༄༅། །ཕྱི་ལོ་ ༢༠༢༢ ཟླ་བ་ ༠༥ ཚེས་ ༠༥ ཉིན་རྒྱ་གར་གྱི་རྒྱལ་ས་ལྡི་ལིར་ཧིན་བོད་མཛའ་འབྲེལ་ཚོགས་པ་ (Bharat Tibbat Sahyog Manch) དབུ་བརྙེས་ནས་ལོ་ངོ་ ༢༣ འཁོར་བའི་དུས་ཆེན་སྲུང་བརྩི་གཟབ་རྒྱས་ཞུས་ཡོད། 

དེ་ཡང་མཛད་སྒོའི་ཐོག་ཧིན་བོད་མཛའ་འབྲེལ་ཚོགས་པའི་ལམ་སྟོན་པ་སྐུ་ཞབས་ཨིན་དྲེཤ་ཀུ་མཱར་ལགས་ཀྱིས་བོད་དོན་རྒྱབ་སྐྱོར་ཚོགས་པ་དེ་བཞིན་ཕྱི་ལོ་ ༡༩༩༩ ཟླ་བ་ ༥ ཚེས་ ༥ ཉིན་ཐོག་མར་བཞུགས་སྒར་རྡ་སར་དབུ་འཛུགས་གནང་ཞིང་། སྐབས་དེར་བོད་རང་བཙན་སྐོར་བཤད་ཐུབ་དཀའ་ཡང་དེང་སྐབས་བོད་རང་བཙན་གྱི་མངོན་འདོད་འཛམ་གླིང་སྤྱི་ཡོངས་སུ་ཁྱབ་འཕེལ་བྱུང་ཡོད་པ་དང་། ཧིན་བོད་མཛའ་འབྲེལ་ཚོགས་པས་ལས་དོན་དེའི་ཆེད་འབད་འབུངས་གནང་བཞིན་ཡོད་ཅེས་དང་། བོད་རྒྱ་ནག་གི་ཆ་ཤས་ནམ་ཡང་མ་ཡིན་ལ། རྒྱ་ནག་ནི་རྒྱ་གར་གྱི་ཁྱིམ་མཚེས་ནམ་ཡང་མིན། རྒྱ་ནག་གི་ཏོག་དབྱིབས་ནད་ཡམས་རྐྱེན་བྱས་ཏེ་སྡིག་པ་ཚབས་ཆེ་བསགས་ཡོད་པ་མ་ཟད། འཛམ་གླིང་མི་མང་ལ་དཀའ་ངལ་ཆེན་པོ་སྤྲད་ཡོད་ཅེས་སོགས་གསུངས། དེ་རྗེས་དམིགས་བསལ་སྐུ་མགྲོན་ཕྱོགས་བཞུགས་བོད་མི་མང་སྤྱི་འཐུས་དཀོན་མཆོག་ཡར་འཕེལ་ལགས་ཀྱིས་ཚོགས་པ་དབུ་བརྙེས་ནས་ལོ་ངོ་ ༢༣ འཁོར་བར་ལེགས་གསོལ་འཚམས་འདྲི་དང་སྦྲགས། བོད་དང་མཚོ་མ་ཕམ་རྒྱ་ནག་གི་བཙན་དབང་འོག་ནས་ཐར་ངེས་ཤིང་། རྒྱ་གར་ལ་རྒྱལ་སྲུང་ཐོག་ནས་ཉེན་ཁ་མེད་པ་ཆགས་རྒྱུ་ཡིན་ཞེས་དང་། ཧིན་བོད་མཛའ་འབྲེལ་ཚོགས་པའི་སློབ་སྟོན་པ་གཙོས་པའི་འབྲེལ་ཡོད་ལས་བྱེད་ཡོངས་ནས་བོད་དོན་དང་འབྲེལ་བའི་ལས་དོན་ཚགས་ཚུད་གནང་བཞིན་པར་བསྔགས་བརྗོད་གནང་ཡོད། མཛད་སྒོའི་ཐོག་གཞན་ཡང་ (Vishwa Hindu Parishad) ཞེས་པའི་ཚོགས་པའི་རྒྱལ་ཡོངས་ཟུང་དྲུང་དང་མགྲིན་ཚབ་པ་སྐུ་ཞབས་བི་ཇ་ཡ་ཤངྐར་ཏི་བཱ་རཱི་ལགས་དང་། ཧིན་བོད་མཛའ་འབྲེལ་ཚོགས་པའི་རྒྱལ་ཡོངས་དྲུང་ཆེ་སྐུ་ཞབས་པང་ཀཇ་གོ་ཡལ་ལགས། ལྡི་ལི་བསམ་ཡས་གླིང་བོད་མིའི་གཞིས་སྒར་གྱི་ས་གནས་འགོ་འཛིན་རྡོ་རྗེ་ཚེ་རིང་ལགས། དབུས་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་སོགས་ནས་བོད་དོན་དང་རྒྱ་གར་གྱི་བདེ་འཇགས་སོགས་དང་འབྲེལ་བའི་གསུང་བཤད་གནང་ཡོད་པ་རེད། 

ཐེངས་འདིའི་མཛད་སྒོའི་གཙོ་སྐྱོང་ལྡི་ལི་ཧིན་བོད་མཛའ་འབྲེལ་ཚོགས་པའི་ཚོགས་གཙོ་ཨ་ཇ་ཡ་བྷ་རདྦ་ཇ་ལགས་དང་། སྤྱི་ཁྱབ་དྲུང་ཆེ་སྐུ་ཞབས་སན་ཇ་ནཱ་ཅཽ་དྷ་རཱི་ལགས་ཀྱིས་གནང་ཡོད་པ་བཅས།།