༄༅། །ཕྱི་ལོ་ ༢༠༢༢ ཟླ་བ་ ༠༦ ཚེས་ ༢༤ ཉིན་སྐུ་ཚབ་དོན་གཅོད་རྣམ་པའི་ཚོགས་འདུའི་ཟུར་དུ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་དྲ་ལམ་བརྒྱུད་བྱང་ཨ་རིའི་བོད་རིགས་སྤྱི་མཐུན་ཚོགས་པ་ཁག་གི་སྐུ་ཚབ་རྣམ་པ་དང་ལྷན་ཚོགས་འདུ་བསྐོང་ཚོགས་གནང་ཡོད་པ་རེད། ཚོགས་འདུའི་ཐོག་དཔལ་ལྡན་སྲིད་སྐྱོང་མཆོག་གིས་རིང་མིན་སྐབས་བཅུ་དྲུག་པའི་བཀའ་ཤག་ནས་བཙན་བྱོལ་བོད་མིའི་མི་འབོར་གྲངས་བཤེར་གནང་རྒྱུ་ཡིན་པ་ལྟར་དེ་འབྲེལ་ལས་དོན་གནང་ཕྱོགས་ཇི་དགེའི་སྐོར་ལམ་སྟོན་གསུང་བཤད་གནང་ཡོད།
སྐབས་དེར་དཔལ་ལྡན་སྲིད་སྐྱོང་མཆོག་གིས་སྐུ་ཚབ་ཚོགས་བཅར་བ་སུམ་ཅུ་ཙམ་ལ་ལས་དོན་གང་ཞིག་གྲུབ་འབྲས་ལྡན་པ་ཡོང་བར་སྔོན་ལ་འཆར་གཞི་འཆར་འགོད་ཡག་པོ་དགོས་རྒྱུ་གལ་ཆེན་པོ་རེད། འཆར་གཞི་འཆར་འགོད་ཆེད་གྲངས་ཐོ་དགོས་ཀྱི་ཡོད། ད་ལྟ་ང་ཚོར་འཕྲད་བཞིན་པའི་དཀའ་ངལ་ཞིག་ནི་བཙན་བྱོལ་བོད་མིའི་གྲངས་ཐོ་ཚད་ལྡན་ཞིག་མེད་པ་དེ་ཡིན། དེ་ལ་བརྟེན་ནས་ལས་དོན་གང་ཞིག་གི་ཆེད་འཆར་གཞི་འདིང་རྒྱུ་དང་དེ་ཉིད་ལག་བསྟར་བྱ་རྒྱུར་དཀའ་ངལ་འཕྲད་ཀྱི་ཡོད་ཅེས་གསུངས།
གསུང་བཤད་རྗེས་ཚོགས་བཅར་བ་འགའ་ནས་ས་གནས་སུ་གྲངས་བཤེར་ལག་བསྟར་གནང་ཕྱོགས་ཐད་དོགས་འདྲི་གནང་ཡོད་པ་དང་། དཔལ་ལྡན་སྲིད་སྐྱོང་མཆོག་གིས་དེ་འབྲེལ་ལན་འདེབས་གསལ་བཤད་གནང་ཡོད་པ་རེད། ཚོགས་འདུར་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཀྱང་མཉམ་ཞུགས་གནང་ཡོད།
བཙན་བྱོལ་བོད་མིའི་མི་འབོར་གྲངས་བཤེར་གྱི་ལས་གཞི་དེ་བཞིན་སྐབས་བཅུ་དྲུག་པའི་བཀའ་ཤག་གི་ལས་གཞི་གལ་ཆེའི་ནང་གི་གཅིག་ཡིན་པ་དང་། ལས་གཞི་འདི་བརྒྱུད་རྒྱ་བལ་འབྲུག་གསུམ་གྱིས་གཙོས་ཕྱི་རྒྱལ་ཡུལ་གྲུ་གང་སར་གནས་པའི་བཙན་བྱོལ་བོད་མིའི་མི་འབོར་གྲངས་ཐོ་ཚད་ལྡན་ཞིག་འཐོབ་པའི་དམིགས་ཚད་བཟུང་ཡོད་པ་ལྟར་འདི་ལོའི་ཕྱི་ཟླ་ ༠༧ པའི་ཟླ་ཕྱེད་ཙམ་ནས་བཟུང་མི་འབོར་གྲངས་བཤེར་གྱི་ལས་དོན་དངོས་སུ་དབུ་འཛུགས་གནང་འཆར་ཡོད་པ་བཅས།།
