༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༦ ཚེས་ ༡༧ ཉིན་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ཀྱི་གོ་སྒྲིག་ཐོག་བོད་མི་ཡོངས་ཀྱི་བླ་ན་མེད་པའི་མགོན་སྐྱབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༧ ལ་ཕེབས་པའི་སྐུའི་འཁྲུངས་གྱི་དགྱེས་སྟོན་བསྡུས་པ་ཞིག་ཐའེ་པེ་ཧྤུ་ཧྭ་གསོལ་མགྲོན་ཁང་ཆེན་མོར་ (Howard Plaza Hotel) དུ་དགོང་མོ་ཆུ་ཚོད་ ༦ ནས་ ༩།༣༠ བར་སྲུང་བརྩི་ཞུས་ཡོད།
སྤྱིར་ལོ་ལྟར་ཐའེ་ཝན་ནང་སྐུའི་འཁྲུངས་སྐར་གྱི་དགྱེས་སྟོན་མཛད་སྒོ་གཞི་རྒྱ་ཆེ་བའི་ལམ་ནས་གོ་སྒྲིག་ཞུ་སྲོལ་ཡོད་ན་ཡང་། བར་ལམ་ཏོག་དབྱིབས་ནད་དུག་ཁྱབ་བརྡལ་ཆེ་རུ་སོང་སྟེ་སྤྱི་ཚོགས་ཁྱོན་ཡོངས་འཇིགས་དངངས་དོགས་ཟོན་འོག་ལྷུང་བ་དང་། རིང་མིན་སྐུ་ཚབ་དོན་གཅོད་ཨ་རིར་ཚོགས་འདུ་ཚོགས་བཅར་དགོས་པ་སོགས་གནས་སྟངས་གཉིས་དབང་གིས་སྐུའི་འཁྲུངས་སྐར་སྔ་སྣུར་གྱིས་མཛད་སྒོ་བསྡུས་པ་ཞིག་མ་གཏོགས་མི་དམངས་འདུ་འཛོམས་ཆེ་ཐོག་ནས་སྲུང་བརྩི་ཞུ་ཐུབ་མེད་ཀྱང་། ཆེས་མཐོའི་སྐུ་མགྲོན་མང་དག་ཅིག་མཛད་སྒོར་ཆེད་ཕེབས་ཀྱིས་སྲུང་བརྩི་ཐུབ་པ་ནི་རང་བཞིན་གྱི་དམིགས་བསལ་ཅན་ཞིག་ཆགས་ཡོད།
དེ་ཡང་མཛད་སྒོའི་ཐོག་ཐའེ་ཝན་ཕྱི་སྲིད་ལྷན་ཁང་གི་བློན་ཆེན་གཞོན་པ་སྐུ་ཞབས་ཐཱེན་ཀྲུང་ཀཱོང་ (Tien, Chung-Kwang) ལགས་དང་། ཧཱ་ཀ་ལྷན་ཁང་གི་བློན་ཆེན་སྐུ་ཞབས་ཡང་ཁྲང་རྩན་ (Yiong, Con-Ziin) ལགས། ཐའེ་ཝན་སྲིན་འཛིན་ཀྱི་སློབ་སྟོན་པ་གཙོ་གྲས་སྐུ་ཞབས་ཆོ་ཡི་རན་ (Qiu, Yi-Ren) ལགས། ཐའེ་ཝན་རིག་གཞུང་ལྷན་ཁང་གི་བློན་ཆེན་གཞོན་པ་སྐུ་ཞབས་ཤའོ་ཙོང་ཧཱོང་ (Hsiao, Tsung-Huang) ལགས་དང་བོད་སོག་རིག་གཞུང་སྡེ་ཚན་གྱི་འགན་འཛིན་ལྕམ་སྐུ་ཀའོ་ཨུས་རྩན་ (Gao, Yu-Zhen) ལགས། ཐའེ་ཝན་མང་གཙོ་ཡར་ཐོན་ཚོགས་པའི་དྲུང་ཆེ་གཞོན་པ་སྐུ་ཞབས་ལིན་ཕཱཡི་ཕཱང་ (Lin, Fei-Fan) ལགས། ཐའེ་པེ་གྲོང་ཁྱེར་གྱི་གྲོས་ཚོགས་འཐུས་མི་ལྕམ་སྐུ་ལིང་ཨིང་མོང་ (Lin, Ying-Meng) ལགས། དེ་བཞིན་ཐའེ་ཝན་ནང་རྟེན་གཞི་བྱས་པའི་ཨ་རིའི་གཞུང་ཚབ་ཁང་གི་ཆབ་སྲིད་སྡེ་ཚན་གྱི་འགན་འཛིན་སྐུ་ཞབས་ (Philip Fals) ལགས། འཛར་མ་ནི་གཞུང་ཚབ་སྐུ་ཞབས་ (Dr. Jorg Polster) ལགས། རྒྱ་གར་གྱི་གཞུང་ཚབ་གཞོན་པ་སྐུ་ཞབས་ (Sohag Sen) ལགས། ཐའེ་ཝན་བོད་བརྒྱུད་ནང་བསྟན་མཐུན་ཚོགས་ཀྱི་སྐུ་ཚབ་དང་། ཐའེ་ཝན་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་སོགས་ཁྱོན་ཕྱི་ནང་གི་སྐུ་མགྲོན་ ༡༡༠ གདན་འདྲེན་ཞུས་པ་བཞིན་མཛད་སྒོར་ཆེད་ཕེབས་གནང་ཡོད། སྐུ་མགྲོན་རྣམས་ནས་ཐོག་མར་༸རྒྱལ་བའི་སྐུ་པར་མཐོང་གྲོལ་རིན་པོ་ཆེ་སྤོས་སྣེས་སྔུན་བསུས་ཏེ་བཞུགས་ཁྲི་རིན་པ་ཆེའི་ཐོག་གདན་ཞུ་དང་དཀར་གཙང་མཇལ་དར་སྒྲོན་འབུལ་ཞུས།
དེ་ནས་ཐའེ་ཝན་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས་ཕེབས་བསུའི་གསུང་བཤད་དང་སྦྲགས་༸གོང་ས་མཆོག་གི་ཐུགས་བསྐྱེད་དམ་བཅའ་བཞི་དང་། ཐའེ་ཝན་མི་དམངས་དབར་བླ་སློབ་ཀྱི་དམིགས་བསལ་མཛའ་འབྲེལ། དེ་བཞིན་ཐའེ་ཝན་གཞུང་མང་ནས་བོད་མིར་གདུང་སེམས་མཉམ་བསྐྱེད་དང་བོད་མིའི་ཕྱིར་བསྐྱོད་ལག་དེབ་སེར་པོ་དཀའ་སེལ་སླད་སྲིད་བྱུས་གུ་ཡངས་གཏོང་བ་སོགས་ངོ་སྤྲོད་ཞུས།
ཐའེ་ཝན་ཕྱི་སྲིད་ལྷན་ཁང་གི་བློན་ཆེན་གཞོན་པ་སྐུ་ཞབས་ཐཱེན་ཀྲུང་ཀཱོང་མཆོག་གིས་ཁོང་དེ་སྔ་རྒྱ་གར་དུ་ལོ་ངོ་ ༧ ཙམ་ཐའེ་ཝན་གཞུང་ཚབ་བྱེད་སྐབས་༸གོང་ས་མཆོག་གི་བཀའ་སློབ་དང་གསུང་ཆོས་ཐེངས་མང་ཉན་རྒྱུ་དང་དོ་སྣང་བྱེད་རྒྱུའི་གོ་སྐབས་བྱུང་ཡོད་སྟབས། ༸གོང་ས་མཆོག་གི་འཛམ་གླིང་སྤྱི་ལ་བདེ་སྐྱིད་ཡོང་བར་དུས་རྟག་ཏུ་གཞན་ཕན་དང་སྙིང་རྗེ་ཉམས་ལེན་བྱེད་དགོས་པའི་བཀའ་སློབ་གནང་བ་མ་ཟད། འཛམ་གླིང་ནང་གི་དཀའ་