༄༅། །རྒྱ་ནག་གཞུང་གིས་ཉིང་ཁྲི་ས་ཁུལ་སྐྱེམས་སྟོང་རྫོང་ཨ་རོང་གྲོང་ཚོ་ནས་ཡིན་པ་བོད་མི་ནམ་མཁའ་ལགས་སུ་རྒྱལ་ཁབ་ཀྱི་གསང་བ་ཕྱིར་གྱར་བྱས་པའི་ཉེས་མིང་འོག་ལོ་ ༥ ལྷག་གི་ཁྲིམས་ཐག་བཅད་འདུག་པ་དང་། རྒྱ་ནག་གཞུང་གིས་ཕྱི་ལོ་ ༢༠༡༨ ལོའི་ལོ་སྟོད་ཙམ་ལ་ཁོང་འཛིན་བཟུང་གིས་ད་བར་ལོ་ལྔ་ལྷག་འགྲོ་བཞིན་ཡོད་ཀྱང་ཁོང་ལ་ཁྲིམས་ཐག་བཅད་ཡོད་པ་ཙམ་ལས་གཞན་ས་གནས་གང་དུ་བཙོན་མཇུག་བྱས་ཡོད་པ་དང་། གནས་སྟངས་ག་འདྲ་ཡིན་པ་སོགས་ཀྱི་གནས་ཚུལ་གང་ཡང་ཤེས་རྟོག་མེད་པར་ལྷག་ཡོད།
དེ་ཡང་གསར་འགྱུར་བརྒྱུད་ལམ་ཁག་གཅིག་གི་ནང་གནས་ཚུལ་སྤེལ་གསལ་ལྟར་ན། ཉིང་ཁྲི་ས་ཁུལ་སྐྱེམས་སྟོང་རྫོང་ནས་ཡིན་པའི་ནམ་མཁའ་ལགས་ས་གནས་རྒྱ་ནག་གཞུང་གི་ཉེན་རྟོག་པས་ཕྱི་ལོ་ ༢༠༡༨ ལོའི་འགོ་སྟོད་དུ་འཛིན་བཟུང་བྱས་ཏེ། ཉིང་ཁྲི་ས་ཁུལ་ཞོ་ཁ་རྫོང་འབྲིང་རིམ་མི་དམངས་ཁྲིམས་ཁང་ནང་རྒྱལ་ཁབ་ཀྱི་གསང་བ་ཕྱིར་གྱར་བྱས་པའི་ཉེས་མིང་འོག་ལོ་ལྔ་དང་ཟླ་བ་གསུམ་གྱི་བཙོན་འཇུག་ཁྲིམས་ཐག་བཅད་པའི་གནས་ཚུལ་ཐོན་ཡོད་ཀྱང་། བཙོན་འཇུག་བྱས་པ་ནས་བཟུང་སྟེ་ད་བར་ཁོང་གི་གཟུགས་གཞིའི་གནས་སྟངས་གང་འདྲ་ཡོད་མེད་སོགས་ཀྱི་ཐད་གནས་ཚུལ་གང་ཡང་ཤེས་རྟོགས་མེད་པ་རེད་འདུག
ནམ་མཁའ་ལགས་ཀྱི་ཕ་མ་གཉིས་སྔ་མོ་ནས་འདས་གྲོངས་སུ་གྱུར་ཡོད་པ་དང་། ཁོང་གིས་ཞོ་ཁ་རྫོང་ཁོངས་ཀྱི་ཁྱིམ་ཚང་ཞིག་ཏུ་གཡོག་རྒྱུག་ནས་ཡུན་རིང་ཕྱིན་རྗེས། སྟབས་མ་ལེགས་པ་ཞིག་ལ་ཁྱིམ་ཚང་དེའི་ཁྱིམ་བདག་རླངས་འཁོར་བརྡབ་སྐྱོན་བྱུང་སྟེ་ཚེ་ལས་འདས་པ་དང་། འདས་པོའི་བཟའ་ཟླ་ཁྱིམ་ཚང་གཞན་ཞིག་ཏུ་མནའ་མར་ཕྱིན་སྟབས། ནམ་མཁའ་སྡོད་ཡུལ་མེད་པར་འཁྱམ་ཉུལ་གྱིས་འཚོ་བ་སྐྱེལ་དགོས་བྱུང་ནའང་དུས་རྒྱུན་སྡེ་མི་གཞན་ལ་རོགས་རམ་བྱེད་རྒྱུར་དགའ་པོ་ཡོད་མཁན་ཞིག་ཡིན།
རང་ལོ་ ༦༠ ཡས་མས་ཡིན་པའི་ནམ་མཁའ་ལགས་ནི། ཉིང་ཁྲི་ས་ཁུལ་སྐྱེམས་སྟོང་རྫོང་ཨ་རོང་གྲོང་ཚོ་ནས་ཡིན་ཞིང་། ཁོང་ལ་བཟའ་ཟླ་དང་བུ་ཕྲུག སྤུན་མཆེད་སོགས་གང་ཡང་མེད་པའི་མི་ཁེར་རྐྱང་ཞིག་ཡིན་འདུག ཁོང་གི་ཕ་མིང་ལ་ཡུས་ལོ་དང་མ་མིང་ལ་སྐྱིད་ཉི་མ་ཟེར་གྱི་ཡོད་འདུག་པ་བཅས།།
