༄༅། །ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་ཕྱི་ལོ་༢༠༢༢ ཟླ་བ་༠༥ ཚེས་༡༠ ཉིན་ཨཱ་ཡར་ལེནྜའི་གྲོས་ཚོགས་གོང་མའི་འཐུས་མི་མལ་ཀོམ་བྷ་ཡར་ནེ་(Malcolm Byrne) ལགས་ཀྱིས་གཙོས་པའི་གྲོས་ཚོགས་འཐུས་མི་ཁག་གཅིག་དང་མཇལ་འཕྲད་གནང་ཡོད།
ཚོགས་འདུར་གྲོས་ཚོགས་འཐུས་མི་རི་ཅཊ་བྷ་རེཊ་བོ་ཡལ་(Richard Barrett Boyle) ལགས་དང་། ཨཱ་ཡར་ལེནྜའི་གྲོས་ཚོགས་ཀྱི་ཕྱི་འབྲེལ་བདེ་འཇགས་ཚོགས་ཆུང་གི་ཚོགས་གཙོ་ཅར་ལིས་ཕ་ལ་ན་གམ་(Charles Flanagan) ལགས། ཨ་རེ་ནི་ཊུན་(Irene Dunne) ལགས། གྲོས་ཚོགས་གོང་མའི་འཐུས་མི་རོ་ཡི་སིན་གྷར་བི་(Roisin Garvey) ལགས། ཨཱ་ཡར་ལེནྜའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཀྲོ་ནི་ཊུན་(Tony Dunne) ལགས་བཅས་མཉམ་ཞུགས་གནང་ཡོད།
དེ་ཡང་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་ཨཱ་ཡར་ལེནྜའི་གྲོས་ཚོགས་འཐུས་མི་རྣམས་ལ་བོད་ནང་གི་ད་ལྟའི་ཛ་དྲག་གི་གནས་སྟངས་སྤྱི་དང་། བོད་རྒྱའི་དཀའ་རྙོག་སེལ་བའི་ཐབས་ལམ་གཉིས་སྨན་དབུ་མའི་ལམ་གྱི་སྲིད་བྱུས་སྐོར་ངོ་སྤྲོད་གནང་བ་མ་ཟད། རྒྱ་ནག་དམར་ཤོག་གཞུང་གི་བཅིངས་བཀྲོལ་དམག་གིས་ཕྱི་ལོ་༡༩༥༠ ལོར་ཁྲིམས་འགལ་ཐོག་བོད་བཙན་འཕྲོག་བྱས་ཡོད་སྟབས། རྒྱལ་སྤྱིའི་ཐོག་ནས་བོད་དོན་ལ་རྒྱབ་སྐྱོར་གནང་དགོས་པའི་གལ་གནད་དང་། བོད་ཀྱི་གནད་དོན་དེ་རྒྱ་ནག་ནང་ཁུལ་གྱི་གནད་དོན་མ་ཡིན་ཞིང་། བོད་རྒྱའི་དཀའ་རྙོག་ཞི་བའི་ངང་སེལ་ཐབས་སུ་རྒྱལ་སྤྱིའི་ཚོགས་སྡེ་ཁག་གིས་རྒྱབ་སྐྱོར་གནང་དགོས་སྐོར་གསུངས།
གཞན་ཡང་བོད་ཀྱི་གནད་དོན་རྒྱ་ཁྱབ་ཆེ་རུ་གཏོང་བར་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་ཨཱ་ཡར་ལེནྜའི་གྲོས་ཚོགས་གོང་འོག་གི་འཐུས་མི་རྣམས་ནས་ཨཱ་ཡར་ལེནྜའི་གྲོས་ཚོགས་ནང་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་དགོས་པའི་རེ་འདུན་ཞུས་གནང་ཡོད་པ་མ་ཟད། ཨཱ་ཡར་ལེནྜའི་གྲོས་ཚོགས་ངོས་ནས་བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་གནང་དགོས་པའི་འབོད་སྐུལ་ཞུས་གནང་ཡོད། སྐབས་དེར་ཨཱ་ཡར་ལེནྜའི་གྲོས་ཚོགས་ཀྱི་ཕྱི་འབྲེལ་བདེ་འཇགས་ཚོགས་ཆུང་གི་ཚོགས་གཙོ་ཅར་ལིས་ཕ་ལ་ན་གམ་ལགས་ནས་ཨཱ་ཡར་ལེནྜའི་ཕྱི་སྲིད་ལྷན་ཁང་ལ་བོད་དོན་དང་འབྲེལ་བའི་ཕྱག་བྲིས་ཤིག་དབུལ་རྒྱུའི་ཞལ་བཞེས་གནང་ཡོད།
གྲོས་མོལ་གྲོལ་རྗེས་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་ཨཱ་ཡར་ལེནྜའི་ཕྱི་འབྲེལ་ལས་ཁུངས་ཀྱི་གནད་ཡོད་མི་སྣ་ཁག་གཅིག་དང་མཇལ་འཕྲད་ཀྱིས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་འགྲོ་བཞིན་པའི་སྐོར་དང་། རྒྱ་གཞུང་གིས་བོད་དེ་རྒྱ་ནག་གི་ཆ་ཤས་ཡིན་ཞེས་བཤད་པར་མ་གསན་པར་བོད་དོན་ལ་རྒྱབ་སྐྱོར་གཙང་མ་གནང་དགོས་ཞེས་དང་། ཨཱ་ཡར་ལེནྜའི་གཞུང་གིས་རྒྱ་ནག་གཞུང་གིས་ནམ་རྒྱུན་བོད་དེ་རྒྱ་ནག་གི་ཆ་ཤས་ཡིན་ཞེས་དྲིལ་བསྒྲགས་ཤུགས་ཆེ་སྤེལ་བཞིན་པར་ངོས་ལེན་གནང་རྒྱུ་མེད་པའི་རེ་སྐུལ་ཞུས་གནང་ཡོད།
ཐེངས་འདིའི་ཚོགས་འདུའི་ཐོག་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་དང་ལྷན་དུ་ཨཱ་ཡར་ལེནྜའི་བོད་རིགས་ཚོགས་པའི་ཚོགས་གཙོ་ཚེ་རིང་སྒྲོལ་མ་ལགས་དང་། ཨཱ་ཡར་ལེནྜའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཀྲོ་ནི་ཊུན་ལགས་བཅས་བཅར་ཡོད། སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་ཨཱ་ཡར་ལེནྜའི་བོད་རིགས་མང་ཚོགས་དང་མཇལ་འཕྲད་གནང་སྟེ་ཨཱ་ཡར་ལེནྜའི་ཁུལ་གྱི་གཞུང་འབྲེལ་འཚམས་གཟིགས་ལེགས་པར་མཇུག་སྒྲིལ་གནང་ཡོད་པ་བཅས།།