རྙོག་སེལ་དགོས་ན་རང་གཅེས་འཛིན་དོར་ནས་གཞན་ཕན་དང་སྙིང་རྗེ་ཉམས་ལེན་དགོས་པ་ནི་ཐབས་ལམ་གལ་ཆེ་ཞིག་ཡིན་པ་བཀའ་གནང་གི་ཡོད་པར་རྒྱལ་སྤྱིའི་ཐོག་སེམས་འགུལ་ཆེན་པོ་ཐེབས་ཀྱི་ཡོད། ཐའེ་ཝན་མི་མིང་གི་སེམས་གཏིང་ནང་༸གོང་ས་མཆོག་ལ་དད་གུས་ཆེན་པོ་དང་དམིགས་བསལ་བློ་ཐག་ཉེ་པོ་ཡོད་པ་དང་། ལོ་ལྟར་ཐའེ་ཝན་ནས་ཆོས་ཞུ་བ་མང་དག་བཞུགས་སྒར་རྡ་རམ་ས་ལར་༸གོང་ས་མཆོག་མཇལ་འཕྲད་དང་གསུང་ཆོས་ཐོས་རྒྱུར་བཅར་བཞིན་ཡོད་ནའང་། ནད་གཡམས་རྐྱེན་པས་གནས་སྐབས་དྲྭ་ཐོག་བརྒྱུད་ནས་གསུང་ཆོས་དང་ཞལ་མཇལ་གྱིས་གོ་སྐབས་འཐོབ་བཞིན་པ་དང་། ཐའེ་ཝན་ཕྱི་སྲིད་ལས་ཁུངས་ངོས་ནས་བོད་མིའི་རང་དབང་སླར་གསོ་དང་ཆོས་རིག་སྐད་གསུམ་གྱི་ཐོབ་ཐང་ལ་མཐའ་གཅིག་ཏུ་རྒྱབ་སྐྱོར་དང་། ཐའེ་བོད་གཉིས་ཆོས་དད་རང་དབང་དང་། འགྲོ་བ་མིའི་ཐོབ་ཐང་། མང་གཙོ་བཅས་ལ་ཡིད་ཆེས་དང་མཉམ་ལེན་བྱེད་མཁན་ཡིན་སྟབས། མ་འོངས་མཐུན་གྲོགས་ཐོག་ནས་མཉམ་དུ་མདུན་སྤོ་ཐུབ་ངེས་ཡིན་པ་བཅས་གསུངས་ཡོད།
ཐའེ་ཝན་ཧཱ་ཀ་ལྷན་ཁང་གི་བློན་ཆེན་སྐུ་ཞབས་ཡང་ཁྲང་རྩན་མཆོག་གིས་༸གོང་ས་མཆོག་ནི་འཛམ་གླིང་འདིའི་ནང་བྱམས་པ་དང་སྙིང་རྗེའི་བདག་ཉིད་མཚོན་གྱི་ཡོད། ཁོང་གི་གསུང་ཐོས་ནས་མི་མང་དག་སེམས་འགུལ་ཐེབས་ནས་བྱམས་སྙིང་རྗེ་ཉམས་ལེན་བྱེད་རྒྱུའི་སེམས་ཤུགས་དང་བློ་སྟོབས་སྐྱེས་ཀྱི་ཡོད་པ་ནི་འཛམ་གླིང་སྤྱི་ལ་བདེ་སྐྱིད་དང་ཞི་བདེ་བསྐྲུན་རྒྱུར་དགེ་ཕན་ཆེན་པོ་ཡོང་གི་ཡོད། དེ་བརྒྱུད་བོད་ཀྱི་བདེན་པའི་འཐབ་རྩོད་ལ་ཡང་རྒྱལ་སྤྱིའི་སྟེང་ཚད་མཐོའི་རྒྱབ་སྐྱོར་ཐོབ་ཀྱི་ཡོད་གསུངས།
ཐའེ་ཝན་སྲིན་འཛིན་ཀྱི་སློབ་སྟོན་པ་གཙོ་གྲས་སྐུ་ཞབས་ཆོ་ཡི་རན་མཆོག་གིས་བོད་མི་རྣམས་ཕྱི་ནང་གི་དཀའ་ངལ་ཇི་ཙམ་འཕྲད་ཀྱང་སེམས་ཞི་བདེ་བག་ཕེབ་ངང་ནས་དཀའ་ངལ་གདོང་ལེན་བྱེད་སྟངས་ཀྱི་ཁྱད་ཆོས་ནི་གཙོ་བོ་༸གོང་ས་མཆོག་གི་རླབས་ཆེན་གྱི་བཀའ་སློབ་ལམ་སྟོན་བརྒྱུད་ཡོང་གི་ཡོད་པ་ང་ལྟ་བུ་ཆབ་སྲིད་པ་མང་དག་ཡིད་མོས་དང་སེམས་འགུལ་ཐེབས་ངེས་དང་བསླབ་བྱ་དེ་དག་ཆབ་སྲིད་མི་སྣས་ཉམས་སུ་བླངས་ནས་འཛམ་གླིང་སྤྱི་ལ་ཞི་བདེ་དང་ནང་སེམས་ལ་བདེ་སྐྱིད་ཐོབ་པའི་རེ་བ་ཞུ་བཞིན་ཡོད་བཅས་གསུངས།
དེ་བཞིན་སྐུ་མགྲོན་གཞན་ཁག་ཐའེ་ཝན་རིག་གཞུང་ལྷན་ཁང་གི་བོད་སོག་རིག་གཞུང་སྡེ་ཚན་གྱི་འགན་འཛིན་ལྕམ་སྐུ་ཀའོ་ཨུས་རྩན་ལགས་དང་། ཐའེ་ཝན་མང་གཙོ་ཡར་ཐོན་ཚོགས་པའི་དྲུང་ཆེ་གཞོན་པ་སྐུ་ཞབས་ལིན་ཕཱཡི་ཕཱང་ལགས། དོན་གཅོད་ལས་ཁུངས་ཀྱི་འགན་འཛིན་ལྷན་ཚོགས་ཀྱི་ཚོགས་མི་ལྕམ་སྐུ་ཧཱུང་ཧྲེས་རའོ་ལགས་བཅས་ནས་གོང་བཞིན་འཛིམ་གླིང་སྤྱི་ལ་ཞི་བདེ་དང་བདེ་སྐྱིད་བསྐྲུན་ཐབས་༸གོང་ས་མཆོག་གི་གཞན་ཕན་གྱིས་རླབས་ཆེན་བསླབ་བྱ་དང་། བོད་མིའི་རང་དབང་སླར་གསོའི་བདེན་པའི་འཐབ་རྩོད། བོད་ཀྱི་ཆོས་དང་རིག་གཞུང་། ཐའེ་ཝན་དད་ལྡན་པའི་མངོན་དོད་ལྟར་༸གོང་ས་མཆོག་བསྐྱར་དུ་ཐའེ་ཝན་ནང་ཆིབས་བསྒྱུར་བཀའ་དྲིན་བསྐྱང་རྒྱུ་ཡིད་ཆེས་ཡོད་པ་བཅས་གསུངས།
སྐུ་མགྲོན་རྣམས་ནས་༸རྒྱལ་བའི་སྐུའི་འཁྲུངས་སྐར་གྱི་ཀེཀ་ (Cake) གཏུབ་ནས་རྟེན་འབྲེལ་ཞུས་པ་དང་། དེ་རྗེས་དོན་ཁང་ནས་ལོ་ལྟར་སྐུའི་འཁྲུངས་སྐར་མཛད་སྒོ་དང་སྟབས་བསྟུན་༸གོང་ས་༸སྐྱབས་མགོན་ཆེན་པོ་མཆོག་གི་ཉིན་རེར་བཀའ་སློབ་སྙིང་བསྡུས་དེབ་ཕྲེང་ ༢༠ ཕྱོགས་སྒྲིག་གི་ཐའེ་ཝན་མི་རིགས་དགེ་བཤེས་བློ་བཟང་བྱམས་ཆེན་ལགས་ནས་རྒྱ་ཡིག་ཐོག་ཕབ་བསྒྱུར་གྱིས་ཕྱག་དེབ་དབུ་འབྱེད་གནང་ཡོད། གཞན་ཡང་སྐུ་མགྲོན་རྣམས་ལ་རྟེན་འབྲེལ་མཚོན་ཆེད་བོད་པ་དང་། ཐའེ་ཝན། སོག་པོའི་མི་རིགས་བཅས་ནས་བོད་ཀྱི་གླུ་གཞས་ཁག་གཅིག་གཟིགས་འབུལ་ཞུས་པ་དང་བསྟུན་ཚོགས་བཅར་བ་ཡོངས་ལ་དགོངས་དྲོའི་གསོལ་སྟོན་རྒྱས་པ་བཤམས་ནས་སྐུའི་འཁྲུངས་སྐར་གྱི་གཞུང་འབྲེལ་མཛད་སྒོ་མཇུག་སྒྲིལ་ཞུས།།
