༄༅། །ཕྱི་ལོ་ ༢༠༢༢ ཟླ་བ་ ༠༥ ཚེས་ ༢༥ ཉིན་གྱི་ཕྱི་དྲོ་ཆུ་ཚོད་ ༣ ཐོག་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་དང་ས་རཱ་བོད་ཀྱི་མཐོ་རིམ་སློབ་གཉེར་ཁང་ཐུན་མོང་གི་གོ་སྒྲིག་འོག་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ཚོགས་ཁང་དུ་དབྱར་དུས་བོད་ཀྱི་སྐད་ཡིག་དང་རིག་གཞུང་གོ་རྟོགས་ཟབ་སྦྱོང་དབུ་འབྱེད་ཀྱི་མཛད་སྒོ་ཚོགས་ཡོད་པ་དང་། མཛད་སྒོའི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་ཆོས་རིག་དྲུང་ཆེ་ཀླུ་ཁྲི་ཚང་འཆི་མེད་ཚེ་དབྱངས་ལགས་དང་། དྲུང་འཕར་བདུད་འདུལ་རྡོ་རྗེ་ལགས། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་སྤྱི་པ་སངས་ཚེ་རིང་ལགས་དང་འབྲེལ་ཡོད་དགེ་རྒན་རྣམ་པ། དེ་བཞིན་ལྡེ་ར་ལྡུན་དང་། མ་སུ་རི། ལྡི་ལི། སིམ་ལ། ཝཱ་ར་ཎ་སི། མན་སྤར་སོགས་རྒྱ་གར་གྱི་ས་གནས་ཁག་བདུན་ནས་རྒྱ་གར་གྱི་སློབ་གྲྭར་འགྲིམ་བཞིན་པའི་འཛིན་རིམ་དྲུག་པ་ནས་བཅུ་གཉིས་བར་གྱི་བོད་པའི་སློབ་ཕྲུག་གྲངས་ ༢༠ བཅས་ཕེབས་ཡོད།
དེ་ཡང་མཛད་སྒོའི་ཐོག་མར་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་ཆོས་རིག་དྲུང་ཆེ་ཀླུ་ཁྲི་ཚང་འཆི་མེད་ཚེ་དབྱངས་ལགས་ཀྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་དང་སྣང་གསལ་མཆོད་མེ་ཞལ་ཕྱེ་ཞུས་རྗེས་རྟེན་འབྲེལ་གསོལ་ཇ་འབྲས་སིལ་འདེགས་འབུལ་ཞུས། དེ་རྗེས་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་སྤྱི་པ་སངས་ཚེ་རིང་ལགས་ཀྱིས་དབྱར་དུས་བོད་ཀྱི་སྐད་ཡིག་དང་རིག་གཞུང་གོ་རྟོགས་ལས་གཞིའི་སྐོར་ངོ་སྤྲོད་གསུང་བཤད་གནང་སྐབས་ཐེངས་འདིའི་ལས་རིམ་ནང་སློབ་ཕྲུག་རྣམ་པས་སྒོམ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞི། ནང་པའི་ལྟ་གྲུབ། ལོ་རྒྱུས། ནང་ཆོས། སྐད་ཡིག གཞས་ཞབས་བྲོ། རོལ་ཆ་སོགས་སྦྱང་དགོས་པ་སོགས་ཀྱི་སྐོར་གསུངས་ཡོད།
དེ་ནས་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་ཆོས་རིག་དྲུང་ཆེ་ཀླུ་ཁྲི་ཚང་འཆི་མེད་ཚེ་དབྱངས་ལགས་ཀྱིས་གསུང་བཤད་གནང་དོན། རྣམ་པ་ཚོས་སློབ་གྲྭའི་གུང་གསེང་བེད་སྤྱོད་བཏང་སྟེ་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་ཡོང་དགོས་པའི་དམིགས་ཡུལ་ཇི་ཡིན་སོ་སོ་རང་ཉིད་ལ་དྲི་བ་གཏོང་དགོས། དེ་བཞིན་རྣམ་པ་ཚོ་ཉིན་གྲངས་ ༢༡ རིང་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་བཞུགས་སྐབས་དགེ་རྒན་རྣམས་ལ་བཀའ་འདྲི་ཡང་ཡང་ཞུ་རྒྱུ་ཤིན་ཏུ་གལ་ཆེན་པོ་རེད། སོ་སོའི་ཕ་མ་རྣམས་ལ་བོད་པའི་སྐོར་བཀའ་འདྲི་ཞུ་དགོས་ལ། མི་རབས་རྒན་པ་རྣམས་ལའང་བོད་ཀྱི་ལོ་རྒྱུས་དང་ཁོང་ཚོ་རྒྱ་གར་ལ་བཙན་བྱོལ་དུ་ཕེབས་དགོས་པའི་སྐོར་བཀའ་འདྲི་ཞུ་རྒྱུ་གལ་ཆེན་པོ་རེད།
བཞུགས་སྒར་རྡ་ས་ཁུལ་དུ་ཡོད་པའི་བོད་མིའི་སྒྲིག་འཛུགས་ཀྱི་ལས་ཁུངས་ཁག་དང་བོད་པའི་རིག་གཞུང་བསྟི་གནས་ཁང་སོགས་ལ་གཟིགས་སྐོར་ཕེབས་སྐབས་འབྲེལ་ཡོད་ལས་བྱེད་རྣམས་ལ་བཀའ་འདྲི་ཞུས་ཏེ་ཐོ་འགོད་གནང་རྒྱུ་གལ་ཆེན་པོ་རེད། ཅེས་དང་། ང་ཚོ་ཚང་མ་བཙན་བྱོལ་བ་དང་བོད་པ་ཡིན་པའི་ཆ་ནས་ང་ཚོར་ལས་འགན་འཕར་མ་ཡོད། ཡ་རབས་བཟང་སྤྱོད་ཚུལ་དང་ལྡན་པ་གནང་དགོས། རྣམ་པ་ཚོས་གོ་སྐབས་སྟངས་འཛིན་གནང་སྟེ་བོད་པའི་ཆོས་དང་། རིག་གཞུང་། སྐད་ཡིག་བཅས་ལ་སྦྱང་བརྩོན་གནང་རྒྱུ་ཧ་ཅང་གལ་ཆེན་པོ་རེད། ཅེས་སོགས་ཀྱི་གསུང་བཤད་གནང་གྲུབ་མཚམས་ཆོས་རིག་དྲུང་འཕར་བདུད་འདུལ་རྡོ་རྗེ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་ལེགས་པར་གྲུབ་ཡོད།
སྤྱིར་དབྱར་དུས་བོད་ཀྱི་སྐད་ཡིག་དང་རིག་གཞུང་གོ་རྟོགས་ཟབ་སྦྱོང་དེ་བཞིན་ཕྱི་ལོ་ ༢༠༢༢ ཟླ་ ༠༥ ཚེས་ ༢༥ ནས་ཕྱི་ཟླ་ ༦ ཚེས་ ༡༥ བར་འཚོགས་གཏན་ཁེལ་ཡོད། ཆོས་རིག་ལས་ཁུངས་ཀྱི་འབྲེལ་ཡོད་ལས་བྱེད་དོན་གྲུབ་ཚེ་རིང་ལགས་ཀྱིས་ཐེངས་འདིའི་དབྱར་དུས་བོད་ཀྱི་སྐད་ཡིག་དང་རིག་གཞུང་གོ་རྟོགས་ཟབ་སྦྱོང་དབུ་འབྱེད་མཛད་སྒོ་གཙོ་སྐྱོང་གནང་ཡོད་པ་བཅས།།
