༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཕྱི་ལོ་ ༢༠༢༢ ཟླ་ ༠༦ ཚེས་ ༡༦ ཉིན་རྒྱབ་ནས་ཨ་རིར་གཞུང་འབྲེལ་འཚམས་གཟིགས་ཕེབས་པར་ཐོག་མར་ཕྱི་ཚེས་ ༡༧ ཉིན་རྒྱབ་ཨ་རིའི་གྲོང་ཁྱེར་སེན་ཕེརེན་སི་ཀོར་ཕེབས་འབྱོར་གནང་ཞིང་། གནམ་ཐང་དུ་བྱང་ཀེ་ལི་ཕོར་ནི་ཡ་བོད་རིགས་ཚོགས་པའི་ཚོགས་གཙོ་དང་རྒྱུན་ལས་རྣམས་ནས་ཕེབས་བསུའི་སྣེ་ལེན་གཟབ་རྒྱས་ཞུས་འདུག །
ཕྱི་ཚེས་ ༡༨ ཉིན་གྱི་སྔ་དྲོ་ཆུ་ཚོད་ ༡༠ པའི་སྟེང་ཇེ་ཨེཕ་ཀེ་ཚོགས་ཁང་ནང་རང་རིགས་མང་ཚོགས་དང་མཇལ་འཕྲད་གནང་སྟེ་གསུང་བཤད་གནང་བའི་ནང་དུ་མང་ཚོགས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རང་རིགས་དང་འཛམ་གླིང་སྤྱི་ལ་བཀའ་དྲིན་ཤིན་ཏུ་ཆེན་པོ་ཡིན་པར་ཚང་མས་ཡིད་འཇགས་དགོས་གལ་དང་། བོད་ཀྱི་སྐད་ཡིག་གལ་ཆེ་ཡིན་སྐོར། མང་གཙོའི་ཀ་བ་གསུམ་གྱི་འགན་དབང་ཆ་བགོས་ཀྱིས་ལྗིད་སྙོམས་སྟངས་འཛིན་མིང་དོན་མཚུངས་པ་ཞིག་ཡོང་རྒྱུ་ནི་གལ་གནད་གཙོ་བོ་ཞིག་ཡིན་སྐོར་གསུངས། རང་རིགས་ཆོལ་གསུམ་མི་མང་ནང་ཁུལ་འཆམ་མཐུན་བྱེད་རྒྱུ་ནི་ཤིན་ཏུ་གལ་ཆེན་པོ་ཡིན་སྐོར། བོད་རྒྱ་གཉིས་ཀྱི་དཀའ་རྙོག་སེལ་ཐབས་དང་འབྲེལ་བའི་གཏན་འཇགས་ཐབས་ཇུས་འཆར་འགོད་ཚོགས་ཆུང་གསར་འཛུགས་གནང་བ་དང་ལས་དོན་འགྲོ་མུས་སྐོར།  གཞན་ཡང་སྐབས་བཅུ་དྲུག་པའི་བཀའ་ཤག་གི་ལས་གཞི་དང་བླངས་བོད་དོན་ཞུ་གཏུག་ལས་འགུལ་དང་། རིང་མིན་མི་འབོར་གྲངས་བཤེར་བྱེད་རྒྱུ། མང་ཚོགས་ནས་བོད་ཀྱི་ལོ་རྒྱུས་ཤེས་དགོས་རྒྱུ་ཧ་ཅང་གལ་ཆེ་ཡིན་ལུགས་སོགས་ཀྱི་སྐོར་གསུང་བཤད་གནང་རྗེས་མང་ཚོགས་ཀྱི་འདྲི་བར་ལན་འདེབས་དང་གསལ་བཤད་གནང་ཡོད།དེ་བཞིན་ཉིན་རྒྱབ་ཚོུད་ ༢།༣༠ སྟེང་བྱང་ཀེ་ལི་ཕོར་ནི་ཡ་བོད་རིགས་ཚོགས་པའི་སྤྱི་ཁང་དུ་བོད་རིགས་གཞོན་སྐྱེས་གྲངས་ ༥༠ ཙམ་དང་ཟུར་དུ་མཇལ་འཕྲད་ཀྱིས་ཁོང་རྣམས་ལ་བྱང་ཨ་རིར་བོད་རིགས་ཐོག་མར་སླེབས་སྟངས་སྐོར་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་དང་བོད་མི་རིགས་ཀྱི་ཆེད་དུ་བཀའ་དྲིན་ཧ་ཅང་ཆེན་པོ་ཡིན་པ། ད་ཆ་ང་ཚོ་མི་མང་ནས་བོད་བསྟན་སྲིད་མི་རིགས་ཀྱི་ཆེད་དུ་དཀའ་ལས་བརྒྱབ་དགོས་སྐོར། ལྷག་པར་གཞོན་སྐྱེས་རྣམས་ནས་དང་བླངས་བོད་དོན་ཞུ་གཏུག་ལས་འགུལ་ནང་མཉམ་ཞུགས་གནང་དགོས་གལ་དང་། དེ་འབྲེལ་ཕྱི་དྲིལ་ལས་ཁུངས་དང་སྐུ་ཚབ་དོན་ཁང་གི་ལས་དོན་སྐོར། དེ་བཞིན་གོང་གསལ་བཞིན་བོད་རྒྱ་གཉིས་ཀྱི་དཀའ་རྙོག་སེལ་ཐབས་དང་འབྲེལ་བའི་གཏན་འཇགས་ཐབས་ཇུས་འཆར་འགོད་ཚོགས་ཆུང་གསར་འཛུགས་གནང་བ་དང་ལས་དོན་འགྲོ་མུས་སྐོར་གསུང་པ་མ་ཟད། གཞོན་སྐྱེས་ཁག་གཅིག་གིས་དྲི་བར་ལན་འདེབས་གསལ་བཤད་གནང་ཡོད།གོང་གསལ་ཚོགས་འདུ་གྲུབ་རྗེས་ཆུ་ཚོད་ ༤།༣༠ སྟེང་སེན་ཕེ་རེན་སི་ཀོར་ཡོད་པའི་ཨེ་ཝཾ་ཆོས་ལྡན་ཆོས་ཚོགས་དང་། སེར་བྱེས་དགེ་རྩ་ཚོགས་པ། རྒྱལ་གཤེན་ཞང་བོད་སློབ་གཉེར་ཁང་། བཀའ་བརྒྱུད་འགྲོ་དོན་ཀུན་ཁྱབ་ཆོས་ཚོགས། གནས་ཆུང་ཆོས་ཚོགས། རྒྱུད་སྟོད་དགེ་རྩ་ཚོགས་པ།  རྙིང་མ་ཆོས་ཚོགས། ཇོ་ནང་བཅས་ཀྱི་འགོ་འཛིན་དང་སྐུ་ཚབ་ལྷན་དུ་ཚོགས་མོལ་གནང་ཞིང་། དཔལ་ལྡན་སྲིད་སྐྱོང་མཆོག་གིས་བཙན་བྱོལ་ནང་ཡོད་པའི་དགོན་སྡེ་ཁག་གི་གནས་སྟངས་གནས་ལུགས་སྐོར་སྙིང་བསྡུས་ཤིག་འགྲེལ་བརྗོད་གནང་བ་དང་། དེ་བཞིན་རང་རེའི་སྤྱི་ཚོགས་རང་ཁ་རང་གསོ་ཡོང་རྒྱུ་གལ་ཆེར་སོང་། ཆོས་ཚོགས་ཁག་ནས་རྒྱ་གར་དུ་རྒས་གསོ་ཁང་ལྟ་བུར་མཐུན་རྐྱེན་སྦྱོར་སྤྲོད་གནང་རྒྱུར་རེ་བསྐུལ་གནང་། དེ་བཞིན་བོད་མིའི་སྒྲིག་འཛུགས་ནས་ཀྱང་མཐུན་འགྱུར་རམ་འདེགས་གང་ཐུབ་ཞུ་རྒྱུ་ཡིན་སྐོར་སོགས་གསུང་གནང་། ཕྱི་ཚེས་ ༡༩ ཉིན་གྱི་སྔ་དྲོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་མེ་ནི་སོ་ཊར་ཕེབས་ཐོན་གནང་རྒྱུ་ཡིན་འདུག་པ་བཅས། །