༄༅། །ཕྱི་ལོ་ ༢༠༢༢ ཟླ་ ༦ ཚེས་ ༡༩ ཉིན་རྒྱབ་ཆུ་ཚོད་ ༢།༣༠ ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཨ་རི་མི་ནི་སོ་ཊ་མངའ་སྡེའི་ (Minneapolis St. Paul) གནམ་ཐང་དུ་ཕེབས་འབྱོར་སྐབས་མི་ནི་སོ་ཊ་བོད་རིགས་སྤྱི་མཐུན་ཚོགས་པའི་ཚོགས་གཙོ་དང་རྒྱུན་ལས་རྣམ་པ་དང་། གཞན་བོད་རིགས་མང་ཚོགས་ནས་དགའ་བསུའི་སྣེ་ལེན་གཟབ་རྒྱས་ཞུས་ཡོད།དེ་ནས་ཕྱི་དྲོ་ཆུ་ཚོད་ ༤ པའི་ཐོག་ས་གནས་བོད་རིགས་གཞོན་སྐྱེས་གྲངས་ ༤༠ ཙམ་ལ་བོད་རིགས་སྤྱི་མཐུན་ཚོགས་པའི་ཚོགས་ཁང་རྙིང་པའི་ནང་ཟུར་དུ་ཐུག་འཕྲད་གནང་སྟེ་གསུང་བཤད་དང་འབྲེལ་དྲི་བར་ལན་འདེབས་གནང་ཡོད། སྐབས་དེར་དཔལ་ལྡན་སྲིད་སྐྱོང་མཆོག་གིས་རྒྱ་ནག་གི་འགོ་ཁྲིད་ཞི་ཅིང་ཕིང་གི་འོག་རྒྱ་ནག་གཞུང་གིས་བོད་ཀྱི་རིག་གཞུང་དང་སྐད་ཡིག་རྩ་བརླག་ཏུ་གཏོང་གི་ཡོད་པས། བཙན་བྱོལ་དུ་ཡོད་པའི་བོད་མི་རྣམས་ཀྱིས་བོད་ཀྱི་རིག་གཞུང་དང་སྐད་ཡིག་མི་ཉམས་རྒྱུན་འཛིན་བྱེད་རྒྱུ་ཧ་ཅང་གལ་ཆེན་པོ་ཡིན་པ་དང་། བོད་རྒྱའི་དཀའ་རྙོག་སེལ་ཐབས་སུ་གཏན་འཇགས་འཐབ་ཇུས་ཚོགས་ཆུང་གསར་འཛུགས་དང་། བདེ་སྲུང་ལས་ཁུངས་ནས་བོད་ནང་གི་གནས་ཚུལ་མཁོ་སྒྲུབ་གནང་དགོས་པ། བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་རྣམས་ཀྱིས་བོད་ནང་གི་གནས་ཚུལ་ལ་ཉམས་ཞིབ་གནང་དགོས་པ། ཕྱི་དྲིལ་ལས་ཁུངས་ཀྱི་བོད་དོན་ཞུ་གཏུག་པ་རྣམས་ཀྱིས་རྒྱལ་ཁབ་སོ་སོའི་གཞུང་དང་། གྲོས་ཚོགས། བསམ་མཛོད་བསྟི་གནས་ཁང་སོགས་ཀྱི་ནང་བོད་ཀྱི་གནས་ཚུལ་མཁོ་སྤྲོད་དང་ཞུ་གཏུག་གནང་དགོས་པའི་སྐོར་དང་། དེ་བཞིན་ཨ་རི་དང་སྦར་སིལ་སྐུ་ཚབ་དོན་གཅོད་ཁང་དུ་ལས་བྱེད་གཅིག་བསྐོ་གཞག་གིས་བོད་རིགས་སྤྱི་མཐུན་ཚོགས་པ་རྣམས་དང་འབྲེལ་སྐྱོང་བྱ་རྒྱུ་དང་། སྐུ་ཚབ་དོན་གཅོད་ནས་ཆབ་སྲིད་རང་གི་ཐོག་ཤུགས་བརྒྱབ་རྒྱུའི་སྐོར་གསུང་གནང་ཡོད།བོད་མིའི་སྒྲིག་འཛུགས་ནས་རང་རེའི་གཞོན་སྐྱེས་རྣམས་ཀྱིས་དང་བླངས་བོད་དོན་ཞུ་གཏུག་ལས་འགུལ་གསར་བརྩམས་གནང་ཡོད་པ་དེའི་ནང་མཉམ་ཞུགས་གནང་དགོས་གལ་དང་། དེ་བཞིན་རང་རིགས་ཆོལ་གསུམ་མི་མང་ནང་ཁུལ་འཆམ་མཐུན་བྱེད་རྒྱུ་ནི་ཤིན་ཏུ་གལ་ཆེན་པོ་ཡིན་སྐོར་སོགས་ཀྱི་གསུང་བཤད་གནང་ཡོད། ཕྱོགས་མཚུངས་ཕྱི་དྲོ་ཆུ་ཚོད་ ༦་༣༠ སྟེང་བོད་རིགས་སྤྱི་མཐུན་ཚོགས་པའི་ཚོགས་ཁང་གསར་པའི་ནང་མང་ཚོགས་དང་ཐུག་འཕྲད་ཀྱིས་གསུང་བཤད་གནང་བའི་ནང་། ད་རེས་ཨ་རིར་ཡོང་དགོས་དོན་གཙོ་བོ་ནི་བོད་མི་མང་སྤྱི་འཐུས་ལྷན་ཚོགས་ཀྱི་གོ་སྒྲིག་འོག་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པ་དེ་བཞིན་ཕྱི་ལོ་ ༢༠༢༢ ཟླ་ ༦ ཚེས་ ༢༢ ནས་ ༢༣ བར་ཉིན་གྲངས་གཉིས་རིང་ཨ་རིའི་རྒྱལ་ས་ཝ་ཤིང་ཊོན་དུ་ཚོགས་གཏན་ཁེལ་ཡོད། རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཞེས་པ་ནི་འཛམ་གླིང་གི་གྲོས་ཚོགས་མི་འདྲ་བའི་ནང་བོད་དོན་རྒྱབ་སྐྱོར་གནང་མཁན་མཉམ་དུ་འཛོམ་རྒྱུའི་གོ་སྐབས་དང་། དེའི་བརྒྱུད་ནས་ཕན་ཚུན་འབྲེལ་བ་བཟོ་རྒྱུ། འཛམ་གླིང་གི་གྲོས་ཚོགས་མི་འདྲ་བའི་ནང་བོད་དོན་གླེང་ཕྱོགས་ཐད་གོ་བསྡུར་ཞུ་རྒྱུའི་ཆེད་རེད། རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་དང་པོ་དེ་ཕྱི་ལོ་ ༡༩༩༤ ལོར་སློབ་དཔོན་ཟམ་གདོང་རིན་པོ་ཆེ་མཆོག་བོད་མི་མང་སྤྱི་འཐུས་ཚོགས་གཙོ་ཡིན་པའི་སྐབས་རྒྱ་གར་གྱི་རྒྱལ་ས་ལྡི་ལིར་ཚོགས་པ་རེད། ཚོགས་ཆེན་ཐེངས་གཉིས་པ་དེ་ཕྱི་ལོ་ ༡༩༩༥ ལོར་ལི་ཐུ་ནི་ཡའི་རྒྱལ་ས་ཝིལ་ནུས་དང་། ཕྱི་ལོ་ ༡༩༩༧ ལོར་ཨ་རིའི་རྒྱལ་ས་ཝ་ཤིང་ཊོན། ཕྱི་ལོ་ ༢༠༠༥ ལོར་སོ་ཀོཊ་ལེཎཊ་རྒྱལ་ས་ཨིཌན་སྦ་ར། ཕྱི་ལོ་ ༢༠༠༩ ལོར་ཨི་ཊ་ལིའི་རྒྱལ་ས་རོམ། ཕྱི་ལོ་ ༢༠༡༢ ལོར་ཁེ་ན་ཌ་རྒྱལ་ས་ཨོ་ཊ་ཝ། ཕྱི་ལོ་ ༢༠༡༩ ལོར་ལཊི་ཝི་ཡའི་རྒྱལ་ས་རི་ག་བཅས་ལ་ཚོགས་གནང་ཡོད། ད་ལྟ་ང་ཚོ་བཀའ་མོལ་ཞུ་པའི་སྐབས་བོད་མི་མང་སྤྱི་འཐུས་ཚོགས་གཙོ་སྦྲེལ་པོ་མཆོག་ཨ་རིའི་རྒྱལ་ས་ཝ་ཤིང་ཊོན་ཌི་སིར་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པ་གོ་སྒྲིག་གནང་སླད་ཕེབས་ཡོད་པ་རེད། བཀའ་ཤག་གི་ལས་ཡུན་ལོ་ལྔའི་རིང་བོད་མི་འདུ་སྡོད་ས་གནས་ཁག་ཡོངས་ལ་ཐེངས་གཉིས་རེ་བཅར་རྒྱུའི་བསམ་བློ་ཡོད། ཕྱི་རྒྱལ་ཡུལ་གྲུ་ཁག་ཏུ་ཡོད་པའི་བོད་རིགས་ཚོགས་པ་ཡོངས་ལ་ཐེངས་གཉིས་རེ་བཅར་ཐུབ་མིན་ལ་མ་བལྟོས་པར་ཐེངས་གཅིག་ངེས་པར་དུ་བཅར་ཐུབ་པ་བྱེད་དགོས་ཀྱི་ཡོད་སྟབས། བོད་རིགས་སྤྱི་མཐུན་ཚོགས་པར་བཅར་བར་རེས་གཟའ་སྤེན་པ་དང་ཉི་མའི་དུས་ཚོད་དང་བསྟུན་དགོས་ཀྱི་ཡོད། དེར་བརྟེན་ད་རེས་ཚུར་ཡོང་བའི་སྐབས་འདིར་བྱང་ཁ་ལི་ཧྥོ་ནི་ཡ་དང་མི་ནི་སོ་ཊ། དེ་ནས་ཉིན་གྲངས་གཉིས་རིང་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་དང་ཉིན་གྲངས་གཅིག་དང་ཕྱེད་ཀའི་རིང་སྐུ་ཚབ་དོན་གཅོད་རྣམ་པའི་ཚོགས་འདུ་ཚོགས་རྗེས་ཝར་མོནཌ། སྦོ་སི་ཊོན་ལ་བཅར་རྒྱུ་ཡིན། བཀའ་ཤག་སྐབས་ ༡༦ པའི་ངོས་ནས་ཆབ་སྲིད་དང་སྤྱི་ཚོགས་བདེ་དོན་སོགས་ལས་དོན་གང་བྱེད་པ་ཡིན་ནའང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་གཞིར་བཟུང་བསྒྲུབ་རྒྱུར་ཆོད་སེམས་བརྟན་པོ་ཡིན། དེའི་སྟེང་ལས་དོན་གང་བྱེད་པ་ཡིན་ནའང་སྒྲིག་འཛུགས་ཀྱི་སྒྲོམ་གཞི་བརྟན་པོ་བཟོ་རྒྱུ་དང་། དེ་ནས་ལས་དོན་བྱེད་ཕྱོགས་ཀྱི་ལམ་ལུགས་གང་ལེགས་བཟོ་རྒྱུ། ལས་དོན་གང་བྱེད་མིན་སྐབས་དང་དུས་སོ་སོར་བསྟུན་ནས་འགྲོ་དགོས་རྒྱུ་ཆགས་ཀྱི་ཡོད། ང་ཚོའི་ལས་དོན་ནི་མ་འོངས་འཆར་གཞི་དེ་དག་ཚད་དང་ལྡན་པ་བཟོ་དགོས་ཀྱི་ཡོད། ཚད་དང་ལྡན་པ་ཞེས་པ་ནི། རྒྱུ་མཚན་དང་ལྡན་པ། ཚན་རིག་དང་མཐུན་པ་ལྟ་བུ་བཟོ་དགོས་ཀྱི་ཡོད་ན། གྲངས་ཐོ་ཡག་པོ་དགོས་རྒྱུ་ཧ་ཅང་གལ་ཆེན་པོ་རེད་འདུག བོད་པའི་སྤྱི་ཚོགས་ནང་གནའ་སྔ་མོ་ནས་ད་བར་གྲངས་ཐོ་ཚད་ལྡན་ཁྱོན་ནས་ཉར་ཚགས་བྱེད་ཀྱི་མེད། གྲངས་ཐོ་ཡག་པོ་དགོས་རྒྱུ་ཧ་ཅང་གལ་ཆེན་པོ་རེད། ཅེས་དང་།དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་མིར་བཀའ་དྲིན་ཤིན་ཏུ་ཆེན་པོ་ཡིན་པ་དང་། ང་ཚོ་ནི་བོད་མི་རིགས་ཀྱི་བདེན་པའི་འཐབ་རྩོད་པ་ཞིག་ཡིན་པའི་ཆ་ནས་བོད་ཀྱི་ལོ་རྒྱུས་ཀྱི་གནས་བབ་སྐོར་ཤེས་དགོས་པ་ཧ་ཅང་གལ་ཆེན་པོ་ཆགས་ཡོད་པ། ང་ཚོ་བཙན་བྱོལ་ལ་འབྱོར་རྗེས་སྤྱི་ནོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གིས་བོད་ཆོལ་ཁ་གསུམ་གཅིག་ཏུ་སྒྲིལ་ནས་བོད་ཀྱི་ངོ་བོ་ཞེས་པ་དེ་བསྐྲུན་གནང་མཛད་ཡོད། ཅེས་དང་།

དེ་བཞིན་དཔལ་ལྡན་སྲིད་སྐྱོང་མཆོག་གིས་སྒྲིག་འཛུགས་ཀྱི་ལས་བྱེད་པའི་གནས་སྟངས་སྐོར་དང་། ཕྱོགས་མཚུངས་མི་འབོར་གྲངས་ཐོ་ནི་གལ་གནད་ཆེན་པོ་ཡིན་སྟབས། རིང་མིན་མི་འབོར་གྲངས་བཤེར་གནང་རྒྱུ་ཡིན་པར་ང་ཚོ་བོད་མིའི་གྲངས་ཐོ་ཚད་ལྡན་ཡོང་ཐབས་སུ་ཚང་མས་མཉམ་ཞུགས་གནང་དགོས་སྐོར་འབོད་བསྐུལ་གནང་ཡོད་པ་བཅས། །