༄༅། ། ཕྱི་ལོ་ ༢༠༢༢ ཟླ་ ༦ ཚེས་ ༤ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཧོན་སུར་རབ་རྒྱས་གླིང་བོད་མིའི་གཞིས་ཆགས་སུ་གཞུང་འབྲེལ་འཚམས་གཟིགས་སུ་ཕེབས་འབྱོར་སྐབས་ཧོན་སུར་རབ་རྒྱས་གླིང་ས་གནས་འགོ་འཛིན་ཐུབ་བསྟན་ཚེ་རིང་ལགས་དང་། ཕྱོགས་བཞུགས་སྤྱི་འཐུས་མི་འགྱུར་རྡོ་རྗེ་ལགས། དེ་བཞིན་དགོན་སྡེ་ཁག་གི་སྐུ་ཚབ་དང་། གཞུང་དང་གཞུང་ཁོངས་མིན་པའི་ཚོགས་པ་སྐྱིད་སྡུག་ཁག་གི་སྐུ་ཚབ་སོགས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།
དེ་ཡང་ཐོག་མར་དཔལ་ལྡན་སྲིད་སྐྱོང་མཆོག་གིས་དཔལ་ལྡན་སྨད་རྒྱུད་གྲྭ་ཚང་དུ་གནས་གཟིགས་སུ་ཕེབས་རྗེས་རྒྱུད་སྨད་གངས་ཅན་རིག་གནས་སློབ་གྲྭར་འཚམས་གཟིགས་ཕེབས་ཏེ་ནང་ཆོས་དང་། རིགས་ལམ། དབྱར་ཁའི་བོད་ཀྱི་སྐད་ཡིག་ཟབ་སྦྱོང་ལ་མཉམ་ཞུགས་གནང་མཁན་ཧུན་སུར་རབ་རྒྱས་གླིང་དང་ཀོ་ལི་གྷལ་དོན་ལྡན་གླིང་སཾ་བྷོ་ཊའི་སློབ་ཕྲུག་རྣམས་དང་ལྷན་ཐུག་འཕྲད་ཀྱིས་གསུང་བཤད་གནང་ཡོད། གཞན་ཡང་དཔལ་ལྡན་སྲིད་སྐྱོང་མཆོག་གིས་ཧོན་སུར་ཨོ་རྒྱན་གླིང་དགོན་པར་གནས་གཟིགས་གནང་གྲུབ་མཚམས་ས་གནས་ཀྱི་རྒས་གསོ་ཁང་དང་བུ་བཅོལ་ཁང་གཉིས་སུ་འཚམས་གཟིགས་དང་། ཧོན་སུར་རབ་རྒྱས་གླིང་ས་གནས་འགོ་འཛིན་ལས་ཁུངས་དང་། ས་གནས་རང་བདེན་ཚོགས་ཆུང་། ས་གནས་འཐུས་ཚོགས། མཉམ་འབྲེལ་དང་སྡེ་ཚན་ཁག་གི་ལས་ཁུངས། ས་གནས་དམག་ཟུར་ཚོགས་པའི་ཡིག་ཚང་། བུ་བཅོལ་ཁང་། དེ་བཞིན་གཞིས་གྲོང་དོན་གྲུབ་གླིང་དང་། སྐྱིད་གྲོང་གླིང་། དཔལ་འབྱོར་རབ་བརྟན། བཀྲ་ཤིས་སྒང་། བསམ་གཏན་གླིང་བཅས་སུ་འཚམས་གཟིགས་གནང་བ་མ་ཟད། རྫོང་ཆོས་དགའ་ལྡན་འཕེལ་རྒྱས་གླིང་གྲྭ་ཚང་དུ་གནས་གཟིགས་དང་། གཞིས་གྲོང་རིན་ཆེན་ཁང་དང་། བདེ་སྐྱིད་གླིང་། བསམ་གྲུབ་གླིང་། བྱམས་པ་གླིང་། བདེ་ལེགས་རབ་བརྟན། བསམ་འཕེལ་གླིང་། ཕུན་ཚོགས་གླིང་། དགའ་ལྡན་ཁང་གསར། ཡན་ལག་སྨན་རྩིས་ཁང་། ཕན་བདེ་སྨན་ཁང་། བུད་མེད་འཚེམས་བཟོ་ཁང་། སཾ་བྷོ་ཌ་སློབ་གྲྭ་བཅས་སུ་འཚམས་གཟིགས་ཕེབས་ཡོད།
