academy) ཡི་ཁྱབ་ཁོངས་ཧཻ་ད་རཱ་བཱད་ (Hyderabad) ནང་རྟེན་ཆགས་ (Natio Cultus Consultancy LLP) ཚོགས་པ་དང་ཟུང་སྦྲེལ་གྱིས་ (Amazon Web Service (AWS) Cloud Computing Skills Training) ཞེས་དྲྭ་རྒྱའི་བརྒྱུད་བརྡ་འཕྲིན་དང་འཕྲུལ་ལས་ཞབས་ཞུ་མཁོ་སྤྲོད་ཞུ་ཕྱོགས་ཀྱི་ལས་རིགས་སྦྱོང་བརྡར་ཐེངས་དང་པོ་འགོ་འཛུགས་ཞུས་ཡོད།

སྦྱོང་བརྡར་ཚོགས་ཡུལ་སྦེང་ལོར་ཏཱ་ལའི་བླ་མ་མཐོ་སློབ་ཁང་དང་། སྦྱོང་བརྡར་དུས་ཡུན་ཕྱི་ལོ་ ༢༠༢༢ ཟླ་ ༦ ཚེས་ ༢༢ ནས་བདུན་ཕྲག་གཉིས་རིང་ཡིན། སྦྱོང་བརྡར་ནང་མཉམ་ཞུགས་བྱ་རྒྱུར་ ༼ ཨེ་མ་ཛོན། ༽ གྱི་ཁྲིམས་སྒྲིག་འགྲོ་ལུགས་ལྟར་སྐྱེད་རྩལ་ཚུད་རྒྱུགས་འཕྲོད་པ་རྣམས་ཕྱི་ལོ་ ༢༠༢༢ ཟླ་ ༦ ཚེས་ ༢༡ དགོང་དྲོ་ཆུ་ཚོད་ ༦ པའི་ཐོག་དབུ་འབྱེད་མཛད་སྒོ་གནང་བ་བཞིན་སྐབས་དེར་སྐུ་མགྲོན་གཙོ་བོ་སྦེང་ལོར་ལྷོ་སྤྱི་འཇིགས་མེད་ཚུལ་ཁྲིམས་ལགས་ཀྱིས་གཙོས་ས་གནས་ཀྱི་སྐུ་མགྲོན་རྣམ་པ་དང་། སྦྱོང་བརྡར་སློབ་འཁྲིད་གནང་མཁན་ལྕམ་རཱཅ་ནཱ་ཤར་མཱ་ (Rachna Sharma) ལགས་ངོ་ཕེབས་ཐོག གོང་གསལ་འབྲེལ་ཆགས་ཚོགས་པའི་ཆེད་ལས་གཙོ་འཛིན་དང་འཆར་འགོད་འགན་འཛིན་རྣམ་གཉིས་ནས་ཐད་གཏོང་བརྒྱུད་ལས་གཞི་འདིའི་གལ་གནད་སོགས་ཀྱི་གསུང་བཤད་གནང་། ནང་སྲིད་སྐུ་ཚབ་ལྷོ་སྤྱི་འཇིགས་མེད་ཚུལ་ཁྲིམས་ལགས་ཀྱིས་སྦྱོང་བརྡར་བ་ཚོར་སོ་སོའི་མི་ཚེའི་མདུན་ལམ་སྐྲུན་ཕྱོགས་དང་འབྲེལ་གོ་བཀོན་ལམ་སྟོན་གནང་ཡོད། གོང་གསལ་སྦྱོང་བརྡར་དུས་ཡུན་རིང་འཛིན་ཁང་དུ་དོ་བདག་སློབ་མ་རྣམས་ངོ་བཅར་དགོས་པ་ངེས་ཅན་ཡིན། དེའི་རྗེས་བདུན་ཕྲག་བཅུའི་རིང་སྦྱོང་བརྡར་བ་རྣམས་ཁུངས་སོ་སོའི་ས་ཁུལ་ནས་དྲྭ་རྒྱའི་བརྒྱུད་སྦྱོང་བརྡར་བྱ་དགོས་པ་ཡིན། 

མཐའ་དོན་གོང་གསལ་ཚོགས་པ་དེས་ཐོག་མ་སྦྱོང་བརྡར་ཁོངས་འདེམས་སྒྲུག་དང་བར་དུ་སྦྱོང་བརྡར་སློབ་འཁྲིད། མཐའ་མ་ (Cloud Practitioner Exam) ཞེས་ཡིག་རྒྱུགས་གཏོང་རྒྱུར་རམ་འདེགས་གནང་སྟེ་རྒྱུགས་འབྲས་ལེགས་སོན་རྣམས་ལ་ཨེ་མ་ཛོན་ (AMAZON) ཚོང་སྡེའི་ནང་ལས་ཀའི་གོ་སྐབས་སྐྲུན་ཐབས་དང་འབྲེལ་རང་ཁ་རང་གསོའི་གནས་སྟངས་ཚད་ལྡན་ཞིག་ཏུ་འགྱུར་རྒྱུར་རང་རིགས་གཞོན་སྐྱེས་ཚོར་ཕན་ཐོགས་ཅི་ཆེ་ཡོང་རྒྱུ་ཡིན་པ་བཅས། །