༄༅། །༧ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་རྒྱ་ནག་གཞུང་གིས་འཛིན་བཟུང་བཙན་ཁྲིད་ཀྱིས་གར་སོང་ཆ་མེད་བཏང་ནས་ལོ་ངོ་ ༢༧ འཁོར་བ་དང་བསྟུན་ཨོསྟྲེ་ལི་ཡཱ་བོད་དོན་ལྷན་ཚོགས་ཀྱིས་རྒྱ་ནག་གཞུང་ནས་བོད་མིའི་ཆོས་དད་ངོ་བོར་གོ་རིམ་ལྡན་པའི་ཐོག་ནས་དྲག་གནོན་བྱེད་བཞིན་པའི་སྐོར་གྱི་སྙན་ཐོ་གསར་པ་ ༼ དཀའ་སྡུག་གདོང་ལེན། བོད་མིའི་ཆོས་དད་ངོ་བོ་སྲུང་སྐྱོབ། ༽ ཅེས་པ་ཕྱི་ལོ་ ༢༠༢༢ ཟླ་བ་ ༠༥ ཚེས་ ༡༧ ཉིན་སིཊ་ནིའི་ལྷོ་ཝེལ་གསར་པའི་ (New South Wales) མངའ་སྡེ་གྲོས་ཚོགས་སུ་དབུ་འབྱེད་གནང་ཡོད། 

དེ་ཡང་དབུ་འབྱེད་མཛད་སྒོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཆེད་མངགས་བརྙན་བརྒྱུད་གསུང་འཕྲིན་གནང་བའི་ནང་ཨོསྟྲེ་ལི་ཡཱ་བོད་དོན་ལྷན་ཚོགས་དང་། ལྷོ་ཝེལ་གསར་པའི་མངའ་སྡེའི་གྲོས་ཚོགས། ས་གནས་བོད་རིགས་མང་ཚོགས་སོགས་ནས་༸པཎ་ཆེན་ཆུང་སྲིད་རིན་པོ་ཆེའི་སྐོར་གོ་རྟོགས་རྒྱ་ཆེ་སྤེལ་བར་ཐུགས་རྗེ་ཆེ་ཞུས་པ་དང་འབྲེལ། ༸པཎ་ཆེན་ཆུང་སྲིད་རིན་པོ་ཆེ་མཆོག་བཙན་ཁྲིད་གར་སོང་ཆ་མེད་བཏང་བའི་གནས་ཚུལ་ནི་རྒྱ་ནག་གི་བཙན་དབང་འོག་བོད་མི་ཆབ་སྲིད་བཙོན་པ་མང་པོས་དཀའ་སྡུག་མནར་གཅོད་གནས་ཚད་འདྲ་མིན་མྱོང་བཞིན་པའི་མཚོན་དོན་ཡིན། དེ་ལྟ་བས་ན། ང་ཚོས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་སྐོར་གོ་རྟོགས་སྤེལ་རྒྱུ་དང་། ༸པཎ་ཆེན་རིན་པོ་ཆེའི་སྐུ་གཟུགས་འཕྲོད་བཞེས་གནས་སྟངས་མཚོན། ད་ལྟ་གང་དུ་ཡོད་མེད་འཛམ་གླིང་མི་མང་ལ་གསལ་སྟོན་བྱ་རྒྱུ་དང་། ཁོང་ལ་རང་ཆས་སུ་ཡོད་པའི་ཆོས་ཕྱོགས་ཀྱི་གོ་གནས་བསྐྱར་གསོ་གནང་རྒྱུར་རྒྱ་ནག་གཞུང་ལ་གནོན་ཤུགས་སྤྲོད་རྒྱུར་རྒྱལ་སྤྱིའི་མི་མང་ནས་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཞུ་རྒྱུ་ཡིན་ཞེས་གསུངས་ཡོད་པ་རེད། མཛད་སྒོའི་ཐོག་ལྷོ་ཝེལ་གསར་པའི་ས་གནས་གྲོས་ཚོགས་འཐུས་མི་སྐུ་ཞབས་ཇེ་མི་པར་ཀར་ (Jamie Parker) ལགས་དང་། ཨོསྟྲེ་ལི་ཡཱ་སྐུ་ཚབ་དོན་གཅོད་ཀརྨ་སེངྒེ་ལགས། ས་གནས་བོད་རིགས་མང་ཚོགས་བཅས་ཚང་འཛོམས་གནང་ཡོད་ཅིང་། སྐབས་དེར་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་ཨོསྟྲེ་ལི་ཡཱ་བོད་དོན་ལྷན་ཚོགས་ངོས་ནས་རྒྱ་གཞུང་གིས་བོད་ཀྱི་ཆོས་དད་ངོ་བོར་བཙན་གནོན་བྱེད་བཞིན་པའི་སྐོར་གྱི་སྙན་ཐོ་བཏོན་པར་ཐུགས་རྗེ་ཆེ་ཞུས་པ་དང་འབྲེལ་ཞིབ་ཕྲའི་སྙན་ཐོ་འདི་བོད་ནང་གི་དངོས་ཡོད་གནས་སྟངས་གསལ་སྟོན་བྱ་རྒྱུ་ཙམ་མ་ཟད། རྒྱ་ནག་གཞུང་གིས་བོད་ནང་ལག་བསྟར་བྱེད་བཞིན་པའི་དྲག་གནོན་ཆེ་བའི་སྲིད་བྱུས་ལ་ཨོསྟྲེ་ལི་ཡཱ་སྲིད་གཞུང་གིས་སྲིད་བྱུས་གཏན་འབེབས་གནང་སྐྱོང་ཡོང་བའི་རེ་སྐུལ་ཞུ་ཆེད་རྒྱབ་གཉེར་ནུས་ལྡན་ཞིག་ཏུའང་གྱུར་ངེས་ཡིན་པ་གསུངས། བོད་ཀྱི་ཆབ་སྲིད་བཙོན་ཟུར་དང་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་ཟུར་ཡེ་ཤེས་རྟོགས་ལྡན་ལགས་ཀྱིས་རང་ཉིད་ནས་བཙོན་ཁང་ནང་རྒྱ་གཞུང་ལ་འགོག་རྒོལ་གནང་ཚུལ་དང་། བོད་ནང་རྒྱ་ནག་གཞུང་ནས་འགྲོ་བ་མིའི་ཐོབ་ཐང་རྡོག་རོལ་ཚབས་ཆེ་གཏོང་ཚུལ་སོགས་ཀྱི་སྐོར་འགྲེལ་བརྗོད་གནང་། མཐའ་དོན་ས་གནས་བོད་རིགས་གཞོན་སྐྱེས་གཉིས་ནས་ཆིག་སྒྲིལ་གྱི་གཞས་དང་། ས་གནས་བོད་མི་རྣམས་ནས་༸པཎ་ཆེན་རིན་པོ་ཆེ་སྐུ་ཚེ་བརྟན་པ་དང་མྱུར་དུ་གློད་བཀྲོལ་ཡོང་བའི་སྨོན་ལམ་གསུང་འདོན་གྱིས་མཛད་སྒོ་ལེགས་པར་གྲོལ་ཡོད་པ་བཅས།།