༄༅། །ཕྱི་ལོ་ ༢༠༢༢ ཟླ་བ་ ༠༥ ཚེས་ ༢༢ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་ཞབས་ཨན་ཊོ་ནི་ཨལ་བྷ་ནི་སི་ (Anthony Albanese) མཆོག་ཨོསྟྲེ་ལི་ཡཱའི་གྲོས་ཚོགས་འོས་བསྡུ་ཆེན་མོའི་ཁྲོད་ནས་སྲིད་བློན་དུ་བདམས་ཐོན་བྱུང་བར་དགའ་བསུའི་འཚམས་འཕྲིན་སྩལ་གནང་ཡོད། 

དེ་ཡང་འཚམས་འཕྲིན་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས། ངོས་རང་ཕྱི་ལོ་ ༡༩༨༢ ལོར་ཨོསྟྲེ་ལི་ཡཱར་ཐོག་མར་བསྐྱོད་པ་ནས་བཟུང་ད་བར་སྐུ་ཉིད་ཀྱི་མཛེས་སྡུག་ལྡན་པའི་རྒྱལ་ཁབ་ཏུ་གཙོ་བོ་ཤེས་རིག་བསྟི་གནས་དང་། ཞི་བདེའི་ཚོགས་པ་ཁག་གི་མགྲོན་འབོད་ལྟར་ཡང་ཡང་བསྐྱོད་རྒྱུའི་གོ་སྐབས་བྱུང་། སྐབས་དེར་ངོས་ལ་ལས་རིགས་འདྲ་མིན་གཉེར་བཞིན་པའི་ས་གནས་མི་མང་གི་གུ་ཡངས་དང་བག་ཕེབས་ཀྱི་བསམ་བློས་ཚོར་ཤུགས་ཆེན་པོ་སྤྲད་མྱོང་བ་མ་ཟད། མི་མང་པོས་ངོས་ཀྱིས་བྱམས་སྙིང་རྗེ་དང་། བཟོད་སྒོམ། དགོངས་ཡངས་ལྟ་བུའི་འགྲོ་བ་མིའི་བཟང་སྤྱོད་གོང་འཕེལ་གཏང་རྒྱུ་དང་ཆོས་ལུགས་མཐུན་འབྲེལ་ཐད་འབད་རྩོལ་བྱེད་བཞིན་པར་དང་ཞེན་དགའ་མོས་བྱེད་པ་དེས་སེམས་འགུལ་ཆེན་པོ་ཐེབས་བྱུང་། 

ང་ཚོ་བོད་མི་རྣམས་ཀྱིས་ནང་པའི་རིག་གཞུང་རྒྱུན་འཛིན་བྱེད་པར་ཨོསྟྲེ་ལི་ཡཱ་མི་མང་དང་དབུ་ཁྲིད་རིམ་བྱོན་གྱིས་རྒྱབ་སྐྱོར་གནང་བར་སྐལ་བ་བཟང་པོ་ཡིན། ནང་པའི་གཞུང་ནས་བྱུང་བའི་འཚེ་མེད་ཞི་བ་དང་། སྙིང་རྗེའི་བསླབ་བྱར་གང་ཟག་སྒེར་གྱི་སེམས་ལ་ཞི་བདེ་བསྐྲུན་རྒྱུ་མཚོན། འཛམ་གླིང་ཞི་བདེའི་ཆེད་ཞབས་འདེགས་སྒྲུབ་ཐུབ་པའི་ནུས་པ་ཡོད། ཅེས་དང་། 

མཐར་༸མགོན་པོ་གང་ཉིད་མཆོག་གིས་བདམས་ཐོན་སྲིད་བློན་མཆོག་གིས་ཨོསྟྲེ་ལི་ཡཱ་མི་མང་གི་རེ་བ་དང་མངོན་འདོད་བསྒྲུབ་རྒྱུ་དང་མཛའ་མཐུན་གྱི་འཛམ་གླིང་སྐྲུན་ཆེད་ཡོང་འགྱུར་གྱི་དཀའ་སྡུག་ཁག་ལ་གདོང་ལེན་བྱེད་ཐུབ་པའི་སྨོན་འདུན་དང་བཅས་གསུང་འཕྲིན་མཇུག་བསྡུས་གནང་འདུག །