༄༅། །ཕྱི་ལོ་ ༢༠༢༢ ཟླ་ ༦ ཚེས་ ༡༤ བོད་ཟླ་ ༤ ཚེས་ ༡༥ ས་ག་ཟླ་བའི་དུས་ཆེན་ཉིན་ཀིརྟིའི་བྱེས་པ་གྲྭ་ཚང་གི་འདུ་ཁང་དུ་མདོ་སྨད་དབུས་སྤྱི་ཁྱབ་རྒྱུན་ལས་ཁང་གིས་རོང་ཆེན་བསྟན་པའི་སྒྲོན་མེ་༸སྐྱབས་རྗེ་ཀིརྟི་རིན་པོ་ཆེ་མཆོག་གི་༸སྐུའི་གྱ་སྟོན་དང་བསྟུན་སྒྲོལ་དཀར་ཡིད་བཞིན་འཁོར་ལོའི་སྒོ་ནས་བརྟན་བཞུགས་བསྟར་འབུལ་དང་། རིན་པོ་ཆེ་མཆོག་ལ་བཀའ་དྲིན་རྗེས་དྲན་མཚོན་ཆེད་གསེར་གྱི་གཟེངས་རྟགས་ཤིག་ཕུལ་སོང་།དེ་ཡང་བརྟན་བཞུགས་བསྟར་འབུལ་དང་གཟེངས་རྟགས་འབུལ་རྒྱུའི་མཛད་སྒོར་སྐུ་མགྲོན་གཙོ་བོ་༸དཔལ་རྒྱལ་བ་ཇོ་ནང་པའི་རྒྱལ་ཚབ་ཁྲི་རབས་གཉིས་པ་མཆོག་སྤྲུལ་ཆོས་ཀྱི་སྣང་བ་རིན་པོ་ཆེ་མཆོག་དང་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག བདེ་སྲུང་བཀའ་བློན་རྒྱ་རི་སྒྲོལ་མ་མཆོག བོད་མི་མང་སྤྱི་འཐུས་ཁག་གཅིག བཀའ་ཟུར་རྗེ་བཙུན་པདྨ་མཆོག བཀའ་ཟུར་བསྟན་པ་ཚེ་རིང་མཆོག བཀའ་ཟུར་རིན་ཆེན་མཁའ་འགྲོ་མཆོག བཀའ་ཟུར་ཐུབ་བསྟན་ལུང་རིགས་མཆོག བཀའ་ཟུར་ཚེ་རིང་དོན་གྲུབ་མཆོག བཀའ་ཟུར་བླ་བྲང་འཕགས་པ་ཚེ་རིང་མཆོག དཔལ་ལྡན་དགའ་ལྡན་ཕོ་བྲང་གི་དྲུང་ཆེ་རྔ་བ་ཚེ་རྒྱམ་ལགས། ཚོགས་སྡེ་ཁག་གི་སྐུ་ཚབ། དེ་བཞིན་སེར་སྐྱ་མི་མང་སོགས་ལྷན་འཛོམས་ཀྱིས་ཐོག་མར་མདོ་སྨད་ཆོལ་ཁའི་དབུས་སྤྱི་ཁྱབ་རྒྱུན་ལས་ཁང་གི་ཚོགས་གཙོ་བོད་མི་མང་སྤྱི་འཐུས་གངས་རི་ལགས་དང་། དྲུང་ཆེ་བསམ་གཏན་ལགས། དངུལ་གཉེར་ཚེ་དབང་རྒྱལ་མཚན་ལགས། དབུས་རྒྱུན་ལས་སྨན་པ་པ་སངས་ལགས། ཀིརྟིའི་བྱེས་པ་གྲྭ་ཚང་གི་དགེ་བསྐོས་བཅས་ཀྱིས་སྤོས་སྣེ་དང་བཅས་རོང་ཆེན་བསྟན་པའི་སྒྲོན་མེ་༸སྐྱབས་རྗེ་ཀིརྟི་རིན་པོ་ཆེ་མཆོག་ཚོགས་དབུར་གདན་འདྲེན་ཞུས་ཏེ་སྒྲོལ་དཀར་ཡིད་བཞིན་འཁོར་ལོའི་སྒོ་ནས་བརྟན་བཞུགས་བསྟར་འབུལ་ཞུས་སོང་།དེ་ནས་མདོ་སྨད་ཆོལ་ཁའི་དབུས་སྤྱི་ཁྱབ་རྒྱུན་ལས་ཁང་གི་ཚོགས་གཙོ་བོད་མི་མང་སྤྱི་འཐུས་གངས་རི་ལགས་ཀྱིས་བཀའ་དྲིན་རྗེས་དྲན་གསེར་གྱི་གཟེངས་རྟགས་འབུལ་བཞེས་དང་འབྲེལ་བའི་ངོ་སྤྲོད་གསུང་བཤད་གནང་གྲུབ་མཚམས་རོང་ཆེན་བསྟན་པའི་སྒྲོན་མེ་༸སྐྱབས་རྗེ་ཀིརྟི་རིན་པོ་ཆེ་མཆོག་ལ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བཀའ་དྲིན་རྗེས་དྲན་གྱི་གཟེངས་རྟགས་འབུལ་ལམ་ཞུས་གནང་སོང་བ་བཅས། །