གཞུང་འབྲེལ་འཚམས་གཟིགས་ཉིན་གཉིས་པར་དཔལ་ལྡན་སྲིད་སྐྱོང་མཆོག་གིས་ཧོན་སུར་རབ་རྒྱས་གླིང་བོད་མིའི་གཞིས་ཆགས་ཀྱི་མི་མང་ལ་གསུང་བཤད་གནང་སྐབས་གཙོ་བོ་བོད་སྤྱི་པའི་སླད་དུ་ཚང་མས་ནུས་པ་མཉམ་སྤུངས་གནང་དགོས་པའི་གལ་གནད་དང་། བཀའ་ཤག་སྐབས་བཅུ་དྲུག་པའི་ངོས་ནས་མི་མང་གི་དགོས་མཁོ་ལ་དཔག་པའི་མཐུན་འགྱུར་རོགས་རམ་གནང་རྒྱུའི་སྐོར་གསུངས་པ་མ་ཟད། བཀའ་ཤག་སྐབས་བཅུ་དྲུག་པའི་འཆར་གཞི་དང་། བོད་མི་མང་སྤྱི་འཐུས་ལྷན་ཚོགས་ནས་སྤྱི་མོས་ཀྱིས་གཏན་ལ་ཕབ་པའི་དབུ་མའི་ལམ་གྱི་སྲིད་བྱུས་ལ་བརྟེན་ནས་རྒྱ་ནག་གཞུང་དང་མཉམ་དུ་འབྲེལ་གཏུག་གྲོས་མོལ་བརྒྱུད་བོད་རྒྱའི་དཀའ་རྙོག་སེལ་རྒྱུ་དང་བོད་མིའི་བདེ་སྡུག་ལ་ལྟ་རྟོག་གནང་རྒྱུ་སོགས་ཀྱི་སྐོར་གསུངས་ཡོད།
དཔལ་ལྡན་སྲིད་སྐྱོང་མཆོག་གིས་འཛིན་སྐྱོང་བཀའ་ཤག་གི་མ་འོངས་ལས་འཆར་ཁག་ཚད་དང་ལྡན་པ་ལག་བསྟར་བྱ་སླད་བཙན་བྱོལ་བོད་མིའི་མི་འབོར་ཞིབ་བཤེར་གནང་རྒྱུ་ཡིན་པ་དང་། གཏན་འཇགས་ཐབས་བྱུས་ཚོགས་ཆུང་གསར་འཛུགས་གནང་བ། བཀའ་ཤག་སྐབས་ ༡༦ པའི་ལས་གཞི་གསར་པ་དང་བླངས་བོད་དོན་ཞུ་གཏུག་ལས་འགུལ་དབུ་འཛུགས་གནང་བ། བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་པ་རྣམས་ཀྱི་བླང་དོར་དང་ཐོབ་ཐང་གི་སྒྲིག་གཞི་བསྐྱར་བཅོས་གནང་བ་སོགས་ཀྱི་སྐོར་གསུངས་ཡོད།
ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་ཆོས་འཁོར་མཆོད་རྟེན་ལ་གནས་གཟིགས་དང་ས་གནས་སུ་ཚོང་ཁང་གསར་རྒྱག་ལས་གཞིའི་རྨང་གཞི་རྩིག་རྡོ་བཏིང་གནང་ཡོད་པ་དང་། ཕྱི་ཚེས་ ༥ ཉིན་གྱི་ཉིན་རྒྱབ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཕྱི་ལོ་ ༢༠༢༢ ལོའི་ལྷོ་ཕྱོགས་རྐང་རྩེད་སྤོ་ལོ་འགྲན་བསྡུར་ཉིན་མཐའ་མའི་སྐབས་སྐུ་མགྲོན་གཙོ་བོར་གདན་ཞུས་ལྟར་ཆེད་ཕེབས་གནང་ཡོད། ཕྱི་ལོ་ ༢༠༢༢ ལོའི་ལྷོ་ཕྱོགས་རྐང་རྩེད་སྤོ་ལོ་འགྲན་བསྡུར་གྱི་རྒྱལ་ཁ་དེ་བཞིན་སྦེལ་ཀོབ་བདེ་སྐྱིད་སླར་གསོ་བོད་མིའི་གཞིས་ཆགས་ཀྱི་རྐང་རྩེད་སྤོ་ལོ་རུ་ཁག་ལ་ཐོབ་ཡོད་པ་བཅས།།
